1 कुरिन्थि 15 - Garhwali

यीशु मसीह को मुरदो मा बटि ज्यून्द होण

¹ हे मेरा भै-बैंणो, जु शुभ समाचार मिन तुमतै पैलि सुणै छौं, वेतैं तुमुन स्वीकार कैरी, अर वेमा तुम अटल भि छाँ, उई वचन मि तुमतै याद दिलौणु छौं।

² अर जु वचन तुमतै दिये गैनी ऊं वचनों तैं याद रखा। अर अगर जु तुम वामा मजबूत नि बणयां रैल्या, त फिर तुमतै कनकै बचयै जालु। अर अगर जु तुम इन नि करिल्या फिर त इन समझा कि तुमरो बिस्वास कन भि बेकार च।

³ अर सच्‍चै को जु वचन यीशु मसीह का द्‍वारा मितैं बतये गै, उई मिन तुमतै बतै। अर पवित्रशास्‍त्र मा वु वचन इन लिख्यूं च कि, “मसीह हमरा पापों खुणि मरे गै।”

⁴ अर वेतैं दफनये गै, अर जन कि पवित्रशास्‍त्र मा लिख्यूं च वेका मुताबिक पिता परमेस्वर न वेतैं तिसरा दिन मुरदो मा बटि ज्यून्दु कैरी।

⁵ अर पतरस तैं दिखै, अर ठिक उन्‍नि दुसरा चेलों न भि यीशु तैं देखि।

⁶ अर वेका बाद यीशु एक ही बगत मा पांच सौ से भि जादा बिस्वासी लोगु तैं दिखै, अर ऊंमा बटि भौत सा लोग अभि ज्यून्दा छिन, मगर कुछ लोग ईं दुनियां तैं छोड़ि के चलि गैनी।

⁷ अर येका बाद उ याकूब भै तैं दिखै, अर फिर सब खास चेलों तैं भि दिखै।

⁸ अर ऊं सभ्यों का बाद मि पौलुस न भि वेतैं देखि, अर वे पर बिस्वास कैरी। अर वे बगत मेरी हालत वे बच्‍चा का जन छै जु कि बगत से पैलि ही जनम ले देन्दु।

⁹ अर खास चेलों मा मि सबसे छुटो छौं, मि त इथगा लैख भि नि छौ कि मिकू खास चेला बुले जौ। किलैकि मिन ज्यून्दा परमेस्वर का समुदाय तैं सतै, जु की यीशु मसीह पर बिस्वास करदिन।

¹⁰ बल्किन मा पिता परमेस्वर न मि पर अपणी किरपा कैरी, इलै आज मि भि एक खास चेला छौं। अर ज्वा किरपा वेन मि पर कैरी वा बेकार नि गै, किलैकि मिन दुसरा खास चेलों से जादा मेनत कैरी। अर सच्‍चै त या च कि या मेनत पिता परमेस्वर की वीं किरपा न कैरी ज्वा कि मेरा दगड़ा मा च।

¹¹ अब चै मि छौं या वु सब खास चेला, हम सभ्या का सभि एक ही शुभ समाचार को परचार करद्‍यां, अर वीं ही बात पर तुमुन बिस्वास भि कैरी।

फिर से ज्यून्द होण की सच्‍चै

¹² हे मेरा दगड़्यों, जब हम ईं सच्‍चै को परचार करद्‍यां कि यीशु मसीह तैं मुरदो मा बटि ज्यून्द किये गै, त फिर तुमरा बीच मा लोग इन किलै बुल्दिन कि मुरयां लोग फिर से ज्यून्दा नि ह्‍वे सकदिन?

¹³ अर अगर जु मुरदा ज्यून्दा नि ह्‍वे सकदिन, त यां को मतलब यू च यीशु मसीह भि मुरदो मा बटि ज्यून्दु नि ह्‍वे।

¹⁴ अर अगर जु मसीह तैं ज्यून्द नि किये गै, त हमरु परचार करण, अर तुमरो वे पर बिस्वास करण भि बेकार च।

¹⁵ अर अगर ज्वा या बात सच्‍च नि होन्दी, कि मुरयां लोगु न मुरदो मा बटि ज्यून्द होण, त यां को मतलब यू च कि पिता परमेस्वर न यीशु मसीह तैं मुरदो मा बटि ज्यून्दु नि कैरी। अर इथगा ही ना फिर त हम लोग भि झूठ्‍ठा गवा ठैरि ग्यां, जौन पिता परमेस्वर का खिलाप मा झूठ्‍ठी गवै दिनी।

