2 यूहन्ना 1 - Garhwali

यूहन्‍ना को सलाम

¹ हे मेरी प्यारी बैंण, मि यूहन्‍ना जु की एक अध्यक्ष छौं, मि या चिठ्‍ठी त्वे खुणि अर तेरा बच्‍चों खुणि लिखणु छौ, तुम जु कि पिता परमेस्वर का द्‍वारा चुण्यां छा मि तुम से भौत प्यार करदु। अर केवल मि ही ना, बल्किन मा वु सब त्वेसे प्यार करदिन जु कि सच्‍चै तैं जणदिन।

² अर जीवन कि सच्‍चै हमरा दिल मा च, अर वा हमेसा खुणि हमरा दगड़ा मा राली।

³ अर पिता परमेस्वर अर वेका पुत्र यीशु मसीह की तरफा बटि, वेकी महान किरपा, दया अर वेकी शान्ति हमतै मिलदी रौ, अर यू सब हमतै वेका प्यार अर वेकी सच्‍चै से मिलु।

मसीह की आज्ञा को पालन करण

⁴ अर मितैं यू जाणि के भौत खुशी होन्दी कि तेरा कुछ बच्‍चा सच्‍चै का बाटा पर चलणा छिन, ठिक उन्‍नि जन कि हमतै पिता परमेस्वर की तरफा बटि आज्ञा मिली छै।

⁵ हे मेरी बैंण, अब मि त्वेतै कुई नई आज्ञा नि देणु, बल्किन मा मि त्वेतै वीं ही आज्ञा का बारा मा लिखणु छौं, ज्वा कि शुरुवात बटि हमतै मिली च, अर मि त्वेसे बिन्ती करदु कि हम एक-दुसरा का दगड़ा मा प्यार से रा।

⁶ अर प्यार को मतलब इन च कि हम परमेस्वर की आज्ञाओं को पालन कैरा। अर या वा ही आज्ञा च जिं का बारा तुमुन पैलि बटि सुणी छौ अर तुमतै वेका मुताबिक ही चलण चयेणु।

⁷ किलैकि ईं दुनियां मा भौत सा धोखा देण वळा लोग निकळि के ऐ गैनी। अर वु ईं बात तैं स्वीकार नि करदिन, कि यीशु मसीह एक मनखि का रुप मा ईं दुनियां मा ऐ। अर यू उई च जु कि धोखा देण वळु, अर यीशु मसीह को दुसमन च।

⁸ अर जै काम खुणि हमुन मेनत कैरी, कखि तुम वेतैं हरचै नि द्‍या, इलै अपणा जीवनों खुणि चेतन रा, ताकि तुमतै वेको इनाम मिली सैको।

⁹ अर जु मनखि यीशु मसीह की शिक्षा मा बणयूं नि रौन्दु, बल्किन मा वेतैं छोड़ि के दूर चलि जान्दु, त वेका पास परमेस्वर नि च। पर जु मनखि वेकी शिक्षा मा बणयूं रौन्दु, वेका पास पिता अर पुत्र दुई छिन।

¹⁰ अर अगर कुई मनखि तुमरा पास अऽ, अर इन्दरि शिक्षा तैं द्‍यो, त इन्द्रया मनखि तैं अपणा घौर मा नि औण द्‍या, इख तक की वेकू सलाम भि नि बोला।

¹¹ किलैकि जु कुई इन्द्रया मनखि कू सलाम बुल्दु, वु वेका बुरा कामों मा साझेदार ह्‍वे जान्दु।

आखिरी सलाम

¹² हालांकि, मिन भौत सि बात लिखण छै, मगर मि नि चान्दु कि सब कुछ स्याई से अब यों कागज्दों पर लिखु, बल्किन मा मितैं इन उम्मीद च कि मि तुमरा इख औंऽऽ। अर जब मि उख पौंछुलु, तब अमणि-समणि बात होलि, ताकि तुमरि खुशी पूरि ह्‍वे जौ।

¹³ हे मेरी प्यारी बैंण, तेरी चुणी बैंण का बच्‍चा त्वेकू सलाम बोन्‍ना छिन।