1 कुरिन्थि 10 - Garhwali

इस्राएल का इतिहास बटि चितौण

^1-2 हे मेरा भै-बैंणो, मि नि चान्दु कि तुम ईं बात तैं बिसरी जा, कि पिता परमेस्वर न हमरा यहूदी लोगु का पितरों तैं मिस्र देस बटि आजादी दिलै। अर वे बगत मा ऊ बादळ का छैल का तौळ चलिनी, अर लाल समुन्दर का बीचों-बीच चलि के दुसरा छाला पर पौंछयै गैनी। अर इन बुले जै सकदु, कि येका द्‍वारा ऊंको बपतिस्मा ह्‍वे अर वु मूसा रैबर्या का चेला बणि गैनी।

³ अर ऊंन उई खाणुक खै जु कि चमत्कारिक रुप से परमेस्वर न ऊंतैं दे।

⁴ अर ऊंन उई पाणि पेई जु कि चमत्कारिक रुप से परमेस्वर न ऊंतैं दे। अर वा चटान खुद यीशु मसीह को उदारण छै, जु कि मनखियों तैं छुटकारा देणु खुणि परमेस्वर का द्‍वारा चुण्यूं च। अर वे बगत मा वु ऊंका दगड़ा मा छौ अर वेन ऊं खुणि सब कुछ कैरी।

⁵ मगर फिर भि भौत सा लोग पिता परमेस्वर का खिलाप मा छा। इलै वु ऊं लोगु से खुश नि छौ, तब वेन ऊंतैं दण्ड दिनी अर वु निर्जन जगा मा मोरि गैनी।

⁶ अर वु सभ्या का सभि हम खुणि एक उदारण बणि गैनी, कि हमतै इन्द्रयो मनखि नि बणण चयेणु जु कि बुरी बातों की इच्छा रखदु हो।

⁷ अर ना ही तुम मूरतों की पूजा करण वळा बणा, जन कि ऊंमा बटि कथगा ही लोगु न कैरी। अर जन कि पवित्रशास्‍त्र मा भि ऊं लोगु का बारा मा लिख्यूं च कि, “लोग खाण-पीणु कू बैठिनी, अर उठी के नचण अर मौज-मस्ती करण लगि गैनी।”

⁸ अर ना हम कै का दगड़ा मा गळत सम्बन्ध रखा, जन ऊंमा बटि कथगा ही लोगु न कैरी। अर ईं बात की वजै से एक ही दिन मा तेईस हजार लोग मरे गैनी।

⁹ अर ना ही हम प्रभु तैं परखा कि उ कब तक हमरा दगड़ा मा च, किलैकि ऊंमा बटि भौत सा लोगु न इन्‍नि कैरी छौ। तब ऊंतैं दण्ड मिली, अर गुरौ न ऐके ऊंतैं काटी अर भौत सा लोग इनकै मोरि गैनी।

¹⁰ अर ना ही तुम कुड़कुड़ करण वळा बणा, जन की कथगा ही लोग ऊंमा बटि कुड़कुड़ै छा, अर नास करण वळा दूत का द्‍वारा मरे गैनी।

¹¹ अर यू सब बात ऊंका दगड़ा ह्‍वेनि, ताकि वु सभ्यों खुणि एक उदारण बणि जा। अर येका बारा मा पवित्रशास्‍त्र मा भि लिख्यूं च, ताकि हम इन नि कैरा जन ऊंन कैरी, किलैकि हम दुनियां का वे बगत मा जीण छां, जु कि आखिरी को बगत च।

¹² अर जु मनखि इन सुचदु कि मि अपणा बिस्वास मा मजबूत छौं, त वेतैं बड़ी साबधानी से अपणा बिस्वास मा और भि जादा मजबूत होण चयेणु, ताकि उ बिस्वास मा डगमगै नि जौ।

¹³ अर तुम अभि तक शैतान की बातों का द्‍वारा भकलै नि ग्यां, जु कि तुमतै कुई परेसानी हो। अर अगर जु तुम भकलै जैल्या, त वा तुमरा सौण की ताकत से जादा नि होलि। किलैकि पिता परमेस्वर जु कि सच्‍चु च उई तुमतै हरेक बात सौण की ताकत द्‍यालु, बल्किन मा उ तुमतै शैतान का भकलौण वळी बातों से भि भैर निकळण को बाटु दिखालु।

मूरत पूजा से दूर रा

¹⁴ इलै हे मेरा प्यारा भै-बैंणो, तुम लोग मूरत पूजा से दूर रा।

¹⁵ अर यू सब बात मि तुम लोगु तैं समझदार समझि के बतौणु छौं। अर ज्वा बात मि बोन्‍नु छौं, तुम खुद ही वेको फैसला कैरा कि वा बात सही च या गळत।

¹⁶ अर जब हम प्रभु-भोज खाणु खुणि इकट्‍ठा होनद्‍यां, त इन याद रखा कि यीशु मसीह हमरा खातिर मरे गै। अर जब हम वेका कटोरा मा बटि पिन्द्‍यां, त यीशु मसीह की तारीफ करद्‍यां कि वेको ल्वे हम खुणि बुगये गै। अर ठिक उन्‍नि जब रुट्‍टी तुड़ै जान्दी, त इन याद किये जान्दु कि वेको बदन हम खुणि तुड़ै गै। अर इनकै हम यू परगट करद्‍यां कि हम यीशु मसीह का छां।

