1 कुरिन्थि 1 - Garhwali

पौलुस की चिठ्‍ठी

^1-2 हे मेरा भै-बैंणो, मि पौलुस पिता परमेस्वर की मनसा से यीशु मसीह को खास चेला होणु खुणि बुलये ग्यों। अर मि या चिठ्‍ठी हमरा बिस्वासी भै सोस्थिनेस का दगड़ा मा कुरिन्थि नगर का लोगु खुणि लिखणु छौं, हाँ तुम खुणि ही तुम जु कि पिता परमेस्वर का समुदाय का लोग छाँ। अर तुम जु कि यीशु मसीह पर बिस्वास करण की वजै से पवित्र किये ग्यां, अर यां खुणि ही तुमतै बुलये गै। हे मेरा दगड़्यों, मि या चिठ्‍ठी ऊं भै-बैंणो खुणि भि लिखणु छौं, जु कि अलग-अलग जगा रौनदिन, अर हमरा प्रभु यीशु मसीह का नौ तैं लिनदिन। ऊ हमरा अपणा ही लोग छिन, किलैकि ऊ पिता परमेस्वर से हमरा प्रभु यीशु मसीह को नौ लेके प्रार्थना करदिन।

³ हमरा पिता परमेस्वर अर प्रभु यीशु मसीह की तरफा बटि तुम सभ्यों पर वेकी किरपा अर वेकी शान्ति मिलणी रौ।

पौलुस द्‍वारा परमेस्वर को धन्यवाद

⁴ हे मेरा भै-बैंणो, मि तुमरा खातिर अपणा पिता परमेस्वर को धन्यवाद हमेसा करदु, किलैकि परमेस्वर की या किरपा तुम पर यीशु मसीह का द्‍वारा ह्‍वे।

⁵ अर अब जब तुम वेका पास ऐ ग्यां, त पिता परमेस्वर न यीशु मसीह का द्‍वारा तुमतै हरेक बात मा काबिल बणैयालि, याने कि अब वेन तुमतै वचन सिखौण की पूरि ताकत, अर वेतैं बिंगणु खुणि ज्ञान भि दियाली।

⁶ अर इनकै पिता परमेस्वर न तुमरा दगड़ा मा मिली के ईं बात को सबूत दिनी, कि यीशु मसीह का बारा मा जु कुछ हम बतौन्द्‍यां उ सब सच्‍च च।

⁷ अर अब तुम मा कैं भि आत्मिक दान-बरदान की कमी नि च, किलैकि वेन तुम पर किरपा कैरिके तुमतै सब कुछ दान का रुप मा दियाली। इलै तुम भि हमरा प्रभु यीशु मसीह का वापस औण को इंतजार कना छाँ।

⁸ अर पिता परमेस्वर तुमतै आखिरी का दिन तक बिस्वास मा और भि जादा मजबूत करलु, ताकि हमरा प्रभु यीशु मसीह का दिन पर जब उ न्याय करलु, त तुम निरदोष ठैरा।

⁹ अर पिता परमेस्वर जरुर इन करलु, किलैकि उ भरोसा का लैख च। अर वेन ही तुमतै अपणा पुत्र प्रभु यीशु मसीह का दगड़ा मा रौणु खुणि बुलै।

बिस्वासी समुदाय मा फूट

¹⁰ हे मेरा भै-बैंणो, अब मि तुम से प्रभु यीशु मसीह को नौ लेके बिन्ती करदु, कि तुम सब एकमत ह्‍वेके रा, अर तुमरा बीच मा फूट नि पोड़ो, बल्किन मा तुम सब एक मन ह्‍वेके रा, अर तुम सभ्यों को एक ही मकसद हो।

¹¹ अर इन मि इलै बोन्‍नु छौं, किलैकि हे मेरा दगड़्यों, हमरि बिस्वासी बैंण खलोए का घौर का लोगु न मितैं तुमरा बारा मा बतै, कि तुमरा बीच मा झगड़ा होणा छिन।

¹² अर मिन इन सुणी कि तुम लोगु मा बटि कुछ इन बुल्दिन कि, “मि पौलुस को चेला छौं,” अर कुई इन बुल्दु कि, “मि त अपुल्‍लोस को चेला छौं,” अर कुई इन बुल्दु कि, “मि त पतरस को चेला छौ” अर कुछ लोग त इन बुल्दिन कि, “हम त मसीह का छां यीशु मसीह का।”

¹³ क्या प्रभु यीशु मसीह तुमरा बीच मा टुकड़ा कैरिके बंटे गै? क्या पौलुस तुमरा खातिर क्रूस पर चैड़ि? या तुमतै मेरा नौ को बपतिस्मा दिये गै?

