रोमियो 11 - गददी

इस्त्राएल पुर प्रमात्मैं री दया

¹ ठेरैतांये अऊँ पूछदा, कै प्रमात्मैं अपणी प्रजा जो त्यागी दितुरा? बिलकुल ना! अऊँ भी ता इस्त्राएली हा। अब्राहम रै वंश अतै बिन्यामीन रै गोत्रा थऊँ हा।

² प्रमात्मैं अपणै प्रजा जो ना त्यागुरा, जैसा जो तिनी पैहला थऊँ ही चुणुरा। तुहै जाणदै हिन कि पवित्रग्रन्थ एलिय्याह भविष्‍यवक्ता रै बारै मन्ज बलुरा कि, सो इस्त्राएली मणु रै वरोधा मन्ज प्रमात्मैं सितै बिनती करदा हा।

³ सो बलदा हा, “हे प्रभु, तिन्यै तेरै भविष्‍यवक्ता जो मारूरा, अतै तेरी वेदि जो ढ़ाई दितुरा; अतै अऊँ अकेला ही बचुरा हा जैडा तिजो पुर विस्वास करदा, अतै सो मेरै प्राणा री तोपा मन्ज हिन।”

⁴ पर प्रमात्मैं यशायाह सोगी बल्लू, “मैंई अपणै तांयें सत हजार मर्दा जो रखूरा हा, जिन्यैं बाल देवता रै अगो घुटनै ना टेकै हिन।”

⁵ ठीक ऐस ही तरीकै ऐस टैमैं भी, मेरै अनुग्रह सोगी चुणुरै कुछ यहूदी मणु रा अक्क झुण्ड़ बाकी हा।

⁶ प्रमात्मैं रा असिओ चुनणा इन्दै भलै कमा रै अनुसार निय्आ पर तसेरै अनुग्रह पुर आधारित हा, अगर प्रमात्मैं रा मणु जो चुनणा मणु रै कमा पुर भुन्दा ता तसेरा अनुग्रह सचा ना भुन्दा।

⁷ ठेरा परिणाम कै भुआ? ऐह कि इस्त्राएली प्रमात्मैं रै अनुग्रह री खोज मन्ज थियै, पर सो तियां जो ना मुळु; पर प्रमात्मैं रै चुणुरै मणु जो मूलु, अतै बाकी मणु कठोर करै गै।

⁸ जियां पवित्रग्रन्था मन्ज लिखुरा; “प्रमात्मैं तियां जो अजा रै दिना तक भारी निन्द्रा मन्ज पाई रखूरा हा, अतै ऐसी हाख्री दितुरी जैड़ी ना हेरन अतै ऐसै कन जैड़ै ना हुणन।”

⁹ अतै राजा दाऊद बलदा; “तंयारा खाणा तियां तांयें जाल, फन्दा, ठोकर अतै दण्ड री वजह बणी गच्छा।

¹⁰ तंयारी हाख्री मन्ज नैहरा छाई गच्छा ताकि ना हेरी सकन, अतै तू सदा तंयारी पिठी जो झुकाई ही रख।”

¹¹ ता मेरा कै ऐह मतलब हा कि इस्त्राएल रै मणु पाप मन्ज पैई गान अतै दोबारा ना उठन? बिलकुल ना! पर तंयारी हार ही गैर यहूदी जो उद्धार पाणै तांयै रस्ता खोलदी हा ऐत थऊँ इस्त्राएल रै मणु जो जलन भुणीआ।

¹² अगर गैर यहूदी जो यहूदी रै पाप मन्ज पैणा थऊँ फायदा भूआ ता तंयारै पाप थऊँ फिरी ईणै मन्ज मता फायदा भूणा।

गैर यहूदी रा उद्धार

¹³ अऊँ तूसु गैर यहूदी सितै ऐह गल्ला बलदा कि जैहणै अऊँ तून्दा प्रेरित हा, ता अऊँ ऐसा सेवा रा घमण्ड़ करदा हा,

¹⁴ ताकि ऐसा सेवा रै जरियै अपणै यहूदी मणु मन्ज जलन पैदा करवाई करीके तियां मन्ज कईआ रा उद्धार करवाई सकू।

¹⁵ क्ओकि प्रमात्मैं द्धारा यहूदी रा त्याग करया गाणा संसार रै मणु रा मेल मिलाप रा कारण भुआ, ता जैहणै तियां मसीह जो ग्रहण करना ता तिन्या यहूदी रा मरूरै थऊँ जी भूणै रै बराबर भूणा।

¹⁶ क्ओकि अब्राहम अतै पूर्वज पवित्र थियै ता तंयारै वंशा रै मणु भी पवित्र भूणै जैस तरीकै पुरा आटा पवित्र भूच्ची गान्दा जैहणै तैत थऊँ थोड़ा जिनी पूजा तांयै अलग करदै हिन। जियां जड़ पवित्र हा ता डाळी भी पवित्र भूणी।

¹⁷ अगर कुछ डाळी अब्राहम रै रूखा थऊँ मतलब कुछ इस्त्राएल रै मणु जो त्रोड़ी दिता, अतै तुहै गैर यहूदी जैड़ै अक्क जंगली रूखा री डाळी थी अबै तुसिओ ऐस रूखा सोगी कलम करीके जोड़या गो हा। अबै तुहै तैहा आशीष जो पान्दै हिन जैड़ी अब्राहम अतै तसेरी औलाद तांयै वायदा करया गच्छुरा थू। अतै प्रमात्मैं रै तैस जैतून रै रूखा रा सहभागी भूआ।

