1 यूहन्ना 4 - Garhwali

सच्‍च अर गळत की पछ्याण

¹ हे मेरा प्यारा भै-बैंणो, हरेक आत्मा पर बिस्वास नि कैरा बल्किन मा हरेक आत्मा तैं परखा कि वा पिता परमेस्वर की तरफा बटि छैई च कि नि च, किलैकि भौत सा झूठ्‍ठा रैबर्या ईं दुनियां मा फैली गैनी।

² अर तुमतै पिता परमेस्वर का पवित्र आत्मा का बारा मा इनकै पता चलण? कि ज्वा आत्मा इन स्वीकार कैरी देन्दु कि यीशु मसीह ईं दुनियां मा एक मनखि का रुप मा ऐ, त समझि जा कि वा आत्मा पिता परमेस्वर कि तरफा बटि च।

³ मगर जु आत्मा यीशु तैं नि मणदु, त ईं बात तैं जाणि ल्या कि इन्द्रयो आत्मा पिता परमेस्वर की तरफा बटि नि च। अर इन्द्रयो मनखि वे आत्मा का कब्जा मा च, जैका बारा मा तुमुन सुणी छौ कि उ औण वळु च, बल्किन मा उ त ईं दुनियां मा च। हे मेरा दगड़्यों, यू उई च जु कि यीशु मसीह को दुसमन च।

⁴ हे मेरा प्यारा बच्‍चों, तुम परमेस्वर का छाँ, अर तुम लोगु न यीशु मसीह को विरोध करण वळा लोगु पर जीत हासिल कैरियाली, किलैकि जु पवित्र आत्मा तुम लोगु मा च उ वे शैतान से जादा ताकतबर च जु कि ईं दुनियां मा च।

⁵ इन्द्रया झूठ्‍ठा लोग दुनियां की बातों का बारा मा ही बतौन्दिन, अर दुनियां का लोग ऊंकी सब बातों तैं मणदिन, किलैकि वु लोग ईं दुनियां का छिन।

⁶ मगर हम परमेस्वर का छां, अर जु परमेस्वर तैं जणदु उ हमरि बातों तैं मणदु। अर जु मनखि परमेस्वर तैं नि जणदु, उ हमरि बात तैं भि नि मणदु। अर इनकै हम लोग सच्‍चै का आत्मा तैं, अर वे भरमौण वळा आत्मा तैं पछ्याण सकद्‍यां।

परमेस्वर प्यार च

⁷ हे मेरा प्यारा भै-बैंणो हम सभ्यों तैं एक-दुसरा बटि प्यार करण चयेणु, किलैकि प्यार परमेस्वर की तरफा बटि च। अर हरेक उ मनखि जु एक-दुसरा बटि प्यार करदु, उ परमेस्वर की औलाद च, अर पिता परमेस्वर तैं जणदु च।

⁸ पर जु मनखि एक-दुसरा तैं प्यार नि करदु, उ पिता परमेस्वर तैं नि जणदु किलैकि परमेस्वर प्यार च।

⁹ अर जु प्यार परमेस्वर हम बटि करदु, उ वेन हम पर कुछ इनकै दिखै कि वेन अपणा इकलौता पुत्र यीशु मसीह तैं हम खुणि ईं दुनियां मा भेजि, ताकि हम वेका द्‍वारा सदनि को जीवन पा।

¹⁰ अर हमुन पिता परमेस्वर से प्यार नि कैरी, पर सच्‍चु प्यार त इन च कि वेन हम से प्यार कैरी। अर हमरा पापों बटि माफी देणु खुणि अपणा पुत्र तैं भेजि।

¹¹ हे मेरा प्यारा भै-बैंणो, जब पिता परमेस्वर हम लोगु से इथगा जादा प्यार कैरी सकदु च, त हम लोगु तैं भि एक-दुसरा से प्यार करण चयेणु।

¹² अर कैन भि परमेस्वर तैं कभि नि देखि, पर अगर जु हम एक-दुसरा से प्यार करद्‍यां, त पिता परमेस्वर हम मा वास करदु, अर वेको प्यार हम मा सिद्ध ह्‍वे जान्दु।

¹³ अर यां से हमतै इन पता चलदु, कि हम पिता परमेस्वर का दगड़ा मा बणयां छां, अर उ हमरा दगड़ा मा बणयूं च, किलैकि वेन हमतै अपणु पवित्र आत्मा दियूं च।

¹⁴ अर पिता परमेस्वर न अपणा पुत्र यीशु मसीह तैं ईं दुनियां मा भेजि। अर हमुन वेतैं देखि, इलै ही हम लोगु का बीच मा इन गवै देन्द्‍यां कि यीशु ही बचौण वळु च।

¹⁵ अर जु कुई इन स्वीकार कैरी देन्दु, कि यीशु मसीह परमेस्वर को पुत्र च, त परमेस्वर वेमा वास करदु अर उ परमेस्वर का दगड़ा मा वास करदु।

¹⁶ इलै अब हम परमेस्वर का प्यार तैं जाणि ग्यां अर वे पर बिस्वास करद्‍यां, किलैकि परमेस्वर प्यार च। अर जु कुई वेका प्यार मा बणयूं रौन्दु, त उ परमेस्वर का दगड़ा मा अर परमेस्वर वेका दगड़ा मा बणयूं रौन्दु।

¹⁷ अर यां से ही प्यार हम मा सिद्ध ह्‍वे ताकि न्याय का दिन पर हमतै हिम्मत मिलु, किलैकि जन यीशु च ठिक उन्‍नि हम भि ईं दुनियां मा छाँ।

¹⁸ अर प्यार मा कुई डौऽर नि होन्दी, पर सच्‍चु प्यार डौऽर तैं निकाळि देन्दु। किलैकि डौऽर को रिश्ता त दण्ड का दगड़ा मा च, अर जु डऽरदु च यां को मतलब यू च कि वेमा प्यार सिद्ध नि ह्‍वे।

¹⁹ अर हम लोग इलै प्यार करद्‍यां, किलैकि पैलि परमेस्वर न हम से प्यार कैरी।

²⁰ अर अगर कुई इन बुल्दु कि, “मि परमेस्वर से प्यार करदु,” मगर दुसरा लोगु से उ नफरत करदु हो, त ईं बात तैं जाणि ल्या कि इन्द्रयो मनखि झूठ्‍ठों च। किलैकि जौं लोगु तैं वेन अपणा समणि देखि, ऊं से उ प्यार नि कैरी सकणु च। अर जै परमेस्वर तैं वेन कभि नि देखि, त वेसे उ कनकै प्यार कैरी सकलु।

²¹ इलै हमतै यीशु मसीह का द्‍वारा इन आज्ञा मिली च कि जु मनखि परमेस्वर से प्यार करदु, वेतैं सब लोगु बटि प्यार करण चयेणु।