रोमियो 16 - गददी

बैहण फीबे री नमस्ते

¹ अऊँ तुसिओ बलदा कि, फीबे तांयें जैड़ी इन्दी विस्वासी बैहण अतै किंख्रेआ शहर री कलीसिया री सेविका हा, तुहै तसारा आदर करा।

² तुहै तैहा बैहणी रा स्वागत करा जियां प्रभु रै विस्वासी सोगी करया गाणा चहिन्दा, अतै जेहा कसी गल्ला मन्ज तैहा जो तुन्दी जरूरत भोआ, तसारी मदद करा, क्ओकि सो मतै री बल्कि मेरी भी उपकार करनैवाळी रैई हा।

³ बैहण प्रिस्का अतै तसारै घरावाळा अक्‍विला जो जैड़ै मसीह यीशु मन्ज मेरै सहकर्मी हिन, नमस्कार।

⁴ तिन्यै मेरै प्राण तांयें अपणी हि जिन्दगी जोखिम मन्ज पाई दितुरी थी; अतै सिर्फ अऊँ ही ना, बल्कि गैर यहूदी री सब कलीसिया भी तंयारा धन्यवाद करदी हिन।

⁵ तैहा कलीसिया जो भी नमस्कार जैड़ी तंयारी घरा मन्ज हा। मेरै प्यारे इपैनितुस जो, जैडा मसीह तांयें आसिया परदेस रा पैहला विस्वासी हा, नमस्कार।

⁶ मरियम जो जैसै तूसु तांयें बडी मेहनत करी, नमस्कार।

⁷ अन्द्रुनीकुस अतै यूनियास जैड़ै मेरै साथी यहूदी हिन, अतै मिन्जो सोगी जेला मन्ज थियै अतै जैड़ै प्रेरिता मन्ज बड़ै आदर योग्य हिन, अतै मिन्जो थऊँ पैहलै विस्वासी बणै थियै, तिन्या जो मेरा नमस्कार।

⁸ अम्पलियातुस जो, जैडा प्रभु मन्ज मेरा प्यारा हा, नमस्कार।

⁹ उरबानुस जो, जैडा मसीह मन्ज सहकर्मी हा, अतै मेरै प्यारे इस्तखुस जो नमस्कार।

¹⁰ अपिल्लेस जो जैडा मिन्जो सोगी मुश्कला मन्ज भी विस्वास मन्ज पक्का रैऊ, नमस्कार। अरिस्तुबुलुस रै घरानै जो नमस्कार।

¹¹ मेरी साथी यहूदी हेरोदियोन जो नमस्कार। नरकिस्सुस रै घरानै रै जैड़ै मणु प्रभु मन्ज हिन, तियां जो नमस्कार।

¹² त्रूफेना अतै त्रूफोसा जो जैड़ी प्रभु मन्ज मेहनत करदी हिन, नमस्कार। प्यारी पिरसिस बैहण जो, जैहै प्रभु मन्ज बडी मेहनत करी, नमस्कार।

¹³ रूफुस जो जैडा प्रभु मन्ज चुणुरा हा अतै तसेरी माता जो, जैड़ी मेरी माता सांईयै हा, दूनी जो नमस्कार।

¹⁴ असुंक्रितुस अतै फिलगोन अतै हिर्मेस अतै पत्रुबास अतै हिर्मास अतै तियां सोगी बाकी सब विस्वासी भाई जो नमस्कार।

¹⁵ फिलुलुगुस अतै यूलिया अतै नेर्युस अतै तसेरी बैहणी, अतै उलुम्पास अतै तंयारै सोगी सब प्रमात्मैं रै मणु जो नमस्कार।

¹⁶ अप्पू मन्ज प्‍यार सितै नमस्कार करा। तूसु जो मसीह री सब कलीसिया री तरफा थऊँ नमस्कार।

आखरी निर्देश

¹⁷ अबै हे विस्वासी भाईओ, अऊँ तूसु सोगी बिनती करदा कि जैड़ै मणु तैहा खरी शिक्षा रै उलटै, जैड़ी तुहै पाऊरी हा सो फूट पाणै अतै प्रमात्मैं थऊँ भटकाणै रा कारण भुन्दै, तियां जो ताड़ी लैऊ करा अतै तियां थऊँ दूर रेय्आ।

¹⁸ क्ओकि ऐसै मणु इन्दै प्रभु मसीह री ना पर अपणी जिन्दगी री इच्छा जो पुरा करदै हिन; अतै चिकनी चुपड़ी गल्ला सितै सिधै-सादै मना रै मणु जो भकाई दिन्दै हिन।

¹⁹ सब मणु जाणी गै हिन कि तुहै प्रभु रै प्रति आज्ञाकारी हिन, ठेरैतांये अऊँ तून्दै बारै मन्ज खुशी मनांदा, पर अऊँ ऐह चाहन्दा कि तुहै भलाई जो पच्छैणनै मन्ज बुद्धिमान पर बुराई करनै तांयें भोळै बणी रेय्आ।

²⁰ प्रमात्मां जो शान्ती रा दाता हा, शैतान जो तून्दै पैरा थऊँ जल्दी ही मरवाई दिणा। इन्दै प्रभु यीशु री कृपा तूसु पुर भुन्दी रेय्आ।

²¹ मेरै सहकर्मी तीमुथियुस रा, अतै मेरै यहूदी साथी लूकियुस अतै यासोन अतै सोसिपत्रुस रा तूसु जो नमस्कार।

²² अऊँ तिरतियुस जैड़ा ऐसा पत्री जो पौलुस तांयै लिखु करदा, प्रभु रा चेला भूणै रै नातै अऊँ भी तुसिओ नमस्कार करदा।

²³ गयुस जैडा मेरी अतै कलीसिया री मेहमान नमाजी करनैवाळा हा, तसेरा तुसिओ नमस्कार। इरास्तुस जैडा नगरा रा भण्डारी हा, अतै भाई क्‍वारतुस रा तुसिओ नमस्कार।

²⁴ अऊँ प्रार्थना करदा कि इन्दै प्रभु यीशु मसीह रा अनुग्रह तूसु सोगी बणी रेय्आ। आमीन।

प्रमात्मैं री स्तुति

²⁵ अबै जैडा तूसु जो मेरै सुसमाचार अर्थात यीशु मसीह रै संदेश रै प्रचार रै अनुसार विस्वास मन्ज स्थिर करी सकदा हा, तैस भेदा रा प्रकाश जैड़ा जाति जाति तांयै सनातन थऊँ छिपी रैऊरा,

²⁶ पर अबै प्रकट भूच्ची करी सनातन प्रमात्मैं री आज्ञा सितै जैड़ी भविष्‍यवक्ता रै पवित्रग्रन्था मन्ज लिखुरा थू तठेरै द्धारा सब जाति जो हैदुरा हा कि सो विस्‍वासा सोगी आज्ञा मनणैवाळै ही गान।

²⁷ तैस ही एकमात्र बुद्धिमान प्रमात्मैं री यीशु मसीह रै द्धारा युगायुग महिमा भुन्दी रेय्आ। आमीन।