2 कुरिन्थि 9 - Garhwali

दगड़्या बिस्वासी लोगु खुणि मदद

¹ अर मि तुमतै वे दान का बारा मा लिखण चाणु छौं, जैकी तयारी तुम लोग दुसरा बिस्वासी लोगु की मदद खुणि कना छाँ। अर येका बारा मा मि तुम खुणि कुछ जादा लिखण जरुरी नि समझदु।

² किलैकि मि जणदु छौं, कि तुम मदद करण खुणि तयार छाँ। अर मि मकिदुनिया नगर का बिस्वासी भै-बैंणो तैं बड़ा मोन कैरिके बतौणु छौं, कि अखया मुलक का बिस्वासी लोग पिछलै एक साल बटि मदद करणु खुणि तयार बैठयां छिन। अर तुमरा ये जोस न ऊंका भितर खुशी पैदा कैरियाली।

³ अर अब वे दान खुणि मि तीतुस अर दगड़ा मा दुई और बिस्वासी भैयों तैं भेजणु छौं, ताकि जु बड़ु मोन हम तुमरा खातिर करद्‍यां वु बेकार नि हो। इलै मेरा दगड़्यों, जन मि बिस्वासी लोगु तैं बतौणु छौ वेका मुताबिक तुम लोग वे दान तैं देणु खुणि तयार रा।

⁴ अर अगर जु मकिदुनिया का बिस्वासी लोग मेरा दगड़ा मा आला, त मि इन नि चान्दु कि ऊ ऐके देखा कि जै दान कि बात किये जाणि छै, उ त जमा ही नि च। अर अगर जु इन होलु, त तब मितैं बड़ी बेजती मैसूस होण अर तुमतै भि अफ पर बड़ी सरम आली।

⁵ इलै मिन यू जरुरी समझि, कि पैलि मि तीतुस अर वेका दगड़ा मा दुई और भैयों तैं तुमरा पास भेजूँ, ताकि वु ऐके तुम बटि मिला। अर तुमरा दगड़ा मा मिली के वु दान तैं इकट्‍ठा करण मा तुमरि मदद कैरा, जैको करार तुमुन पैलि हमरा दगड़ा मा कैरी छौ। अर जब सब कुछ पैलि बटि तयार रालु, त हमरा पौंछण पर मेरा दगड़ा मा अयां बिस्वासी लोग दिखला कि तुमुन सच्‍चि मा मदद खुणि दान दियूं च, अर या खुणि कैन भि तुमतै मजबूर नि कैरी।

दिल खोली के दान द्‍या

⁶ हे मेरा भै-बैंणो, जु मनखि कम बुतदु वेतैं कम ही कटण पोड़लु, अर जैन भौत जादा बूति वेतैं जादा फसल कटण पोड़लि।

⁷ इलै जैन अपणा मन मा जथगा देण कि सोच्‍चि वु वेका मुताबिक ही दान द्‍यो। अर जब तुम ये काम तैं करिल्या त कुड़कुड़ा ना, अर ना ही जोर-जबरदस्ती मा ऐके इन कैरा। अर अगर जु तुम खुश ह्‍वेके यू दिल्या, त ईं बात तैं जाणि ल्या कि पिता परमेस्वर ऊं लोगु से भौत खुश होन्दु जु खुशी-खुशी से देन्दिन।

⁸ अर पिता परमेस्वर तुमतै हरेक चीज दे सकदु च ज्यां कि तुमतै जरुरत च। अर इन वु इलै करलु, ताकि तुम और भि जादा दिल खोली के दे सैका अर भलै का काम तुमरा द्‍वारा और भि जादा किये जा।

⁹ जन कि पवित्रशास्‍त्र मा भि लिख्यूं च कि, “प्रभु न गरीब लोगु तैं दिल खोली के देई, अर उ अपणा लोगु की भलै हमेसा कनु रालु।”

¹⁰ अर जन पिता परमेस्वर बुतण वळा किसानों तैं बीज अर खाणु खुणि रुट्‍टी देन्दु, ठिक उन्‍नि उ तुमतै भि हरेक चीज द्‍यालु अर इन उ हमेसा करलु, ताकि तुमरा पास सब कुछ हो अर तुम दुसरो की मदद कैरी सैका।

¹¹ अर पिता परमेस्वर तुमतै आसीस देके भरपूर कैरी द्‍यो, ताकि तुम दुसरो खुणि दाता बणि सैका। अर इन कैरिके तुमरा द्‍वारा दुसरा लोगु की मदद होलि, अर ये काम की वजै से वु लोग पिता परमेस्वर को धन्यवाद करला।

¹² हे मेरा भै-बैंणो, तुम ईं बात तैं याद रखा कि जौं बिस्वासी लोगु की मदद खुणि यू दान जमा किये जाणु च, वेका बदला मा वु लोग तुम खुणि अर तुमरा ये काम खुणि पिता परमेस्वर को धन्यवाद करला।

¹³ अर दुसरा लोगु की मदद खुणि जु दान तुम देणा छाँ वेकी वजै से बिस्वासी लोग पिता परमेस्वर की बडै करदिन, किलैकि इन कैरिके तुमुन यीशु मसीह का शुभ समाचार की बात तैं पूरु कैरी। अर ऊ ईं बात खुणि पिता परमेस्वर को धन्यवाद करला कि तुमुन दिल खोली के दिनी अर वां से दुसरा लोगु को भलु ही ह्‍वे।

¹⁴ अर वु तुम से भौत प्यार करदिन, इलै वु तुम खुणि प्रार्थना करला, अर इन वु इलै करला किलैकि वु जणदा छिन कि तुम पर पिता परमेस्वर की बड़ी किरपा होईं च।

¹⁵ अर हमरा प्रभु यीशु का खातिर पिता परमेस्वर को धन्यवाद हो, जैको बखान हम शब्दों मा नि कैरी सकद्‍यां।