रोमियो 9 - गददी

प्रमात्मां अतै तसेरै चुणुरै मणु

¹ अऊँ मसीह मन्ज सच बलदा, अऊँ झूठ ना बल्लू करदा अतै मेरा विवेक भी पवित्र आत्मा मन्ज गवाही दिन्दा हा,

² कि मिन्जो बडा दुख हा, अतै मेरा मन सदा दुखी रैहन्दा हा अपणै कुटुम्ब रै यहूदी भाई तांयै।

³ अऊँ मसीह थऊँ अलग भूणै अतै सदा हरापित भूणै तांयै भी तैयार हा अगर ऐत थऊँ तंयारा उद्धार भुन्दा ता।

⁴ सो इस्त्राएल रै मणु हिन, अतै प्रमात्मैं रै गोद लैऊरै बच्चै भूणै तांयै चुणुरै हिन तिनी अपणी महिमा तियां पुर प्रकट करी हा। प्रमात्मैं तियां सोगी कई वायदै करूरै हिन अतै अपणी व्यवस्था भी दिती हा। प्रमात्मैं तियां जो अपणी आराधना करनै रा अतै अदभुत वायदै पाणै रा भी सौभाग्य दितुरा हा।

⁵ अब्राहम, इसहाक अतै याकूब तंयारै पूर्वज हिन, अतै शरीरा रै भाव सितै मसीह भी इस्त्राएली थू। सो प्रमात्मां हा जैड़ा सबी रै ऊपर राज्य करदा, सो युगायुग स्तुति रै योग्य हा। आमीन।

⁶ पर ऐह निय्आ कि प्रमात्मैं अपणा वायदा पुरा ना करू, पर ठेरैतांये कि सबी इस्त्राएली प्रमात्मैं रै मणु ना हिन।

⁷ अब्राहम रै वंश थऊँ भूणै रा मतलब ऐह निय्आ कि सब तसेरी औलाद हिन, क्ओकि पवित्रग्रन्थ मन्ज लिखुरा हा; “इसहाक ही सो औलाद हा जैत थऊँ तेरा वंश कहलाणा।” ठेरै अलावा अब्राहम बलै होर भी औलाद थी।

⁸ अब्राहम रै शरीरिक वंश भूणै रा मतलब ऐह निय्आ कि सो सब प्रमात्मैं री औलाद बणी गै, सिर्फ वायदै री औलाद ही अब्राहम रा औलाद गिणै गान्दै हिन।

⁹ क्ओकि वायदा ऐह हा “मुँ अगलै साल ऐस टैमां रै अनुसार ईणा, अतै सारा बल्लै पुत्र भूणा।”

¹⁰ ऐह मत भूला कि रिबका अतै इसहाक रै जुड़वै बच्चै सोगी कै भुआ थू,

¹¹ तंयारै पैदा भूणै थऊँ पैहलै, या तियां थऊँ कुछ भला या बुरा कम करनै थऊँ पैहलै ही प्रमात्मैं रिबका सोगी बलुरा थू कि “तसारै मोट्टै दब्बू हल्कै दब्बू री सेवा करनी हा।”

¹² प्रमात्मैं ऐह बल्ली करी ऐह दसु कि सो कसी रै कम्मा रै आधार पुर ना पर अपणी इच्छा सोगी चुणदा हा।

¹³ जिंआं पवित्रग्रन्था मन्ज लिखुरा, “मैंई याकूब सितै प्रेम करू, पर एसाव जो ठुकराई दिता।”

¹⁴ ठेरैतांये अहै कै बलन? कै प्रमात्मैं अन्याय करू? बिलकुल ना!

¹⁵ क्ओकि सो मूसा सोगी बलदा, “अऊँ जैस कसी पुर दया करना चाँऊ तैस पुर दया करनी हा, अतै जैस कसी पुर कृपा करना चाँऊ तैस पुर ही कृपा करनी हा।”

¹⁶ ता प्रमात्मां ही हा जैड़ा चुणदा कि कस पुर दया करनी हा। अहै ना ता चुणी सकदै हिन अतै ना ही तैतिओ पाणै तांयै कोई कम करी सकदै हिन।

¹⁷ क्ओकि पवित्रग्रन्था मन्ज मिस्त्र रै राजा फिरौन सोगी प्रमात्मैं बलुरा थू, “मैंई तिजो ठेरैतांये राजा बणाऊ कि तिजो मन्ज अपणी सामर्थ दसु, अतै मेरै नां रा समाचार पूरी धरती पुर भोआ।”

¹⁸ ठेरैतांये सो जैस पुर चाहन्दा तैस पुर दया करदा हा, अतै जैसिओ चाहन्दा तैसिओ कठोर करी दिन्दा।

प्रमात्मैं रा क्रोध अतै तसेरी दया

¹⁹ ता फिरी कुछ मणु मिन्जो सोगी बलणा, “सो कजो फिरी दोष लान्दा? कुण तसेरी इच्छा रा सामना करदा हा?”

