2 कुरिन्थि 13 - Garhwali

आखिरी सला

¹ हे मेरा भै-बैंणो, अब मि तिसरी दौं तुम से मिलण वळु छौं। अर जन कि पवित्रशास्‍त्र मा लिख्यूं भि च कि, “कै भि इळजाम की सच्‍चै दुई या तीन गवाओ का द्‍वारा ही साबित की जौ।”

² अर अभि त मि तुम से दूर छौं पर तुमतै याद होलु, जब मि तुमरा पास दुसरि दौं ऐ छौ त मिन ऊं लोगु तैं चितै छौ कि वु पाप नि कर्यां, अर अब तुम लोगु जु कि वे बगत ऊंमा सामिल नि छा मि तुमतै भि चितै देन्दु, कि जब मि तिसरी दौं तुमरा पास औलु, त वे पाप करण से क्या सजा मिलदी मि तुमतै बतौलु।

³ अर तुम लोग सबूत मंगद्‍यां, कि यीशु मसीह मेरा द्‍वारा बुल्दु भि च कि ना, मगर मि तुमतै बतै देन्दु कि जब उ तुमरा बीच मा काम करदु त अपणी कमजोरी से ना बल्किन मा अपणी ताकत से करदु।

⁴ अर या बात सच्‍च च कि जब यीशु मसीह तैं क्रूस पर चड़ये गै, त उ कमजोर लगणु छौ। मगर या बात भि सच्‍च च कि पिता परमेस्वर न वेतैं अपणी महान ताकत से मुरदो मा बटि ज्यून्द कैरी, अर अब वु सदनि खुणि ज्यून्द च। अर ठिक उन्‍नि हम भि कमजोर मनखि छां, मगर हमरु रिश्ता यीशु मसीह का दगड़ा मा भौत गैरु च, इलै तुमतै अनुसासन मा लौणु खुणि मि पिता परमेस्वर की ताकत को इस्तेमाल करलु।

⁵ इलै हे मेरा दगड़्यों, अपणी-अपणी जाँच-पड़ताल कैरा कि तुम बिस्वास मा छैं भि छाँ कि ना, अर आज तुम क्या छाँ वांको सबूत द्‍या। क्या तुमतै इन पता नि च कि यीशु मसीह तुमरा दगड़ा मा एक ह्‍वेके रौन्दु? अर अगर वु तुम मा नि च, त येको मतलब यू च कि तुम मा खोट च।

⁶ अर जख तक हमरि बात च, त तुम या बात जाणि जैल्या कि हम मसीह का छां, अर हम मा कुई खोट नि च।

⁷ अर मि पिता परमेस्वर से इन प्रार्थना करदु, कि तुम कुछ भि बुरै नि कैरा। अर तुम वु काम कैरा जु की भलै का छिन, अब चै हम लोगु की नजर मा खोटा ही किलै नि दिख्यां।

⁸ अर हम सच्‍चै का खिलाप मा कुछ नि करद्‍यां, अर हम जु कुछ भि करद्‍यां वु सब कुछ सच्‍चै खुणि ही च।

⁹ अर भले ही हम कमजोर छां मगर हमतै खुशी च कि तुम बिस्वास मा मजबूत छाँ। अर हम पिता परमेस्वर बटि इन्‍नि प्रार्थना करद्‍यां, कि तुम और भि जादा मजबूत होन्दी जा।

¹⁰ अर यू सब कुछ मि तुम खुणि इलै लिखणु छौं, किलैकि अभि मि तुम से दूर छौं, अर जब मि तुमरा पास औलु त कखि मितैं अपणा अधिकार को इस्तेमाल सख्‍तै से नि करण पोड़ो। अर हमरा प्रभु यीशु न मितैं यू अधिकार दियूं च कि मि तुम खुणि बिस्वास मा आसीस की वजा बणु, ना कि उतेडु़ को।

आसिरबाद

¹¹ हे मेरा भै-बैंणो, अब मि आखिरी मा तुमकु इन बोन्‍न चान्दु कि तुम खुश रा, अर अपणा-अपणा चाल-चलन मा हरेक दिन सुधार ला, अर जु-जु काम करणु कू मिन तुमकु बोलि ऊंतैं पूरु कैरा। अर एक-दुसरे की बात तैं स्वीकार कैरा अर एकजुट ह्‍वेके रा, अर एक-दुसरा का दगड़ा मा शान्ति से रा। अर पिता परमेस्वर तुमतै एक-दुसरा का दगड़ा प्यार करण मा, अर शान्ति से जीवन जीण मा पूरि मदद करलु।

¹² अर पवित्र दिल से एक-दुसरे की भूकि पिके सलाम बोला।

¹³ अर सब पवित्र लोग तुमकु बड़ा प्यार से सलाम बोन्‍ना छिन।

¹⁴ अर मि तुम सभ्यों खुणि इन प्रार्थना करदु, कि प्रभु यीशु मसीह की महान किरपा अर परमेस्वर को प्यार अर वेकी पवित्र आत्मा को साथ तुम सभ्यों का दगड़ा मा रौ। आमीन।