¹⁴ अरे मि त पिता परमेस्वर को धन्यवाद करदु, कि मिन तुमरा बीच मा क्रिस्पुस अर गयुस भै का अलावा और कैतैं भि बपतिस्मा नि दिनी।

¹⁵ ताकि कुई भि इन नि बोलि सैको, कि मितैं त पौलुस का नौ से बपतिस्मा दिये गै।

¹⁶ हाँ, मिन स्तिफनास का घौर का लोगु तैं भि बपतिस्मा दिनी, अर अगर जु मिन यों का अलावा कै दुसरा तैं भि बपतिस्मा दिनी, त उ मितैं याद नि च।

¹⁷ किलैकि मसीह न मितैं बपतिस्मा देणु खुणि ना, बल्किन मा शुभ समाचार सुनौणु खुणि भेज्यूं च। अर ये शुभ समाचार तैं सुनौणु खुणि मि सरल भाषा को इस्तेमाल करदु, ताकि यीशु मसीह की ज्वा मौत क्रूस पर ह्‍वे वा बेकार नि जौ।

मसीह की ताकत अर परमेस्वर को ज्ञान

¹⁸ अर या सच्‍चि बात च कि जु लोग नास होण वळा बाटा पर चलणा छिन, ऊ इन सोचदिन कि यीशु मसीह को क्रूस पर मुरण की घटना बेकार च। मगर बचयै जाण वळा लोगु खुणि या परमेस्वर की ताकत च।

¹⁹ किलैकि पवित्रशास्‍त्र मा इन लिख्यूं च, “मि ज्ञानी लोगु का ज्ञान तैं नास करलु, अर समझदारों की समझ कै काम की नि राली।”

²⁰ कख रै गैनी ये जमना का ज्ञानी लोग? अर कख रै गैनी धरम का जानकार? अर कख छिन बहस करण वळा लोग? पिता परमेस्वर न दुनियां का ज्ञान की कीमत तैं ना का बराबर कैरियाली।

²¹ अर सच्‍चि मा पिता परमेस्वर ज्ञानी च। अर वेन अपणा ज्ञान का मुताबिक इन कैरी, अब चै मनखि कथगा भि ज्ञानी किलै नि हो, मगर उ अपणा ज्ञान से पिता परमेस्वर तैं नि पछ्याणी सकदु। इलै जब हम यीशु मसीह का बारा मा परचार करद्‍यां, त बिस्वास करण वळा लोगु तैं बचौण पिता परमेस्वर तैं अच्छु लगदु। अर जु लोग पिता परमेस्वर तैं नि पछ्याणदिन वु लोग ये वचन खुणि बेकार की बुल्दिन।

²² अर यहूदी जाति का लोग त चमत्कारों की मांग करदिन, मगर जु लोग यहूदी जाति का नि छिन वु लोग ये ज्ञान का बारा मा सुनण चनदिन,

²³ मगर हम त क्रूस पर चड़यां यीशु मसीह को परचार करद्‍यां। अर यहूदी लोगु खुणि यू परचार उतेडु़ लगण की वजा च, अर जु लोग यहूदी जाति का नि छिन ऊं खुणि यू बेकार को काम च।

²⁴ पर जौं लोगु तैं पिता परमेस्वर न बुलै, अब चै वु यहूदी जाति का हो या दुसरि का जाति का सब खुणि यीशु मसीह ही परमेस्वर की ताकत अर परमेस्वर को ज्ञान च।

²⁵ किलैकि कुछ लोग ये रैबार तैं बेकार की बात समझदिन, पर यू रैबार त लोगु का ज्ञान से कई जादा बढी के च। अर यीशु मसीह का क्रूस पर बलिदान होण की घटना तैं लोग वेकी कमजोरी समझदिन, जब कि यू त परमेस्वर का ज्ञान की ताकत च जैतैं वेन परगट कैरी, ताकि लोग वेका द्‍वारा बचयै जा।

बड़ु मोन केवल प्रभु पर

²⁶ इलै हे मेरा भै-बैंणो, जब पिता परमेस्वर न तुमतै बुलै, तब तुम क्या छा, जरा ईं बात का बारा मा त सोचा, नऽ त तुम ज्ञानी छा, नऽ त ताकतबर अर ना ही समाज मा तुमरो कुछ खास नौ छौ।

^27-29 अर कुई भि मनखि पिता परमेस्वर का समणि बड़ु मोन नि कैरी सकदु। अर वेन ही ज्ञानी लोगु की बेजती करणु खुणि, दुनियां का ऊं लोगु तैं चुणी जौं तैं कुछ नि समझै जान्दु। अर वेन ही दुनियां का कमजोर लोगु तैं भि चुणी, ताकि ऊ ताकतबर लोगु तैं सरमसार कैरी सैका। अर जु इन बुल्दिन कि हम खास लोग छां पिता परमेस्वर न ऊंतैं ना, बल्किन मा हम जन लोगु तैं जु कि दुनियां की नजर मा कुछ भि नि छा, अर नीच जात का मणै जन्द्‍यां। हाँ, हमतै ही जु कि कुछ नि छां पिता परमेस्वर न अफ खुणि चुण्यालि।

³⁰ हे मेरा भै-बैंणो, अब तुमरा पास बड़ु मोन करण को कुई मौका नि च, किलैकि पिता परमेस्वर न ही तुमतै यीशु मसीह का पास बुलै अर तुमतै बचै भि च। अर वेन ही यीशु मसीह तैं हमरु ज्ञान बणै, अर यीशु मसीह ही च जु कि हमतै पिता परमेस्वर का समणि पवित्र बणौन्दु। अर यीशु मसीह न ही अपणु ल्वे देके हमतै पाप से छुटकारु देई।

³¹ ताकि ठिक उन्‍नि हो जन कि पवित्रशास्‍त्र मा लिख्यूं च, “अगर कुई बड़ु मोन कैरो, त उ प्रभु पर बड़ु मोन कैरो।”