2 कुरिन्थि 1 - Garhwali

पौलुस की दुसरि चिठ्‍ठी

¹ हे मेरा भै-बैंणो, मि पौलुस पिता परमेस्वर की मनसा से यीशु मसीह को खास चेला होणु खुणि बुलये ग्यों। अर मि या चिठ्‍ठी हमरा बिस्वासी भै तीमुथियुस का दगड़ा मा कुरिन्थि नगर का लोगु खुणि लिखणु छौं, हाँ तुम खुणि ही तुम जु कि परमेस्वर का समुदाय छाँ। अर या चिठ्‍ठी ऊं सब पवित्र मनखियों खुणि भि च जु कि पूरा अखया मुलक मा छिन।

² तुमतै हमरा पिता परमेस्वर की तरफा बटि, अर प्रभु यीशु मसीह की तरफा बटि वेकी किरपा अर शान्ति मिलु।

परमेस्वर को धन्यवाद करण

³ हमतै हमरा प्रभु यीशु मसीह का पिता परमेस्वर की तारीफ करण चयेणी, किलैकि उ हमेसा हम पर दया करदु, अर हमरि मदद करदु। अर हर बात मा दिलासा देण वळु परमेस्वर च।

⁴ अर जब दुख-तकलीफ हमरा जीवन मा औन्दिन, त प्रभु हमतै दिलासा देन्दु। अर इन उ इलै करदु, ताकि हम भि ऊंतैं दिलासा दे सैका जु लोग दुख-तकलीफो मा छिन।

⁵ किलैकि यीशु मसीह की सेवा करण की वजै से जु दुख-तकलीफ हमतै झिलण पोड़दिन, यीशु मसीह वेका बदला मा हमतै और भि जादा दिलासा देन्दु।

⁶ इलै जब हम दुख-तकलीफ उठौन्द्‍यां, तब वां से हम इन सिखद्‍यां कि हमुन तुमतै कनकै दिलासा देण। अर जब हमतै आराम मिलदु, त हम यू सिखद्‍यां कि तुमतै भि आराम मिलु। अर इनकै तुम सबर रखी के ऊं दुख-तकलीफो तैं चुपचाप से स्वीकार करद्‍यां त यां से इन पता चलदु, कि तुम लोग भि हम जन बिस्वास मा मजबूत होण लगि ग्यां।

⁷ अर तुमरा बारा मा हमरि आस अटल च किलैकि हम जणदा छां कि तुम भि हमरि तरौं दुख-तकलीफ झिलणा छाँ, अर इन यकीन करद्‍यां कि पिता परमेस्वर ठिक उन्‍नि दिलासा तुमतै भि द्‍यालु जन उ हमतै देन्दु।

⁸ हे मेरा भै-बैंणो, हम इन चन्द्‍यां कि तुम ईं बात से अणजाण नि रा, कि हमुन आसिया मुलक मा कन-कन दुख-तकलीफ झिलनी। हाँ, हमुन इथगा दुख-तकलीफ झिलनी कि ऊंतैं सौण हमरि ताकत से भैर छौ, इख तक कि हमुन उम्मीद भि छोड़याली छै, कि अब हम ज्यून्दा भि रौला कि ना।

⁹ अर हम अपणा-अपणा मनों मा इन समझण लगि गै छा कि अब हमुन मोरि जाण, अर यू सब त वे बगत इलै ह्‍वे ताकि हम अपणी ताकत पर बड़ु मोन नि कैरा। अर यू सब त पिता परमेस्वर कि मनसा का मुताबिक ह्‍वे, किलैकि उ चान्दु छौ कि हम वे पर भरोसा रखा जु कि मुरदो तैं ज्यून्द करदु।

¹⁰ अर पिता परमेस्वर ही च जु कि हमतै मौत का बड़ा संकट से बचौन्दु, अर अगनै भि बचालु, किलैकि हम वे पर बिस्वास करद्‍यां अर उ हमतै औण वळा बगत मा भि बचालु।

¹¹ अर हम तुम पर भि भरोसा करद्‍यां, किलैकि तुम लोग हम खुणि प्रार्थना करद्‍यां, किलैकि पिता परमेस्वर प्रार्थनाओं को जबाब देन्दु अर हमतै संकट से बचौन्दु। तब भौत सा लोग हमरा खातिर परमेस्वर को धन्यवाद द्‍याला।