¹⁷ जब कि बिस्वास मा त हम भौत सा लोग छां, मगर फिर भि हमरि रुट्‍टी एक ही च, अर वु यीशु मसीह च। अर अलग-अलग होण का बाद भि हम मसीह मा एक छां।

¹⁸ हे मेरा दगड़्यों, जरा इस्राएली लोगु तैं देखा जु कि पिता परमेस्वर खुणि अरपण मा चड़ईं भेंट मदि खनदिन, यां को मतलब त यू च कि वु लोग पिता परमेस्वर का दगड़ा मा सामिल होणा छिन।

¹⁹ हे मेरा दगड़्यों, मेरु बोन्‍न को मतलब यू नि च कि मूरत ज्यून्द छिन, अर जु बलिदान ऊंका अगनै चड़ये जान्दु उ पवित्र च अर वेसे भौत फर्क पोड़दु।

²⁰ मेरु बोन्‍न को मतलब यू च कि जु कुछ भि मूरतों का अगनै चड़ये जान्दु उ ज्यून्दा पिता परमेस्वर खुणि ना, बल्किन मा उ सब कुछ ऊं दूतों खुणि चड़ये जान्दु जु शैतान का छिन। अर मि इन चान्दु कि तुम लोग बुरी आत्माओं का दगड़ा मा सामिल नि ह्‍वा।

^21-22 हे मेरा भै-बैंणो, जु खाणुक शैतान का दूतों खुणि चड़ये जान्दु, तुम वेमा सामिल नि ह्‍वा, किलैकि इन करण से हम प्रभु यीशु तैं गुस्सा दिलौणा छां। अर क्या हम अपणा प्रभु से जादा ताकतबर छां? इलै तुम सिरफ वे ही कटोरा मा सामिल ह्‍वा, जु कि हमतै प्रभु यीशु की याद दिलान्दु।

सब कुछ परमेस्वर की बडै खुणि

²³ हे मेरा भै-बैंणो, सब धंणि मि खुणि खूब छिन, मगर मि तुमतै बतै देन्दु, कि सब धंणि मेरा फैदा कि नि छिन। अर मितैं सब कुछ करण की इजाजत च, मगर सब कुछ से मेरी तरक्‍की नि होन्दी।

²⁴ हरेक मनखि अपणा ही भलै की चिन्ता नि कैरो, बल्किन मा दुसरो की भलै की भि चिन्ता कैरो।

²⁵ इलै बजारों मा जु कुछ भि लोग बिकौन्दिन, हम वेतैं लेके खै सकदा छां। अर हमतै यू पूछण कि जरुरत नि च, कि यू मूरत का अगनै चड़ये गै कि ना। हमतै बिना सक कियां खाण चयेणु।

²⁶ किलैकि यां का बारा मा पवित्रशास्‍त्र मा इन लिख्यूं च कि, “धरती अर जु कुछ भि वेमा च प्रभु को ही च।”

²⁷ अर अगर बिस्वास नि करण वळु मनखि तुमतै दावत मा बुलौ, त जु कुछ भि तुमरा समणि रखै जौ त वेतैं खा, अर अपणा जमीर की वजै से कुछ भि पूछताछ नि कर्यां।

^28-29 अर अगर कुई आदिम त्वेकू इन बोलो कि, “यू खाणुक त मूरत का अगनै भेंट मा चड़ये गै छौ।” त त्वेतै वे बुलण वळा मनखि की वजै से नि खाण चयेणु। पर अगर जु तू खाणि छैई त कखि इन नि हो कि उ त्वेतै देखि के अपणा मन मा इन सोचो की यू त द्‍यबतों तैं पूरु आदर-सम्मान देणु च। इलै हे मेरा दगड़्यों, मेरी आजादी दुसरा लोगु का द्‍वारा किलै परखै जौ।

³⁰ अर अगर जु मि अपणा खाणु खुणि पिता परमेस्वर तैं धन्यवाद देणु छौं, त फिर लोगु को कुई हक नि बणदु कि ऊ मेरी बुरै कैरा। किलैकि मिन त वीं बात खुणि पिता परमेस्वर को धन्यवाद कैरियाली।

³¹ इलै चै तुम खा या प्या, जु कुछ भि कैरा वां से पिता परमेस्वर की बडै हो।

³² हे मेरा दगड़्यों, तुम इन्द्रयो कुई भि काम नि कैरा ज्या से की लोग अपणा-अपणा बिस्वास से भटकी जा, अब चै वु यहूदी जाति का छिन या फिर ना, अर ना ही तुम बिस्वासी समुदाय का लोगु खुणि इन्दरि वजा बणा।

³³ अर ठिक जन मि सब बातों मा सब लोगु तैं खुश रखदु, अर मि अपणु ही फैदा कि ना, बल्किन मा भौत सा लोगु की चिन्ता करदु, ठिक इन्‍नि तुम भि कैरा ताकि भौत सा लोगु तैं बचयै जौ।