तीतुस 2 - गददीआचरण तांयें खरी शिक्षा 1 पर तीतुस तू विस्वासी जो ऐस तरह शिक्षा दे जैड़ी सच्ची भून। 2 बजुर्ग मणु जो सखा कि सो संयमी भून आदर योग्य भून अतै बुद्धिमानी सोगी जिन्दगी बीताणै बाळा भूणा चहिन्दा। तंयारा विस्वास खरा भूणा चहिन्दा अतै प्यार अतै धीरज सोगी भरूरै भूणा चहिन्दै। 3 इन्नी साहबै बजुर्ग जनानी जो सखा कि तंयारा चाल-चलन पवित्र मणु सांईयै भोआ, दोष लाणै बाळी अतै पियक्कड़ ना भून पर खरी गल्ला सखाणै बाळी भून। 4 ताकि सो जवान जनानी जो भी सलाह दी सकन कि सो अपणै घरवाळै अतै बच्चै सोगी प्यार रखा। 5 हरेक जवान जनानी अपणै आपा पुर काबू रखन, पवित्र बणी रैहन, घरा रा कारोबार करनै बाळी, भली अतै अपणै-अपणै घरवाळै रै अधीन रैहणै बाळी भून ताकि प्रमात्मैं रै कम्मा री निन्दा ना भोआ। 6 इन्नी साहबै जवान मर्दा जो भी सखा कि सो भी अपणै आपा पुर काबू रखन। 7 सबी गल्ला मन्ज अपणै आपा जो भलै कमां जो करनै बाळा आर्दश बणान। जैहणै तुहै प्रमात्मैं रै बारै मन्ज विस्वासी जो सखान्दै हिन ता आदर अतै खरै इरादै सोगी सखा। 8 सच्चाई जो ऐस तरीकै सखा कि तेरी शिक्षा री कोई बुराई ना करी सका। जैड़ा तेरै विरोधी हिन तिन्या लज्जित भूणा अतै तिन्या बलै इन्दै बारै मन्ज बुरा बलणै जो कुछ ना भूणा। 9 तिन्या विस्वासी जो समझा जैड़ै दास हिन कि सो अपणै मालका रै अधीन रैहन अतै सबी कमां मन्ज तियां जो खुश रख अतै फेरी करी जवाव मत दे। 10 चोरी चलाकी मत करदा, पर सबी गल्ला मन्ज विस्वासयोग्य अतै भला कम कर। तां तिन्या इन्दै उद्धारकर्ता प्रमात्मैं रै उपदेशा री होर शोभा करनी हा। 11 प्रमात्मैं रा अनुग्रह सबी मणु पुर प्रकट हा जैडा कि सबी रै उद्धार री व्जहा हा। 12 प्रमात्मैं रै अनुग्रह री वजह तिनी असिओ सखाऊ हा कि अहै तिन्या बुरै रस्तै अतै तिन्या बुरी अभिलाषा पुर चलनै थऊँ मना करन अतै ऐस संसार मन्ज ईमानदार अतै खरी जिन्दगी जिणै री कोशिश करन। 13 अतै तैसा धन्य उम्मीद री मतलब अपणै महान प्रमात्मैं अतै उद्धारकर्ता यीशु मसीह री महिमा सोगी प्रकट भूणै री भाळ करदै रैहन। 14 यीशु मसीह अपणै आप रा बलिदान असु तांई करी दिता, कि असिओ पाप री शक्ति थऊँ छुटकारा दे अतै अहै तसेरै खास मणु बणी गान, जिन्या मन्ज खरै कमा करनै री बड़ी इच्छा भोआ। 15 ठेरैतांये हे तीतुस विस्वासी जो पूरै अधिकार सितै ईयां गल्ला जो सुधारदा अतै सखान्दा रैह कि सो इन्या गल्ला रै अनुसार चलन, अतै कोई तेरी इन्या गल्ला घटिआ ना समझा। |
This work is licensed under Creative Commons Attribution-ShareAlike 4.0 License.