2 कुरिन्थि 3 - Garhwali

नया कानून का सेवक

¹ हे मेरा भै-बैंणो, क्या हमतै एक बार फिर से अपणा बारा मा बतौण पोड़लु कि हम कु छां? अर क्या अब हमतै एक-दुसरा की सिपारिस खुणि चिठ्‍ठी लिखण पोड़लि, जन कि ईं दुनियां मा लोग करदिन।

² दगड़्यों, सभ्यों तैं पता च कि हम लोगु को तुमरा दगड़ा मा भौत गैरु नातु च, अर तुम लोग एक चिठ्‍ठी की तरौं छाँ, जौं तैं दुसरा लोगु का द्‍वारा पढै जान्दु। अर दुसरा लोग तुमतै देखि के समझि जनदिन कि हमुन बड़ी वफादारी से तुमतै क्या सिखै।

³ अर या बात सच्‍च च कि तुम लोगु का जीवन बदलि गैनी, इलै अब से तुम लोग यीशु मसीह की एक चिठ्‍ठी की तरौं छाँ जौं तैं हमरा द्‍वारा बंटे गै। अर तुमतै कै कलम या स्याई का द्‍वारा ढुंगो की पाटि पर नि लिखे गै, बल्किन मा तुमतै त पवित्र आत्मा का द्‍वारा लिखे गै जु कि तुमरा दिलों मा च।

⁴ अर यू दावा हम इलै करद्‍यां, किलैकि हमतै यीशु मसीह की वजै से पिता परमेस्वर पर पूरु यकीन च।

⁵ अर मि इन नि बोन्‍नु छौं कि यू सब कुछ हम अपणी ताकत से करद्‍यां, बल्किन मा यू त पिता परमेस्वर ही च जु की हमतै ताकत देन्दु कि हम यू काम कैरी सैका।

⁶ अर या बात सच्‍च च कि परमेस्वर न हमतै ये काबिल बणै, कि हम नया कानून का सेवक बणा। अर नयू कानून कै लिख्यां कानून का रुप मा ना, बल्किन मा पवित्र आत्मा का द्‍वारा पूरु होन्दु। किलैकि लिख्यां कानून का द्‍वारा मौत की सजा औन्दी, मगर पवित्र आत्मा का द्‍वारा हमतै सदनि को जीवन मिलदु।

⁷ अर मौत तैं लेके औण वळा कानून त ढुंगो की पाटि पर लिखे गै छा, जु कि परमेस्वर का दिब्य तेज का द्‍वारा हमरा पितर मूसा तैं दिये गैनी। अर वे बगत परमेस्वर का रैबर्या मूसा को मुख भि वेका तेज से चमकदु छौ, अर भले ही वा चमक जरा-जरा कैरिके खतम ह्‍वे गै मगर फिर भि इस्राएली लोग वीं चमक की वजै से पितर मूसा का मुख जनै देखि नि सकिनी।

⁸ हे मेरा भै-बैंणो, त अब इन सोचा कि पवित्र आत्मा का द्‍वारा मिलण वळा कानून की दिब्य चमक कथगा जादा होलि?

⁹ अर अगर दोषी ठैराण वळु कानून इथगा चमकदार ह्‍वे सकदु, त फिर वे करार का द्‍वारा मनखि का जीवन मा कथगा चमक ह्‍वेलि, जु कि मनखि तैं पिता परमेस्वर की नजर मा धरमी ठैरान्दु।

¹⁰ अर एक बगत वु छौ जब पितर मूसा का मुख तैं चमकदार किये गै, अर एक बगत वु भि छौ जब वा चमक वेसे वापस लिये गै। त हे मेरा भै-बैंणो, जरा सोचा ज्वा चमक औण वळा बगत मा मिलण वळी च वा कथगा जादा चमकदार होलि?

¹¹ अर जन पितर मूसा का मुख बटि वा चमक बाद मा गैब ह्‍वे गै, ठिक उन्‍नि जु रैबार वेन देई उ भि जादा बगत तक टिक्यूं नि रै। मगर जब परमेस्वर न अपणा लोगु तैं पवित्र आत्मा को दान देई, त जु काम पवित्र आत्मा ऊंका जीवनों मा कनु च वु हमेसा तक रौण वळु च।

¹² अर जब हमरा पास इन्दरि आस च, त इलै ही हम बड़ी हिम्मत से बुल्द्‍यां।

¹³ हम पितर मूसा का जन नि छां, जैन अपणी मुखडी मा परदा डालि दिनी, ताकि इस्राएली लोग वीं चमक तैं नि देखा ज्वा कि जरा-जरा कैरिके जाण लगि गै छै।

¹⁴ मगर अभि भि ऊं लोगु का दिमाग सुनपट पोड़यां छिन, किलैकि ऊ परमेस्वर की मनसा तैं स्वीकार नि करण चनदिन। अर जब ऊ पुरणा कानून तैं पढदिन, त आज भि ऊंका बिंगण मा यू नि औन्दु कि परदा किलै डळै गै होलु। मगर यू सब ऊंका बिंगण मा तब औण जब वु यीशु मसीह पर बिस्वास करला।

¹⁵ अर आज का दिन तक जब भि ऊ मूसा रैबर्या की किताब तैं पढदिन, त ऊंका बिंगण मा नि औन्दु किलैकि ऊंका दिमाग सुनपट पोड़यां छिन।

¹⁶ अर यू परदा तब हटयै जालु जब कुई प्रभु यीशु का पास आलु।

¹⁷ अर प्रभु त आत्मा च, अर जख कखि प्रभु को पवित्र आत्मा च उख आजादी च।

¹⁸ अर पिता परमेस्वर न हमरा मुख बटि वु परदा हटैयली, अर अब हम इन देखि सकद्‍यां कि हमरु प्रभु कथगा महान च। अर हम पवित्र आत्मा का द्‍वारा लगातार प्रभु यीशु मसीह कि तरौं बणदी जां, ताकि लोग भि जाणि सैका कि हमरु प्रभु कथगा महान च। अर यू सब काम हमरा प्रभु यीशु मसीह को पवित्र आत्मा करदु।