2 थिस्सलुनीकी 2 - Garhwali

प्रभु यीशु को दुबरा औण

^1-2 हे मेरा भै-बैंणो, अब हम तुमतै अपणा प्रभु यीशु का दुबरा औण का बारा मा, अर वेका पास इकट्‍ठा होण का बारा मा बतै देन्द्‍यां। किलैकि तुमरा बीच मा कुछ इन्द्रया लोग ऐ गैनी, जु कि तुमतै गळत सिखौन्दिन। अर वु बुल्दिन, कि प्रभु को दुबरा औण की बात पूरि ह्‍वे गै अर वु इन भि बुलला, कि हमतै त परमेस्वर का आत्मा न बतै अर भविष्यबाणियाँ भि ह्‍वेनि। अर वु लोग हमरु नौ लेके इन भि बुलला, कि हमतै त चिठ्‍ठी का द्‍वारा बतये गै। मगर हम तुमतै बतै देन्द्‍यां, कि यों बातों तैं सुणी के तुम अचानक से बिस्वास मा डगमगै नि जयां अर ना ही घबरयां।

³ इलै कै की भि बातों तैं सुणी के वेकी बातों मा फंसी नि जयां। किलैकि प्रभु का दुबरा औण से पैलि भौत सा लोग परमेस्वर अर वेका नियम-कानूनों को विरोध करला। तब परमेस्वर का नियम-कानूनों तैं तोड़ण वळु एक पाप को पुत्र परगट होलु, जै खुणि नरकलोक को दण्ड अर विणास ठैर्युं च।

⁴ अर येसे पैलि की पाप का पुत्र तैं दण्ड मिलु, उ हमरा परमेस्वर को भि विरोध करलु। अर जौं तैं लोग भगवान समझि के ऊंकी भक्‍ति करदिन, ऊ सभ्यों बटि पाप को पुत्र अफ तैं बड़ु बणालु। अर इख तक की उ परमेस्वर का मन्दिर मा बैठि के परमेस्वर होण को दावा करलु।

⁵ अर जब मि तुमरा दगड़ा मा छौ, त यू सब बात मिन तुमतै बतै छै, क्या वु तुमतै याद नि च?

⁶ अर अब तुम वेका का बारा मा जणदा ही छाँ, कि जैन वे पाप का पुत्र तैं रोकी के रख्युं च, ताकि जब तक परमेस्वर का द्‍वारा ठैर्युं बगत नि ऐ जौ, तब तक उ परगट नि ह्‍वे सकदु।

⁷ अर वेन पाप का पुत्र तैं तब तक रोकी के रख्युं च, जब तक की उ वेका बाटा बटि हटये नि जौ। अर या बात सच्‍चि भि च, कि शैतान लुकि-छिपी के लोगु का बीच मा काम कनु च, ताकि लोग परमेस्वर का नियम-कानूनों तैं अपणा जीवनों मा स्वीकार नि कैरी सैका।

^8-9 अर जब पाप को पुत्र परगट होलु, त उ शैतान का द्‍वारा दिईं ताकत से आलु। अर हरेक किसम का झूठ्‍ठा चमत्कारिक चिन्‍न, अर अदभुत काम कैरिके दिखालु। अर पाप का पुत्र को विणास होण से पैलि उ यू सब कुछ करलु। मगर जब प्रभु यीशु दुबरा आलु, त अपणा औण की ताकत से वेतैं अपणी फूकळ ही नास कैरी द्‍यालु।

¹⁰ अर जु लोग नास होण वळा बाटा पर चलणा छिन, ऊंतैं अपणा जाल मा फसौणु खुणि पाप को पुत्र हरेक किसम का बुरा काम करलु। तब वु वेका जाल मा फंसी जाला, किलैकि ऊंन परमेस्वर का सच्‍चा प्यार तैं अपणा जीवन मा स्वीकार नि कैरी। अर अगर जु वु यीशु तैं स्वीकार कैरी देन्दा, त ऊंतैं बचयै जान्दु।

¹¹ इलै परमेस्वर भि ऊंका बीच मा एक भरमौण वळु विचार तैं डललु। तब वु भटकी जाला, अर वे पर बिस्वास करला जु झूठ्‍ठ च।

¹² अर इन उ इलै करलु, ताकि जथगा लोगु न सच्‍चै पर बिस्वास नि कैरी, बल्किन मा अधरम का कामों से खुश ह्‍वेनि, वु सभ्या का सभि दण्ड पा।

बिस्वास मा मजबूत बणा

¹³ मगर हे मेरा भै-बैंणो, तुम जु प्रभु का प्रिय लोग छाँ, हमरि या जिमेदारी बणदी की हम तुमरा खातिर पिता परमेस्वर को धन्यवाद हमेसा कैरा। किलैकि परमेस्वर न तुमतै शुरुवात बटि ही चुण्यालि, कि तुमतै बचयै जौ। अर जब हम वेका सच्‍चा वचन पर बिस्वास करद्‍यां, तब पवित्र आत्मा हमतै पवित्र बणादु ताकि वेका द्‍वारा हम पूरि तरौं से बचि जां।

¹⁴ अर छुटकारा पौण का खातिर ही परमेस्वर न तुमतै बुलै ताकि जु आदर प्रभु यीशु मसीह तैं परमेस्वर न देई, वेका हकदार तुम भि ह्‍वे जा। अर ये शुभ समाचार का बारा मा हमुन ही तुमतै बतै, अर वे पर बिस्वास कैरिके तुम बचयै ग्यां।

¹⁵ इलै हे मेरा भै-बैंणो, बिस्वास मा मजबूत बणयां रा। अर जु-जु बात हमुन तुमतै वचनों का द्‍वारा अर चिठ्‍ठी-पतरीयों का द्‍वारा सिखैनी, ऊं बातों तैं माणा।

¹⁶ हमरु पिता परमेस्वर हम बटि प्यार करदु, अर वेन हमतै सदनि तक रौण वळी दिलासा अर सबसे अच्छी आस दिईं च।

¹⁷ अर हम तुम खुणि प्रार्थना करद्‍यां, कि प्रभु यीशु मसीह अर पिता परमेस्वर तुमतै हिम्मत द्‍यो, ताकि तुम हमेसा अच्छु बोला और अच्छा काम कैरी सैका।