2 पतरस 1 - Garhwali

पतरस की चिठ्‍ठी

¹ हे मेरा भै-बैंणो, मि शमौन पतरस यीशु मसीह को सेवक अर एक खास चेला छौं। मि या चिठ्‍ठी तुम सभ्यों खुणि लिखणु छौं, जौं तैं पिता परमेस्वर की तरफा बटि यू कीमती मौका मिल्यूं च, कि हम सब छुटकारा देण वळा यीशु मसीह पर बिस्वास कैरा। अर यीशु मसीह ही च, जु कि परमेस्वर की नजर मा धरमी च।

² अर मि इन प्रार्थना करदु, कि तुम सभ्या का सभि पिता परमेस्वर अर यीशु मसीह का ज्ञान मा बढदी जा, अर वेकी किरपा अर वेकी शान्ति तुम सभ्यों पर जादा से जादा होणी रौ। आमीन।

बिस्वासियों तैं प्रभु खुणि जीवन जीण

³ हे मेरा दगड़्यों, पिता परमेस्वर न अपणी ताकत से हमतै उ सब कुछ दिनी, जु कि हमतै पवित्र जीवन जीणु खुणि जरुरी च। अर यू सब कुछ हमतै तब मिली जब हमुन यीशु मसीह तैं स्वीकार कैरी, जैन हमतै अपणा अदभुत आदर-सम्मान, अर अपणी महान अच्छे मा अपणा पास बुलै।

⁴ अर वे आदर-सम्मान अर वीं अच्छी भावना का मुताबिक ही वेन हमतै कीमती अर अच्छा दान-बरदान दियां छिन, ताकि ये बरदान का द्‍वारा हम दुनियां मा होण वळा गळत सम्बन्ध रखण से, अर गन्दा काम करण से बचि जा, अर पिता परमेस्वर का सभौ का जन चलि सैका।

⁵ इलै सुणा, कि तुम यों सब बातों मा बढण की पूरि कोसिस कैरा। याने कि तुम अपणा बिस्वास मा मजबूत, अर अपणा चाल-चलन मा अच्छा होन्दी जा, अर वेका दगड़ा-दगड़ि ज्ञान भि रखा,

⁶ अर वे ज्ञान से तुम खुद तैं वस मा रखिल्या, फिर खुद तैं वस मा रखण से सबर रखण जणिल्या, अर सबर रखण से भक्‍ति करण आली,

⁷ अर वेकी भक्‍ति करण मा भै-भयात च, अर तुम वीं भै-भयात मा अर वेका प्यार मा और भि जादा बढदी जा।

⁸ अर यू वु गुण छिन जौं की तुमतै भौत जरुरत च अर अगर जु यू तुमरा पास भरपूरी से होला, त यू गुण तुमतै हमरा प्रभु यीशु मसीह का ज्ञान मा काम करण वळु अर और भि जादा असरदार बणौन्दिन।

⁹ पर जैका पास यू सब गुण नि छिन य त वे मनखि तैं कम दिखेन्दु, य त उ अन्धु च। असल मा वु बिसरी गै कि उ अपणा पुरणा पापों से नहे के साफ ह्‍वे गै।

¹⁰ इलै हे मेरा भै-बैंणो, इन साबित करणु खुणि तुम लोग कड़ी मेनत कैरा, कि तुम सच्‍चि मा वीं इच्छा मदि छाँ, जौं तैं पिता परमेस्वर न बुलै के चुण्यालि। अर वु काम कैरा ज्यां से वु खुश होन्दु, अर अगर जु तुम इन करिल्या त तुम कै पाप अर इळजाम मा नि फसिल्यां।

¹¹ अर इन कैरिके तुम हमरा पिता परमेस्वर अर बचौण वळा यीशु मसीह का राज्य मा जै सकिल्या जु कि सदनि को च, अर यां को तुमतै पूरु अधिकार दिये जालु।

मुरण से पैलि पतरस की आखिरी सला

¹² हालांकि तुम यों सब बातों तैं जणदा ही छाँ, अर जु सच्‍चु वचन तुमतै मिल्यूं च, तुम वेमा मजबूत भि किये ग्यां, मगर फिर भि मि तुमतै यों सब बातों की याद दिलौणु छौं ताकि तुम हमेसा तयार रा।

¹³ अर जबरि तक मि ज्यून्दु छौं, तबरि तक मेरु यू फरज बणदु कि तुमतै याद दिलै-दिलै के मजबूत कनु रौंऽऽ अर या ही बात मितैं खूब लगदी।

¹⁴ किलैकि मि यों बातों तैं जणदु छौं कि अब ये सरील तैं छोड़ि के जाण को बगत नजदीक ऐ गै। अर यू सब त मि इलै बोन्‍नु छौं, किलैकि यू सब प्रभु यीशु मसीह न मि पर परगट कैरियाली।

¹⁵ अर मि इन कोसिस कनु छौं, कि जब मि ईं दुनियां तैं छोड़ि के चलि जौलु त तुम मेरा जाण का बाद भि यों सब बातों तैं याद कना रयां।

मसीह का आदर-सम्मान तैं दिखण वळा गवा

¹⁶ अर जब हमुन प्रभु यीशु मसीह की ताकत अर वेका वापस औण का बारा मा तुमतै शुभ समाचार सुणै, त हमुन तुमरा दगड़ा मा कुई चालाकी नि चलि। अर ना ही तुमतै झूठ्‍ठी शिक्षा सुणै के तुमरो कुई फैदा उठे, बल्किन मा हमुन त वेका सानदार आदर-सम्मान का बारा मा तुमतै बतै जु खुद हमुन अपणा आंख्यों न देखि छौ।

¹⁷ अर वे बगत हम उखि छा, जख पिता परमेस्वर न यीशु मसीह तैं सानदार आदर-सम्मान देई, अर वे खुणि स्वर्ग बटि इन आवाज ऐ, “यू मेरु लाडलु पुत्र च, अर येसे मि भौत खुश छौं।”

¹⁸ हाँ, हमुन आसमान बटि औण वळा ये शब्द का बारा मा खुद ही सुणी छौ, जब हम यीशु का दगड़ा मा पवित्र पाड़ पर छा।

¹⁹ अर इन कैरिके भविष्यबाणी का जु वचन हमरा पास छिन, ऊं पर भि छाप लगये गै। अर तुम ऊं वचनों पर अपणु मन लगै के अच्छु काम कना छाँ, किलैकि जब तक सुबेर नि होन्दी, तब तक सूरज नि निकळदु, अर यू वचन वे जळ्दा द्‍यू का जन च जु अन्धेरा मा चमकदु, याने कि जु आज तुमरा दिलों मा चमकणु च।

²⁰ अर सबसे पैलि बात या च, कि पवित्रशास्‍त्र कि हरेक भविष्यबाणी कै रैबर्या का अपणा ख्याल नि छिन।

²¹ किलैकि कुई भि भविष्यबाणी मनखि की मनसा का मुताबिक कभि भि नि होन्दी, बल्किन मा परमेस्वर का लोग पवित्र आत्मा का द्‍वारा परमेस्वर का वचनों तैं बुल्दिन।