रोमियो 4 - गददी

अब्राहम रा उदाहरण

¹ अहै यहूदी अबै कै बलन इन्दै पूर्वज अब्राहम रै बारै मन्ज, कस वजह थऊँ तैसिओ धर्मी मनया गो?

² क्ओकि अगर अब्राहम अपणै भलै कम्मा थऊँ धर्मी ठहराई गान्दा, ता तैसिओ घमण्ड़ करनै रा कारण भुन्दा, पर प्रमात्मैं रै सामणै भलै कम्मा रा घमण्ड़ ना करी सकदै।

³ पवित्रग्रन्थ कै बलदा? ऐह कि “अब्राहमे प्रमात्मैं री गल्ला पुर विस्वास करू, अतै ऐस विस्वास रै द्धारा सो प्रमात्मैं री नजरा मन्ज धर्मी बणी गो।”

⁴ कम करनैवाळै जो मजदूरी दिणा दान निय्आ, पर हक्क समझी गान्दा।

⁵ तैस तरीकै ही मणु अपणै भलै कमा रै द्धारा धर्मी ना ठहरी सकदै, सो प्रमात्मैं पुर विस्वास रखणै थऊँ धर्मी बणदै हिन जैड़ा पापी जो माफ करदा हा।

⁶ पवित्रग्रन्था मन्ज दाऊद भी तैसिओ धन्य बलदा हा; जैसिओ प्रमात्मां बिना कर्मा रै धर्मी ठहरान्दा,

⁷ “धन्य हा सो जसेरै अधर्म माफ भुएै, अतै जंयारै पाप माफ भुएै।

⁸ धन्य हा सो मणु जसेरै पापा रा प्रमात्मां लेखा ना लेय्आ।”

⁹ ता कै ऐह धन्य बचन यहूदी ही तांयें हिन या गैर यहूदी तांयै भी हिन? अहै बचना रै अनुसार बलदै आये हिन “अब्राहम अपणै विस्वास रै द्धारा ही प्रमात्मैं री नजरा मन्ज धर्मी बणी गो।”

¹⁰ ता अब्राहम कैहणै धर्मी बणु? अब्राहम प्रमात्मैं री नजरा मन्ज अपणै खतना भूणै थऊँ बाद ना पर खतना भूणै थऊँ पैहलै ही धर्मी बणी गो।

¹¹ खतना ऐहा गल्ला रा चिन्ह थू कि अब्राहम जो पैहलै थऊँ ही विस्वास थू अतै प्रमात्मैं तैसिओ पैहलै थऊँ ही ग्रहण करीके धर्मी ठहराऊरा थू, तसेरा खतना भूणै थऊँ पैहलै ही। ठेरैतांये अब्राहम तियां मणु रा आत्मिक पिता हा जैड़ा विस्वास करदै हिन पर खतना ना करवाऊरा, तियां जो विस्वास री वजह थऊँ धर्मी ठहराया गान्दा हा।

¹² अब्राहम तियां खतना करूरै मणु रा भी आत्मिक पिता भूच्ची सकदा हा पर ऐह सिर्फ ता ही भूच्ची सकदा कि तंयारै अन्दर भी तिनां ही विस्वास भोआ जियां अब्राहम रै अन्दर थू तसेरा खतना भूणै थऊँ पैहलै।

विस्‍वासा सोगी प्रतिज्ञा रा मिलणा

¹³ प्रमात्मैं अब्राहम अतै तसेरै वंश सोगी ऐह वायदा करू कि सो संसार रा वारिस भोला। ऐह वायदा सिर्फ ठेरैतांये ना थू कि अब्राहमे व्यवस्था रा पालन करू पर प्रमात्मैं पुर विस्वास रखणै री वजह थऊँ ऐह धार्मिकता तैस तांयै भूच्ची गैई।

¹⁴ क्ओकि अगर व्यवस्था रा पालन करनै बाळै ही वारिस हिन, ता विस्वास बेकार अतै प्रतिज्ञा निष्फल ठहरी।

¹⁵ जैड़ै पूरै तरीकै व्यवस्था रा पालन ना करदै तियां जो प्रमात्मां सजा दिन्दा हा, अतै जैड़ी व्यवस्था ना भुन्दी तैड़ी ऐतिओ ना मनणै बाळा भी निय्आ।

¹⁶ ता वायदा विस्वास रै द्धारा मुफ्‍त तौहफै रै रूपा मन्ज पाई सकदै हिन अतै असु सबी जो पक्का मिलणा चाहे अहै व्यवस्था रै अनुसार जीन या ना जीन क्ओकि असु बलै अब्राहम सांईयै विस्वास हा। अब्राहम सबी विस्वासी रा पिता हा।

¹⁷ जिंआं पवित्रग्रन्था मन्ज लिखुरा, “मैंई तिजो सबी जाति रा पिता ठहराऊरा” प्रमात्मैं री नजरा मन्ज अब्राहम इन्दा पिता हा। तिनी तैस प्रमात्मैं पुर विस्वास करू, जैड़ा मरूरै थऊँ जियान्दा हा अतै तियां चिजा जो भी जिन्दगी मन्ज लैईन्दा जैड़ी मौजुद ही ना हिन।

¹⁸ प्रमात्मैं अब्राहम जो बल्लू कि तिजो बलै कई सन्तान भूणी ठेरै बावजूद भी तैहा हालत मन्ज तैस कईआ रा पिता ना बणना फिरी भी तिनी विस्वास करू अतै उम्मीद ना छड़ी।

¹⁹ अब्राहम बड़ा बजुर्ग हा सो बच्चै ना पैदा करी सकदा थू क्ओकि सो अक्क सौ साला रा थू अतै तसेरी घरावाळी सारा भी बजुर्ग थी अतै गर्भ धारण ना करी सकदी थी फिरी भी सो विस्‍वासा मन्ज पक्का रैऊ।

²⁰ अब्राहमे प्रमात्मैं रै वायदै पुर शक ना करू पर विस्‍वासा मन्ज दृढ़ भूच्ची करी प्रमात्मैं री महिमा करी।

²¹ तैस जो पुरा भरोसा थू कि प्रमात्मैं जैड़ा वायदा करूरा हा तैतिओ सो पुरा करी सकदा हा।

²² अब्राहम रै विस्वास री वजह थऊँ सो प्रमात्मैं सामणै धर्मी बणी गो।

²³ जियां अहै पवित्रग्रन्था मन्ज पढ़दै हिन; “विस्वास री वजह थऊँ सो प्रमात्मैं सामणै धर्मी बणी गो” ऐह बचन सिर्फ अब्राहम तांयै ही ना लिखु पर

²⁴ बल्कि अहै भी जैड़ै विस्वास रै द्धारा प्रमात्मैं री नजरा मन्ज धर्मी बणी गै, अर्थात इन्दै तांयें जैड़ै तैस पुर विस्वास करदै हिन जिनी इन्दै प्रभु यीशु जो मरूरै थऊँ जिआऊ।

²⁵ यीशु इन्दै अपराधा तांयें मरनै जो पकड़ाया गो, अतै इन्दै धर्मी ठहरनै तांयें मरूरै थऊँ जिय्आ भी गो।