¹⁶ इलै मि तुमतै बतै देन्दु कि अगर जु मुरयां लोग ज्यून्दा नि किये जाला, त यां को मतलब च कि मसीह भि ज्यून्द नि किये गै।

^17-18 अर अगर जु यीशु मसीह ज्यून्दु नि ह्‍वे त फिर तुमरो बिस्वास कन भि बेकार च, अर जु लोग यीशु पर बिस्वासी कैरिके मोरि गैनी ऊंको भि नास ह्‍वे गै। अर तुम सभ्या का सभि अपणा-अपणा पापों मा फंस्यां छाँ, अर वांको दण्ड तुमतै परमेस्वर बटि जरुर मिलण।

¹⁹ अर ये जीवन मा अगर हमरि आस केवल यीशु मसीह पर ही च त यां को मतलब यू च कि हमुन बेकार मा ही वे पर बिस्वास कैरी, अर अब हमरि हालत दुनियां सब लोगु से जादा खराब च।

²⁰ मगर हे मेरा भै-बैंणो, मि तुमतै सच्‍च बतै देन्दु कि सबसे पैलु मनखि यीशु मसीह ही च जैतैं पिता परमेस्वर न मुरदो मा बटि ज्यून्दु कैरी। अर वु ईं बात को सबूत च कि पिता परमेस्वर अपणा लोगु तैं भि जरुर मुरदो मा बटि ज्यून्द करलु।

²¹ किलैकि जन सबसे पैला मनखि आदम का द्‍वारा पाप किये गै, अर वे पाप की वजै से मौत ईं दुनियां मा ऐ, ठिक उन्‍नि दुसरा मनखि यीशु मसीह का द्‍वारा मौत मा बटि ज्यून्द किये जाण होलु।

²² अर जन आदम का पाप मा हिस्सेदार बणि के हम सब लोग मोरि जन्द्‍यां, ठिक उन्‍नि यीशु मसीह का द्‍वारा हम सभ्यों तैं मुरदो मा बटि ज्यून्द भि किये जालु।

²³ अर जन पिता परमेस्वर न यीशु मसीह तैं मुरदो मा बटि सबसे पैलि ज्यून्द कैरी, ठिक उन्‍नि जब यीशु वापस आलु त ऊं सभ्यों तैं भि मौत मा बटि ज्यून्द करलु जु वे पर बिस्वास करदिन।

²⁴ अर येका बाद ईं दुनियां को नास होण को बगत ऐ जाण। तब दुनियां पर राज करण वळा सब अधिकारीयों अर बुरी ताकतों को यीशु मसीह न नास कैरी देण, तब वु अपणा राज्य तैं पिता परमेस्वर का हाथ मा सौंपी द्‍यालु।

²⁵ किलैकि जब तक उ अपणा सब दुसमनों तैं हरै नि द्‍यो, तब तक यीशु मसीह को राज करण जरुरी च।

²⁶ अर सबसे आखिरी मा जै दुसमन को नास किये जाण वा मौत च।

²⁷ किलैकि पवित्रशास्‍त्र मा लिख्यूं च कि, “पिता परमेस्वर न सब कुछ वेका खुटों का तौळ कैरियाली।” अर ईं बात को मतलब बिल्कुल साफ ह्‍वे जान्दु कि पिता परमेस्वर न सब कुछ वेका अधीन कैरियाली। पर जै परमेस्वर न सब कुछ वेका अधीन कैरियाली केवल उई वेका अधीन मा नि च।

²⁸ अर पिता परमेस्वर न सब कुछ अपणा पुत्र यीशु मसीह का अधीन मा कैरियाली, तब पुत्र भि खुद तैं वे पिता परमेस्वर का अधीन कैरी द्‍यालु, ताकि पिता परमेस्वर ही सभ्यों पर राज कैरो।

²⁹ अर पिता परमेस्वर मुरयां लोगु तैं जरुर मुरदो मा बटि ज्यून्द करलु। अर अगर तुम लोग ईं बात पर बिस्वास नि करद्‍यां, त तुम लोगु मा बटि जु मुरयां लोगु खुणि बपतिस्मा लिणा छिन वु कैं आस की वजै से इन करणा छिन?

³⁰ अर अगर पिता परमेस्वर लोगु तैं मुरदो मा बटि ज्यून्द नि करलु, त हम हरेक दिन इथगा दुख-मुसीबत किलै उठौन्दा?

