रोमियो 12 - गददी

प्रमात्मैं री सेवा री जिन्दगी

¹ ठेरैतांये हे विस्वासी भाईओ, अऊँ तुसिओ प्रमात्मैं री दया याद दुआई करी बिनती करदा कि अपणी जिन्दगी जो पवित्र अतै प्रमात्मैं री पसन्द रा बलिदान करीके चढ़ा। ऐह ही सही तरीका हा प्रमात्मैं री सेवा करनै रा।

² संसारिक मणु सांईयै मत बणा; पर तून्दै मना रै नोए भूच्ची गाणै थऊँ तून्दा चाल-चलन भी बदलदा गच्छा, जैत थऊँ तुहै प्रमात्मैं जो भली, अतै भावती, अतै सिद्ध इच्छा अनुभव सितै मालूम करदै रैहन।

³ क्ओकि अऊँ तैस अनुग्रह री वजह थऊँ जैड़ा मिन्जो मुळुरा हा, तूसु मन्ज हरेक सितै बलदा, तैत थऊँ बदिकरी कोई भी अपणै आपा जो ना समझा; पर जिंआं प्रमात्मैं हरेक जो तैस विस्वास रै नाप रै अनुसार जैड़ा तुसिओ दितुरा हा, तियां ही सुबुद्धि सोगी अपणै आपा जो समझा।

⁴ क्ओकि जिंआं इन्दै शरीरा मन्ज मतै सारै अंग हिन, अतै सबी अंगा रा अलग अलग कम हा।

⁵ तियां ही अहै जैड़ै विस्वासी हिन, मसीह मन्ज अक्क देह भूच्ची करी अप्पू मन्ज अक्की दूये रै अंग हिन।

⁶ जांकि तैस अनुग्रह रै अनुसार जैड़ा असिओ प्रमात्मैं दितुरा हा, असिओ अलग अलग वरदान मुळुरै हिन। जिंआं जो भविष्‍यवाणी रा दान मुळुरा हा, सो विस्वास रै नाप रै अनुसार भविष्‍यवाणी करा।

⁷ अगर होरी री सेवा करनै रा वरदान मुळुरा भोआ ता, सेवा मन्ज लगी रेय्आ। अगर कोई सखाणैवाळा भोआ ता सखाणै मन्ज लगी रेय्आ।

⁸ जैडा उत्साहित करनै बाळा भोआ, सो उत्साहित करनै मन्ज लगी रेय्आ। अगर कसकि जो होरी री जरूरता जो पुरा करनै तांयै दान दिणै रा वरदान हा ता सो उदारता सोगी दान देय्आ। अगर अगुवाई रा वरदान हा ता सो उत्साह सोगी करा; जैडा दया करा सो खुशी सोगी करा।

⁹ प्रेम निष्‍कपट भोआ; बुराई थऊँ घृणा करा; भलाई मन्ज लगी रेय्आ।

¹⁰ अक्की दूये सोगी इन्या प्रेम रखा जियां कि तुहै अक्की ही परिवार रै भून, परस्पर आदर करनै मन्ज अक्की दूये थऊँ बदी चला।

¹¹ मेहनत करा अतै आलसी मत बणा, उत्साह सोगी प्रभु री सेवा करदै रेय्आ।

¹² उम्मीद मन्ज आनन्दित रेय्आ; क्‍लेश मन्ज स्थिर रेय्आ; प्रार्थना मन्ज रोज लगी रेय्आ।

¹³ पवित्र मणु जो जैडा कुछ जरूरी भोआ, तैत मन्ज तंयारी मदद करा; मेहमान नमाजी करनै मन्ज लगी रेय्आ।

¹⁴ अपणै सताणैवाळै जो आशीष देय्आ; आशीष देय्आ हराप मत देय्आ।

¹⁵ खुशी मनाणैवाळै सोगी खुशी मना, अतै रूणैवाळै सोगी रोआ।

¹⁶ जियां तुहै अपणी चिन्ता करदै हिन तियां ही अक्की दूये री चिन्ता करा। अभिमानी मत बणा, पर दीना सोगी संगति रखा; अपणी नजरा मन्ज बुद्धिमान मत बणा।

¹⁷ बुराई रै बदलै कसी सोगी बुराई मत करा; जैड़ी गल्ला सबी मणु रै नेड़ै खरी हिन, तंयारी चिन्ता करा।

¹⁸ जैड़ी तक भूच्ची सका, तुहै भरसक सब मणु सोगी मेल मिलाप रखा।

¹⁹ हे प्यारेओ, बदला ना लैणा, पर प्रमात्मैं जो मौका देय्आ कि सो बदला लेय्आ, क्ओकि पवित्रग्रन्था मन्ज लिखुरा हा; “बदला लैणा मेरा कम हा, प्रभु बलदा हा मुँ ही बदला दिणा।”

²⁰ पर “अगर तेरा बैरी भूखा भोआ ता तैसिओ खाणा खुआ, अगर त्रिहणा ता तैसिओ पाणी पैय्आ; क्ओकि ऐसा करनै थऊँ तुहै तैसिओ शर्मिन्दा करदै हिन।”

²¹ बुराई थऊँ ना हारा, पर भलाई सितै बुराई जो जीती लेय्आ।