प्रकाशित वाक्य 5 - गददीमोहरबन्द कताब अतै मेम्ना 1 जैडा सिंहासन पुर बैहुरा थू, मैंई तसेरै सिधै हत्था मन्ज अक्क कताब हेरी जैत मन्ज अंदर अतै बाहर लिखुरा थू, अतै सो सत मोहरा लाई करी बंद करूरी थी। 2 फिरी मैंई अक्क ताकतवर स्वर्गदूता जो हेरू जैडा जोरा जोरा सितै ऐह प्रचार करू करदा थू, “ठेरी मोहरा जो तोड़णै रै अतै ऐसा कताबा जो खोलणै रै योग्य कुण हा?” 3 पर ना स्वर्गा मन्ज, ना धरती पुर, ना धरती रै थलै कोई ऐसा कताबा जो खोलणै या ऐतिओ पढ़नै रै योग्य निकळू। 4 ता अऊँ फूटी-फूटी करी रूणा लगा, क्ओकि ऐसा कताबा जो खोलणै या ऐतिओ पढ़नै रै योग्य कोई ना मुळु। 5 ता तियां स्याणै मन्ज अक्कीयै मिंजो सोगी बल्लू, “मत रो, हेर, यहूदा रै गोत्रा रा सो शेर जैडा दाऊद रा वंश हा अतै तिनी शैतान पुर जय पाई हा ठेरैतांये तैस ऐसा कताबा जो खोलणा अतै सो तठेरी सत मोहरा त्रोड़णै रै योग्य हा।” 6 ता मैंई तैस सिंहासन अतै तियां चंऊर प्राणी अतै तियां स्याणै रै मन्जै मना अक्क वध करूरै मेम्नै जो खडूरा हेरू। तसेरै सत हिंग अतै सत हाख्री थी, ऐह प्रमात्मैं री सत आत्मा हिन जैड़ी सब धरती पुर भैजुरी हिन। 7 मेम्नै अगो ईच्ची करी तसेरै सिधै हत्थै थऊँ जैडा सिंहासन पुर बैहुरा थू, सो कताब लेई। 8 जैहणै तिनी कताब लेई, ता चंऊर प्राणी अतै चौबी स्याणै तैस मेम्ना रै सामणै झुकी गै। तियां सबी स्याणै रै हत्था मन्ज बाजै अतै धूप, जैड़ै पवित्र मणु री प्रार्थना हिन, तैत सोगी भरूरै सोनै रै कटोरै थियै। 9 सो ऐह नौआ गीत गाणा लगै, “तू ऐसा कताबा जो लैणै, अतै ठेरी मोहरा खोलणै रै योग्य हा, क्ओकि तैंई वध भूच्ची करी अपणै खूना सोगी हर कुल अतै भाषा अतै मणु अतै जाति थऊँ प्रमात्मैं तांयें मणु जो खरीदी लैऊ हा, 10 अतै तियां जो इंदै प्रमात्मैं तांयें अक्क राज्य अतै याजक बणाऊ, अतै सो धरती पुर राज्य करदै हिन।” 11 जैहणै मैंई दोबारा हेरू, ता तैस सिंहासन अतै तियां प्राणी अतै तियां स्याणै रै चंऊ कनारी मतै सारै स्वर्गदूता री आवाज हुणी, जंयारी गिणती लखा अतै करोडा री थी। 12 सो जोरा जोरा सितै गाऊ करदै थियै, “बलिदान करूरा मेम्ना ही सामर्थ, धन, ज्ञान, शक्ति, आदर, महिमा अतै धन्यवाद रै योग्य हा।” 13 फिरी मैंई स्वर्गा मन्ज अतै धरती पुर अतै धरती रै थलै, समुंद्र री सब बणाऊरी चिजा जो, अतै सब कुछ जैडा तैत मन्ज हा, ऐह गान्दै हुणु, “जैडा सिंहासन पुर बैहुरा तसेरा अतै मेम्नै रा धन्यवाद अतै आदर अतै महिमा अतै राज्य युगायुग रेय्आ।” 14 चारो प्राणी आमीन बल्लू, अतै स्याणै झुकी करी प्रणाम करू। |
This work is licensed under Creative Commons Attribution-ShareAlike 4.0 License.