¹⁸ ता ऐसा गल्ला रा घमण्ड़ मत करदै कि तुसिओ ऐस रूखा मन्ज कलम करीके लगाया गो अतै पुराणी डाळी त्रोड़ी दिता। याद रखा तुहै सिर्फ अक्क डाळी हिन जड़ ना।

¹⁹ शायद तुहै ऐह सोचु करदै हिन कि तिन्या जो डाळी सांईयै कटी दिता अतै तुसिओ तंयारी जगह कलम करीके लगाई दिता।

²⁰ ठीक हा, सो ता अविस्वासा री वजह थऊँ त्रोड़ी गई, पर तू विस्‍वासा मन्ज बणी रैहन्दा हा ठेरैतांये अभिमानी ना भो, पर डर रख,

²¹ क्ओकि जैहणै प्रमात्मैं स्वाभाविक डाळी जो कटी दिता ता तिजो भी कटी दिणा।

²² ऐसा गल्ला पुर ध्यान देय्आ कि कियां प्रमात्मां सख्त भी हा अतै दयालु भी हा। जिन्यै आज्ञा रा पालन ना करू तियां पुर सो सख्त हा, पर तिजो पुर दयालु हा अगर तू तसेरी दया पुर भरोसा करदा ता, अगर भरोसा छड़ी दिता ता तुसिओ भी डाळी सांईयै कटी दिणा।

²³ अगर यहूदी मसीह पुर विस्वास करना शुरू करन, ता प्रमात्मां तियां जो फिरी कलम करीके लगाई सकदा हा।

²⁴ तुहै गैर यहूदी तैस जंगली जैतून री डाळी सांईयै जैतिओ त्रोड़ी दिता थू अतै स्वभाव रै विरूद्ध खरै जैतून मन्ज कलम करीके लगाई गो। यहूदी तैस खरै रूखा सांईयै हिन जैड़ी स्वाभाविक डाळी हिन, तियां जो अपणै ही जैतून रै रूखा मन्ज दोबारा लगाणा प्रमात्मैं तांयै आसान हा।

पूरै इस्त्राएल रा उद्धार

²⁵ हे विस्वासी भाईओ, अऊँ ना चाहन्दा कि तुहै गैर यहूदी अपणै आपा पुर ज्यादा घमण्ड़ करन। अऊँ ऐस भेद जो साफ करना चाहन्दा जैड़ा इस्त्राएल रै मणु सोगी भूआ। कुछ मणु कठोर भूच्ची गै थियै अतै तिन्या तियां ही रैहणा, जैहणै तक पूरै गैर यहूदी मसीह पुर विस्वास ना करी लैन्दै।

²⁶ अतै ऐस तरीकै सितै पूरै इस्त्राएल उद्धार पाणा। जिंआं पवित्रग्रन्था मन्ज लिखुरा हा; “छुड़ाणैवाळा यरूशलेम थऊँ ईणा, अतै अभक्‍ति जो इस्त्राएल री औलाद थऊँ दूर करना।

²⁷ अतै तियां सोगी मेरा ऐह ही नौआ वायदा भूणा, मुँ तंयारै पापा जो माफ करी दिणा।”

²⁸ यहूदी प्रमात्मैं रै बैरी हिन क्ओकि सो सुसमाचार पुर विस्वास ना करना चाहन्दै। गैर यहूदी तांयै फायदै री गल्ल हा, पर प्रमात्मां यहूदी सोगी प्रेम करदा क्ओकि प्रमात्मैं पैहलै ही तियां जो अपणै तांयै चुणी लैऊरा थू अतै ऐह ही वायदा तिनी तंयारै पूर्वजा सोगी करूरा थू।

²⁹ क्ओकि प्रमात्मैं रै वरदान अतै बुलाहट अटल हा।

³⁰ क्ओकि जिंआं तुहै गैर यहूदी पैहलै प्रमात्मैं री आज्ञा ना मनी, पर अबै यहूदी री आज्ञा ना मनणै री वजह थऊँ तूसु पुर दया भून्दिआ।

³¹ तियां ही यहूदी भी अबै आज्ञा ना मनी, कि तूसु गैर यहूदी पुर जैड़ी दया भुन्दी हा ऐत थऊँ तियां पुर भी दया भोआ।

³² क्ओकि प्रमात्मैं सबी जो आज्ञा उल्लंघन रा कैदी बणाई रखूरा, ताकि सो सबी पुर दया करा।

प्रमात्मैं री स्तुति

³³ आये हाय! प्रमात्मैं रै अनुग्रह रा धन, ज्ञान अतै बुद्धि कै ही गम्भीर हा! कैतना असम्भव हा असु तांयै प्रमात्मैं रै फैसलै अतै तसेरै रस्तै जो समझणा।

³⁴ “प्रभु रै विचारा जो कोई ना जाणी सकदा, या कुण तसेरा सलाहकार बणी सकदा हा?

³⁵ या कुणी पैहलै तैसिओ कुछ दिता जठेरै बदलै तैसिओ दितिआ गच्छा?”

³⁶ क्ओकि सब कुछ प्रमात्मैं री तरफा थऊँ इन्दा अतै तिनी ही सब कुछ बणाऊ अतै सब कुछ तसेरा ही हा। तसेरी महिमा युगायुग भुन्दी रेय्आ। आमीन।