1 कुरिन्थि 3 - Garhwali

परमेस्वर खुणि बिस्वासी लोगु को मिली-जुली के काम करण

¹ हे मेरा भै-बैंणो, जब मि तुमरा इख छौ, त मिन तुमतै यीशु मसीह की सच्‍चि शिक्षा का बारा मा वे तरीके से नि बतै जन मि ऊंतैं बतौन्दु, जु लोग बिस्वास मा मजबूत छिन अर जौं का पास पवित्र आत्मा को दान च। मगर मिन देखि कि तुम लोग अभि भि दुनियां की बातों पर ही चलद्‍यां, इलै मि तुमतै बच्‍चों का जन बिंगौन्दु।

² इलै मिन तुमतै बड़ु का जन अन्‍न नि खिलै, बल्किन मा बच्‍चों का जन दूद पिलै, किलैकि उबरि तुम वीं शिक्षा तैं पचै नि सकदा छा अर ना ही तुम अभि भि पचै सकद्‍यां।

³ किलैकि तुम अभि भि दुनियां की बातों का मुताबिक ही चलद्‍यां। अर या बात मि इलै बोन्‍नु छौं, किलैकि तुम लोग एक-दुसरा तैं देखि के खार खन्द्‍यां अर तुमरा बीच मा झगड़ा भि होनदिन। त अब तुम मितैं इन बता क्या फिर तुम दुनियां का लोगु का जन नि छाँ? अरे, तुम त ऊंका जन ही चाल चलणा छाँ।

⁴ अर जब तुम अपणा बीच मा इन बुल्द्‍यां कि, “मि पौलुस को छौं,” अर दुसरो बुल्दु कि, “मि अपुल्‍लोस को छौं” इन बोलि के त तुम एक-दुसरा का खिलाप मा छाँ, अरे तुम त ऊं लोगु का जन छाँ जु बिस्वास नि करदिन।

⁵ अर तुमरो यू पौलुस अर अपुल्‍लोस क्या च लगायूं? अरे, हम त सिरफ यीशु मसीह का सेवक छां। अर हमरि बातों तैं सुणी के तुमुन यीशु मसीह पर बिस्वास कैरी, अर हम दुईयों न त सिरफ उई काम कैरी जु कि परमेस्वर न हमतै देई।

⁶ मिन सिरफ सच्‍चि शिक्षा की पौद लगै, त अपुल्‍लोस न वीं पौद की देख-रेख कैरी, मगर परमेस्वर ही च जु कि वीं पौद तैं बढौन्दु,

⁷ इलै जैन पौद लगै या जैन वेकी देख-रेख कैरी वु कुछ खास नि छिन, मगर पिता परमेस्वर ही सब कुछ च, जु कि वेतैं बढौन्दु।

⁸ पौद लगौण वळु अर देख-रेख करण वळु दुईया का दुई एक ही जन छिन, अर ऊंतैं ऊंकी मेनत का मुताबिक ध्याड़ि दिये जालि, हाँ, जु कुछ भि हमुन कैरी।

⁹ अर हम पिता परमेस्वर की सेवा करण वळा छां। अर हम तुम लोगु की भलै खुणि ही काम कना छां, किलैकि तुम लोग पिता परमेस्वर को पुंगड़ु छाँ जैमा मेनत किये जाणि च, अर अब वेमा घौर बणण की तयार होणी च।

¹⁰ अर मि वे जानकार मिस्‍त्री का जन छौं, जु कि मजबूत घौर बणौन्दु अर बुनियाद का डांग तैं बड़ी मजबूती से रखदु, अर यू दान मितैं पिता परमेस्वर न देई। अर इन्‍नि और लोग भि छिन, जु कि मेरी रखी बुनियाद पर घौर बणौण को काम कना छिन, मगर जरुरी बात त या च कि हरेक मिस्‍त्री अच्छी चिणैं कनु च।

¹¹ अर यीशु मसीह पर बिस्वास करण की ज्वा बुनियाद तुम मा रखै गै, अब वेका अलावा कुई दुसरो नि च, अर ना ही कुई अब वेका मथि दुसरि बुनियाद रखी सकदु।

¹² हाँ, इन भि ह्‍वे सकदु च कि कुछ लोग बुनियाद पर सोना, चांदी या मैंगा ढुंगो की चिणैं करला, पर कुछ इन भि छिन जु कि लखड़ा, या घास-घूस रखी के चिणैं करला।

¹³ अर जब प्रभु सब लोगु को न्याय करलु, त हरेक मनखि का काम परगट ह्‍वे जाला कि वेन कन काम कैरी, किलैकि जन सोने की परख आग से किये जान्दी, ठिक उन्‍नि आग सब कुछ परगट कैरी द्‍याली अर इन साबित करली कि हरेक मनखि का काम कन्द्रया छिन।

¹⁴ अगर कै मनखि कि चिणीं दिवाल बुनियाद समेत टिकी राली, त न्याय का दिन पर वेतैं वेको इनाम जरुर मिललु।

¹⁵ अर अगर कै को कर्युं काम फुकै जालु, त उ अपणा इनाम से दूर ह्‍वे जालु। अर उ बचि त जालु मगर फुकेन्द-फुकेन्द।

¹⁶ क्या तुम नि जणद्‍यां कि तुम लोग परमेस्वर का मन्दिर छाँ? अर परमेस्वर की पवित्र आत्मा तुम मा वास करदी,

¹⁷ अगर कुई परमेस्वर का मन्दिर तैं नास करलु त परमेस्वर वेतैं नास करलु, किलैकि परमेस्वर को मन्दिर पवित्र च, अर वु मन्दिर तुम छाँ।

दुनियां का ज्ञान से बचि के रा

¹⁸ हे मेरा दगड़्यों, धोखा मा नि रयां, अगर तुम मा बटि कुई इन सोचदु कि उ ये जमना मा ज्ञानी च, त सबसे पैलि उ परमेस्वर की बात माणी के सच्‍चि मा ज्ञानी बणि जौ, तब चै लोग वेतैं मूरख ही किलै नि समझा।

¹⁹ अर इन उ इलै कैरो किलैकि ईं दुनियां को ज्ञान परमेस्वर की नजर मा मूरखता च, जन कि पवित्रशास्‍त्र मा भि लिख्यूं च कि, “उ ज्ञानी लोगु तैं ऊंका खुद की चालाकी मा फंसै देन्दु।”

²⁰ अर फिर इन भि लिख्यूं च कि, “प्रभु ज्ञानियों का विचारों तैं जणदु च कि उ बेकार छिन।”

²¹ इलै कुई भि मनखि इन दावा नि कैरो, कि उ कै खास मनखि को चेला च, किलैकि तुमरि भलै खुणि ही पिता परमेस्वर न तुमतै सब कुछ दियूं च।

²² अब चै उ मि छौं या अपुल्‍लोस या पतरस भै, हमतै पिता परमेस्वर न तुमरो सेवक बणै। अर अब या दुनियां अर जु कुछ भि होण वळु च या जु कुछ होणु च, इख तक की जीवन अर मौत भि, यू सब कुछ पिता परमेस्वर न तुमरि भलै खुणि ही दियूं च।

²³ अर ईं बात तैं याद रखा, कि तुम सब यीशु मसीह का छाँ अर मसीह पिता परमेस्वर को च।