1 थिस्सलुनीकी 1 - Garhwali

पौलुस की चिठ्‍ठी

¹ हे मेरा भै-बैंणो मि पौलुस छौं, अर मि सिलवानुस अर तीमुथियुस का दगड़ा मा या चिठ्‍ठी लिखणु छौं। अर या चिठ्‍ठी थिस्सलुनीकी नगर मा रौण वळा बिस्वासी समुदाय का लोगु खुणि च, जु की पिता परमेस्वर अर प्रभु यीशु मसीह का लोग छिन। अर हम प्रार्थना करद्‍यां कि, तुम सभ्यों पर परमेस्वर की किरपा अर शान्ति बणि रौ।

पौलुस परमेस्वर को धन्यवाद देन्दु

² दगड़्यों, हम अपणी प्रार्थनाओं मा तुमतै हमेसा याद रखद्‍यां, अर तुम सभ्यों का खातिर पिता परमेस्वर को धन्यवाद हमेसा करद्‍यां।

³ किलैकि पिता परमेस्वर पर बिस्वास रखी के जु-जु काम तुमुन करिनी, वु सब हम अपणी प्रार्थनाओं मा याद रखद्‍यां। अर जै प्यार का दगड़ा मा तुमुन मेनत कैरी, अर सबर रखी के तुमुन प्रभु यीशु मसीह पर अपणी ज्वा आस रखी च, वु सब भि हम याद करद्‍यां।

⁴ इलै हे मेरा भै-बैंणो, हम जणदा छां कि परमेस्वर तुम बटि प्यार करदु, अर तुम लोगु तैं वेन चुण्यालि,

⁵ किलैकि हमुन तुमतै जु शुभ समाचार सुणै वु सब केवल बुलण वळी बात ही नि छै, बल्किन मा वु सामर्थ का काम तुमरा बीच मा भि ह्‍वे छिन। अर वु सब काम पवित्र आत्मा का छा, अर पवित्र आत्मा न ही यां को परमाण दिनी कि यू शुभ समाचार सच्‍चु च। अर तुम खुद ही जणद्‍यां, कि तुमरि मदद का खातिर हमरु व्यौहार तुमरा बीच मा कन्द्रयो छौ।

⁶ अर भौत दुख-तकलीफ सौण का बगत मा भि तुमुन पवित्र आत्मा का द्‍वारा मिलण वळी खुशी से प्रभु का वचन तैं स्वीकार कैरी। अर अब ठिक इन्‍नि तुमरो जीवन भि हमरा अर प्रभु यीशु का चाल चलण का जन ह्‍वे गै।

⁷ अर तुम लोगु न इन कैरी, इलै अखया मुलक का सब बिस्वासी लोगु मा, अर ठिक उन्‍नि मकिदुनिया मुलक का दुसरा हिस्सा का लोगु खुणि भि तुम लोग एक नमूना बणि ग्यां।

⁸ अर इन ह्‍वे, कि तुमरा इख बटि प्रभु का वचन की चर्चा ना केवल मकिदुनिया अर अखया का मुलक मा फैली, बल्किन मा सब जगा का लोगु तैं इन भि पता चलि गै कि तुमरो परमेस्वर पर कथगा बिस्वास च। इलै हमतै कुछ भि बोन्‍ने की जरुरत नि च।

⁹ किलैकि वु सब लोग ईं बात तैं खुद ही बतौन्दिन, कि जब हम तुमरा इख ऐ छा, त तुमुन हमरु कथगा अच्छु तरीके से स्वागत कैरी छौ। अर इन भि कि कनकै तुमुन मूरत की भक्‍ति करण छोड़ि दिनी, अर ज्यून्दा अर सच्‍चा परमेस्वर की भक्‍ति करण लगि ग्यां।

¹⁰ अर वु इन भि बतौन्दिन, कि तुम परमेस्वर का पुत्र को इंतजार बड़ी आस लगै के कना छां, जु की स्वर्ग बटि औण वळु च याने कि यीशु, जैतैं परमेस्वर न मुरदो मा बटि ज्यून्दु कैरी, अर उई न्याय का दिन पर हमतै औण वळा परकोप से बचालु।