1 तीमुथियुस 3 - Garhwali

समुदाय का मुख्य अध्यक्ष

¹ अर या बात सच्‍च च अर पूरि तरौं से मनण लैख च, कि अगर कुई बिस्वासी समुदाय को अध्यक्ष बणण चान्दु, त उ अच्छा काम करण की इच्छा भि रखदु।

² इलै एक अध्यक्ष इन जीवन ज्यो कि कुई भि वे पर दोष नि लगै सैको, अर वेकी एक ही घरवळी हो अर उ अपणा सरील तैं अपणा काबू मा रखण वळो हो, अर उ लोगु का दगड़ा मा अच्छु बरतौ कैरो। अर लोग वेको आदर-सम्मान कैरा, अर उ एक अच्छु जीवन ज्यो, अर उ मैमानदारी निभौण मा भि खूब हो, अर अच्छी शिक्षा देण वळो भि हो।

³ अर उ सराबी ना हो, अर ना ही मार-पीट करण वळु, पर वेतैं शान्त सभौ को होण चयेणु, अर नऽ त उ झगड़ा करण वळु हो, अर ना ही धन को लालच करण वळु।

⁴ अर उ अपणा घौर परिवार को पालन-पोसण ढंगल करदु हो, अर अपणा बाल-बच्‍चों तैं अपणा अनुसासन मा रखदु हो। अर वेका बच्‍चा वेको पूरु आदर-सम्मान करदा हो।

⁵ अगर कुई अपणा घौर को पालन-पोसण करण ही नि जणदु हो, त उ परमेस्वर का लोगु की देख-रेख कनकै करलु?

⁶ अर उ अध्यक्ष एक नयू बिस्वासी मनखि ना हो, निथर उ भौत बड़ु मोन करलु अर जन दण्ड शैतान तैं मिलण उन्‍नि वेतैं भि मिललु।

⁷ अर बिस्वास नि करण वळा लोगु मा भि वेको नौ हो, निथर वु लोग वेकी बेजती करला अर उ शैतान का जाल मा फंसी जालु।

⁸ अर उन्‍नि बिस्वासी समुदाय की सेवा मा मदद करण वळा सेवकों तैं इन होण चयेणु जौं को लोग आदर-सम्मान कैरा। अर वु दुई किसमे की बात करण वळु अर ना ही दरोळया, अर ना ही बुरा कामों बटि धन-दौलत कमाण की इच्छा रखण वळा हो।

⁹ पर बिस्वास का बारा मा जु सच्‍चु रैबार परमेस्वर न दिखै वेतैं अच्छा मन से अपणा जीवन मा रखण चयेणु।

¹⁰ अर बिस्वासी समुदाय की सेवा मा मदद करण वळा बणण से पैलि ऊंतैं परखै जौ, अगर ऊंका खिलाप कुई दोष नि लगलु, त उ समुदाय की सेवा मा मदद करण वळा बणि सकदिन।

¹¹ अर उन्‍नि बिस्वासी समुदाय की सेवा मा मदद करण वळो की जनानियां भि इन अच्छु जीवन बिता, ज्यां से की लोग ऊंको आदर-सम्मान कैरा। अर ऊ कै पर दोष लगौण वळी नि हो बल्किन शान्त सभौ की अर सब बातों मा बिस्वासयोग्य हो।

¹² अर वे सेवक की एक ही घरवळी होण चयेणी, अर उ अपणा बाल-बच्‍चों अर घौर को एक अच्छु इंतजाम करण वळु हो।

¹³ किलैकि अगर एक सेवक बिस्वासी समुदाय मा अच्छी सेवा करदु त वेतैं आदर-सम्मान मिललु, अर जु बिस्वास वेन प्रभु यीशु मसीह पर कैरी, वेका बारा मा और लोगु तैं बतौण मा वेतैं हिम्मत मिलदी।

बिस्वास को महान राज

¹⁴ मि त तेरा पास जल्दी औण चान्दु, पर फिर भि मि या चिठ्‍ठी लिखणु छौं।

¹⁵ किलैकि अगर जु मेरा औण मा देर ह्‍वे जालि त त्वेतै इन पता होण चयेणु, कि परमेस्वर का परिवार मा एक मनखि तैं कनकै रौण चयेणु। किलैकि यू त ज्यून्दा परमेस्वर को बिस्वासी समुदाय च अर यू बिस्वासी लोग शुभ समाचार की सच्‍चै को एक खम्बा अर बुनियाद का जन छिन।

¹⁶ हम जु बिस्वास करद्‍यां वेकी सच्‍चै भौत गम्भीर च अर ईं बात मा कुई भि सक नि च। किलैकि या बात सच्‍च च कि, यीशु मसीह न मनखि का रुप मा जनम ले, अर उ पवित्र आत्मा का द्‍वारा धरमी ठैरै गै, अर स्वर्गदूतों तैं दिखै, अर हर जगा वेको परचार किये गै। तब ईं दुनियां का लोगु न वे पर बिस्वास कैरी, अर बड़ा आदर-सम्मान का दगड़ा मा उ स्वर्ग मा उठये गै।