²⁰ ना! इन्या ना बलणा। तुहै कुण हिन, अक्क आम मणु कियां प्रमात्मैं सोगी बैहंस करी सकदा? जैसा चिजा जो प्रमात्मैं बणाऊरा हा कै सो प्रमात्मैं सोगी बल्ली सकदी हा कि, “तैंई मिन्जो ऐसा कजो बणाऊ हा?”

²¹ कै कुम्हार जो मिट्टी पुर अधिकार निय्आ कि अक्क ही चाक पुर अक्क बरतन आदर तांयें अतै दुआ अनादर तांयें बणाये?

²² हालांकि प्रमात्मां पाप थऊँ गुस्सा हा ऐह दसणा चाहदां, अतै तियां जो शक्तिशाली रूपा सोगी सजा दि सकदा जैड़ै पाप करदै हिन, फिरी भी तियां जो बड़ै धीरज सोगी सहंदा हा जैड़ै तैसिओ क्रोधित करदै अतै विनाश रै लायक हिन।

²³ प्रमात्मां धीरज सोगी भाळ करदा कि सो प्रभावशाली रूपा सोगी अपणै कम्मा जो प्रकट करा तियां मणु पुर जियां पुर सो दया करदा हा। जियां जो तिनी टैमां थऊँ पैहलै ही चुणी लैऊरा कि सो तियां सोगी रेय्आ।

²⁴ अर्थात असु पुर जिंआं जो तिनी ना सिर्फ यहूदी थऊँ, बल्कि गैर यहूदी थऊँ भी चुणुरा हा।

²⁵ जियां प्रमात्मां गैर यहूदी रै बारै मन्ज होशे भविष्‍यवक्ता द्धारा लिखुरी कताबा मन्ज बलदा हा; “जैड़ी मेरी प्रजा ना थी, तियां जो मुँ अपणी प्रजा बलणा; अतै जैड़ी प्यारी ना थी, तैहा जो प्यारी बलणा।”

²⁶ फिरी तैहा जगह मन्ज प्रमात्मैं बल्लू थू कि; “तुहै मेरी प्रजा ना हिन, पर तियां जो ही बलया गाणा कि तुहै जिन्दै प्रमात्मैं री औलाद हिन।”

²⁷ अतै यशायह भविष्‍यवक्ता इस्त्राएल रै मणु रै बारै मन्ज पुकारीकरी बलदा; “चाहे इस्त्राएल री सन्ताना री गिणती समुंद्र रै बालू रै बराबर भोआ, तांभी तियां मन्ज थोड़ै ही बचणै हिन।

²⁸ क्ओकि प्रभु झट ही तियां मणु जो सजा दिणिआ, जैड़ै तैसा धरती मन्ज रैहन्दै हिन जियां तिनी बलुरा थू।”

²⁹ जिंआं यशायह भविष्‍यवक्ता पैहलै भी बलुरा थू; “अगर सेनाओ रा प्रभु इन्दै तांयै कोई वंश ना छड़दा, ता अहै सदोम अतै अमोरा शहर सांईयै भूच्ची गान्दै।”

इस्त्राएल रा अविस्वास

³⁰ ता इन्या सबी रा कै मतलब हा? ठेरा मतलब ऐह हा कि गैर यहूदी प्रमात्मैं रै ग्रहण योग्य बणनै री कोशिश ना करू करदै थियै, पर तियैं ऐह जाणी लैऊ कि अगर तियैं विस्वास करू ता प्रमात्मैं तियां जो धर्मी बणाई करी ग्रहण करी लैणा।

³¹ ठेरा मतलब ऐह भी हा कि इस्त्राएल जाति रै मणु जैड़ै धर्म री व्यवस्था री खोज करदै थियै सो प्रमात्मैं रै ग्रहण योग्य ना थियै,

³² ऐह कजो भूआ? ऐह ठेरैतांये भूआ कि सो विस्वास सितै ना, पर व्यवस्था रै कम्मा सितै तसेरी खोज करदै थियै। तिन्यै पापा री माफी तांई प्रमात्मैं पुर भरोसा करना ना चाऊ अतै तिन्यै ठोकर खाई।

³³ जिंआं पवित्रग्रन्था मन्ज लिखुरा हा; “हेरा, अऊँ यरूशलेम शहर मन्ज अक्क ठोकर लगणै रा पत्थर, अतै ठोकर खाणै री चट्टान रखदा हा, अतै जैस तैस पुर विस्वास करना तैस कदी भी लज्जित ना भूणा।”