पौलुस की यात्रा की योजना मा बदलाव

¹² अर हमतै ईं बात पर गर्व च अर हमरु जमीर भि ईं बात की गवै देन्दु, कि ईं दुनियां मा खास कैरिके तुमरा बीच मा हमरु सभौ पिता परमेस्वर का लैख पवित्र अर सच्‍चु छौ। अर यू सब हमुन ईं दुनियां से मिलण वळा ज्ञान का मुताबिक नि कैरी, बल्किन मा पिता परमेस्वर की किरपा पर भरोसा रखी के कैरी।

¹³ अर जु चिठ्‍ठी मिन तुम खुणि लिखिनी ऊंमा मिन साफ-साफ लिखी, ताकि जब तुम ऊंतैं पैढा त तुम मेरी बात तैं आसानी से समझि सैका।

¹⁴ अर मितैं इन भि यकीन च कि तुम लोग मेरा बारा मा थुड़ा भौत जाणि ग्यां, अर पूरि तरौं से जाणि के बड़ु मोन करिल्या। अर जब हमरु प्रभु यीशु मसीह वापस आलु, त वे दिन पर हम तुमतै देखि के बड़ु मोन कैरी सकद्‍यां।

¹⁵ अर मितैं ईं बात को पूरु यकीन छौ, इलै मिन पैलि तुमरा पास औण कि सोची, ताकि पिता परमेस्वर बटि तुमतै कुई ना कुई आसिरबाद मिली सैको।

¹⁶ अर मिन इन योजना बणईं छै कि मकिदुनिया मुलक जान्द दौं मि तुमरा पास से ह्‍वेके जौं। अर उख बटि यहूदिया मुलक कू जाण दौं भि मि तुमरा पास ह्‍वेके जौं, अर जब मि यहूदिया मुलक कू जाणु रौलु त तुम लोग मेरी मदद कर्यां, मगर मेरी या योजना सफल नि ह्‍वे सैकी।

¹⁷ अर तुमतै क्या लगदु कि मिन या योजना बेमतलब मा बणै छै? अर तुमतै क्या लगदु कि जन दुनियां का लोग योजना बणौन्दिन क्या मि भि उन्‍नि बणौन्दु। अरे, मि इन नि करदु कि उबरि बोला, “हाँ, हाँ इन करण ठिक रालु,” अर उबरि बोला, “ना, ना इन करण ठिक नि च।”

¹⁸ अर जन परमेस्वर पर बिस्वास किये जै सकदु, ठिक उन्‍नि तुम लोग हम पर भि बिस्वास कैरी सकद्‍यां, किलैकि जब हम “हाँ” बुल्द्‍यां, त वेको मतलब हाँ ही होन्दु, अर जब हम “ना” बुल्द्‍यां त वेको मतलब ना ही होन्दु।

¹⁹ किलैकि पिता परमेस्वर को पुत्र यीशु मसीह जैको परचार सिलवानुस, तीमुथियुस अर मिन तुमरा बीच मा कैरी, वेमा पैलि “हाँ” अर फिर “ना” नि ह्‍वे, बल्किन मा वेमा “हाँ” को मतलब हमेसा “हाँ” ही ह्‍वे।

²⁰ किलैकि पिता परमेस्वर का जथगा भि करार छिन ऊ सब यीशु का द्‍वारा “हाँ” मा ही पूरा होनदिन। इलै ही हम यीशु मसीह का नौ का द्‍वारा पिता परमेस्वर की तारीफ खुणि “आमीन” बुल्द्‍यां अर यां से परमेस्वर की बडै होन्दी।

²¹ अर ईं बात तैं हमेसा याद रखा, कि पिता परमेस्वर उ च जु कि तुमतै अर हमतै यीशु मसीह का द्‍वारा हरेक बात मा मजबूत करदु। अर पिता परमेस्वर ही च जैन हमतै बुलै अर अपणी सेवा खुणि ठैरै।

²² अर वेन इन दिखौणु खुणि कि हम वेका छां, अपणा पवित्र आत्मा का दान तैं बयना का रुप मा हमरा मनों मा देई, ताकि इन साबित हो कि वेको करार जरुर पूरु होलु।

²³ अर मि तुमतै बतै देन्दु कि मि तुमरा पास कुरिन्थि नगर मा इलै नि औंऽऽ, ताकि तुम मेरी फटकार से बचि जा, अर या बात सच्‍च च अर यां को गवा पिता परमेस्वर च।

²⁴ अर हम लोगु को मतलब यू नि च कि हम ही तुमरा मालिक छां, अरे हम त केवल तुमरा आनन्द मा साझी छां अर हमरि पूरि कोसिस च कि तुम यीशु मसीह पर अपणु पूरु बिस्वास बणै के रखा।