³¹ हे मेरा भै-बैंणो, मि कै दिन भि मोरि सकदु, मगर मि कसम खै के बुल्दु कि तुमरि खातिर मेरु मोन भौत बड़ु होन्दु, किलैकि तुम हमरा प्रभु यीशु मसीह पर बिस्वास करद्‍यां, इलै मि कसम खै के बुल्दु कि मितैं हरेक दिन मौत को सामना कन पोड़दु।

³² अर इफिसुस नगर का लोगु न मेरु बड़ु विरोध कैरी, अर ऊ मि पर जंगळि जानबर की तरौं कटणु कू ऐनी। अर अगर मुरयां लोगु तैं ज्यून्द नि किये जालु, त विरोध करण वळा लोगु का खिलाप मा जु कुछ भि मिन कैरी, वेको कुई फैदा नि ह्‍वे। तब हम भि इन बोलि सकद्‍यां कि, “अरे भोळ त हमुन भि मुरण ही च, चला, हम सब खूब खा-प्या।”

³³ इलै तुम धोखा मा नि रयां किलैकि, “कुसंगति को संग नि करण अर डुण्डी लखड़ी कन्ध नि धरण।”

³⁴ हे मेरा भै-बैंणो, जरा होस मा आ अर जु कुछ गळत च वेतैं करण छोड़ि द्‍या, किलैकि तुम मा बटि कुछ लोग इन छिन जु कि ईं बात तैं स्वीकार नि करदिन कि परमेस्वर मुरदो मा बटि ज्यून्द करलु। अर या बड़ा सरम की बात च, कि तुम मा बटि कुछ लोगु न अभि तक परमेस्वर तैं नि पछ्याणी।

स्वर्ग मा मिलण वळु सरील

³⁵ मगर अब कुछ लोग इन सवाल भि पूछी सकदिन कि, “मुरयां लोग कनकै ज्यून्दा किये जाला, अर कन्द्रयो सरील होलु उ जु कि ऊंतैं मिललु?”

³⁶ अर ऊं लाटा लोगु तैं मि बतै देन्दु कि जब तुम बीज बुतद्‍यां, त बीज जमीन का भितर जैके मोरि जान्दु अर वेका बाद ही उ ज्यून्द हो होन्दु।

³⁷ अर जब तुम ग्यूँ का बीज तैं बुतद्‍यां, तब तुम पौद नि लगौन्द्‍यां, मगर बीज ही बुतद्‍यां।

³⁸ मगर पिता परमेस्वर अपणी इच्छा का मुताबिक ही ऊं बीजों तैं ऊंको सरील देन्दु, अर हरेक बीज को अपणु-अपणु सरील होन्दु।

³⁹ अर जथगा भि पराण ईं दुनियां मा छिन हरेक को सरील अलग-अलग किसम को च। मनखियों को सरील अलग, त जानबरों को सरील अलग, ठिक उन्‍नि पंछियों को सरील अलग, त माछों को सरील अलग ही किसम को च।

⁴⁰ ठिक उन्‍नि स्वर्ग का भि सरील छिन अर धरती पर रौण वळो का भि सरील छिन, मगर स्वर्ग को सरील दिब्य चमक को च अर धरती पर रौण वळो को सरील की चमक दुसरा किसम की च।

⁴¹ अर आसमान मा रौण वळो की चमक अलग-अलग किसम की होन्दी, सूरज कि चमक अलग होन्दी, अर चाँद की चमक अलग होन्दी। इख तक की तारों की चमक भि अलग-अलग किसम की होन्दी, हाँ एक तारे की चमक तेज होन्दी, त दुसरे की कम।

⁴² ठिक इन्‍नि मुरदो को ज्यून्दु होण भि च। हाँ, जन एक बीज बुतै जान्दु, त उ जमीन मा पोड़ि के फिर मोरि जान्दु, ठिक उन्‍नि मनखि की मौत का बाद ईं दुनियां का सरील तैं दफनै जान्दु अर उ नास ह्‍वे जान्दु, पर जै सरील मा उ मुरदो मा बटि ज्यून्द किये जान्दु उ सदनि खुणि रौण वळु च।

^43-44 अर जन अन्धेरु अर उज्याळु दुईया का दुई एक-दुसरा से भौत अलग छिन, ठिक उन्‍नि जै सरील तैं दफनये गै अर जै सरील तैं मुरदो मा बटि ज्यून्द किये गै दुईया का दुई एक-दुसरा से भौत अलग छिन। अर ईं दुनियां को सरील वेका हड़गा अर मांस का दगड़ा मा दफनये जान्दु, पर जब वेतैं मुरदो मा बटि ज्यून्द किये जान्दु, तब उ पिता परमेस्वर की ताकत से मिलण वळु दिब्य सरील च। किलैकि जन ईं दुनियां मा मनखि तैं पिता परमेस्वर का द्‍वारा एक सरील दिये जान्दु, ठिक उन्‍नि वेका द्‍वारा एक दिब्य आत्मिक सरील भि दिये जान्दु।

⁴⁵ इलै पिता परमेस्वर का वचन मा भि इन लिख्यूं च कि, “पैलु मनखि आदम ज्यून्दु पराणी बणि।” मगर आखिरी मनखि याने की यीशु मसीह लोगु तैं पवित्र आत्मा का द्‍वारा सदनि को जीवन देन्दु।

⁴⁶ पर जु ईं दुनियां को सरील च उई हमतै पैलि दिये गै, अर वेका बाद ही हमतै दिब्य आत्मिक सरील दिये जालु।

⁴⁷ अर पैलु मनखि आदम धरती को च जैतैं माटाळ बणयै गै, अर दुसरो मनखि यीशु मसीह च जु कि स्वर्ग बटि ऐ।

⁴⁸ अर जन पैलु मनखि आदम माटा को च, ठिक उन्‍नि और मनखि भि वेकी ही तरौं छिन। पर दुसरो मनखि यीशु मसीह जु कि स्वर्ग को च, इलै जु स्वर्ग मा रौण वळा छिन वु सब भि वेकी तरौं आत्मिक होला।

⁴⁹ अर जन आदम तैं माटा बटि बणयै गै, इलै हमरु रुप भि वेकी तरौं ही च। अर ठिक उन्‍नि दुसरो मनखि यीशु जु कि स्वर्ग बटि ऐ, इलै हमरु सरील भि वेकी तरौं स्वर्ग को ही होलु।

⁵⁰ हे मेरा भै-बैंणो, यू हड़गा, मांस अर ल्वे का ये सरील तैं लेके हम परमेस्वर का राज मा इन नि जै सकद्‍यां। अर इन मि इलै बोन्‍नु छौं, किलैकि हमरु यू सरील ईं दुनियां को च जैन नास ह्‍वे जाण, पर स्वर्गीय सरील को नास नि होण वेन हमेसा तक रौण।

⁵¹ अर सुणा, मि तुमतै राज की एक बात बतौन्दु, हम मा बटि कुछ लोग इन छिन जौन मुरण नि च बल्किन मा ऊंका सरील बदलि जाण।

⁵² हाँ, आखिर बिगुल बजौण का बगत मा झट आंखा झपकौंदि ही इन ह्‍वे जालु। बिगुल बजलु अर मुरदा इन्द्रया सरील मा ज्यून्दा होला जैको नास नि हो सकदु अर हम बदलि जौला।

⁵³ किलैकि हम नास होण वळा ये सरील तैं लेके स्वर्ग मा नि जै सकद्‍यां, इलै ये सरील को नास होण जरुरी च, ताकि हमतै वु सरील मिली सैको जु कि अजर-अमर च।

⁵⁴ अर जब इन होलु, तब पिता परमेस्वर को वु वचन पूरु होण जु कि पवित्रशास्‍त्र मा लिख्यूं च कि, “परमेस्वर की जीत ह्‍वे गै, किलैकि वेन मौत पर जीत हासिल कैरिके वींको नास कैरियाली।”

⁵⁵ “हे मौत कख च तेरी जीत? अर अब कख च तेरु डसण?”

⁵⁶ अर पाप करण की वजै से मनखि मोरि जान्दु, अर पवित्रशास्‍त्र का नियम-कानून का द्‍वारा हमतै इन पता चलदु कि पापि लोगु तैं दण्ड मिललु।

⁵⁷ मगर हम त पिता परमेस्वर को धन्यवाद देन्द्‍यां, किलैकि उ हमतै प्रभु यीशु मसीह का द्‍वारा जीत हासिल करौन्दु।

⁵⁸ इलै हे मेरा प्यारा भै-बैंणो, तुम मजबूत बणा अर बिस्वास मा अटल बणयां रा। अर खुद तैं प्रभु का सुपुर्द कैरी द्‍या, किलैकि तुम जणदा ही छाँ कि तुमरि कठिन मेनत प्रभु मा बेकार नि जान्दी।