प्रकाशित वाक्य 3 - गददीसरदीस जो संदेश 1 “सरदीस शहर री कलीसिया रै दूत जो ऐह लिख, जैस वलै प्रमात्मैं री सत आत्मा अतै सत तारै हिन, सो ऐ बलदा हा कि, अऊँ तेरै कम्मा जो जाणदा हा, तू विस्वासयोग्य विस्वासी सांईयै ता लगदा पर असल मन्ज तू मेरी शिक्षा अनुसार ना चलु करदा। 2 ठेरैतांये जागदै रेय्आ, अतै मिन्जो पुर अपणै विस्वास जो मजबुत करा ताकि ऐसा ना भोआ कि तून्दा जैड़ा विस्वास थोड़ा हा सो भी खत्म ना भूच्ची गच्छा। अऊँ जाणदा हा कि तेरी जैड़ी कमी हा सो ज्यादा हा क्ओकि प्रमात्मां तेरै कमा थऊँ खुश निय्आ। 3 ठेरैतांये याद कर कि तैंई किनी शिक्षा पाऊरी अतै हुणुरी थी, अतै तैत मन्ज बणी रैह अतै अपणै पापा थऊँ मन फेरा। अगर तू जागृत ना रैऊ ता मुँ चोरा सांईयै अचानक चली ईणा अतै तिजो कदी भी पता ना लगणा कि मुँ कहा घड़ी तिजो वलै ईच्ची रैहणा। 4 पर हाँ सरदीस शहर मन्ज कुछ ऐसै विस्वासी हिन जियें अपणी जिन्दगी जो शुद्ध रखूरा हा। तिन्या शुद्ध चिट्टै ओड़णा लाई करी मिन्जो सोगी रैहणा क्ओकि सो ठेरै लायक हिन। 5 जैडा जय पान तैसिओ तियां ही चिट्टै ओढण पहनाणै हिन, अतै मुँ तसेरा ना जिन्दगी री कताबा थऊँ कसी भी रीति सितै ना कटणा, पर तसेरा नां अपणै पितै अतै स्वर्गदूता रै सामणै मनी लैणा। 6 कना खोली करी मेरी गल्ला हुणी लेय्आ कि पवित्र आत्मा कलीसिया सीतै कै बलदा हा। फिलदिफीया जो संदेश 7 “फिलदिफीया शहर री कलीसिया रै दूत जो ऐह लिख, अऊँ पवित्र अतै सचा हा अतै मिन्जो बलै सो कुंजी हिन जैड़ी दाऊद री हा, जैहणै अऊँ दारा जो खोलदा ता कोई बंद ना करी सकदा, अतै मेरै बंद करूरै दारा जो कोई खोली ना सकदा। 8 सो ऐह बलदा कि, अऊँ जाणदा हा कि तू ज्यादा ताकतवर निय्आ फिरी भी तैंई मेरी आज्ञा रा पालन करू अतै मिन्जो पुर विस्वास रखू हा ठेरैतांये मैंई तिजो तांयै अक्क दार खोलुरा हा जैतिओ कोई बन्द ना करी सकदा। 9 हेर, अऊँ तिन्या मणु जो जाणदा हा जैड़ै ऐह बलदै हिन कि सो यहूदी प्रमात्मैं रै चुणुरै मणु हिन पर असल मन्ज ना हिन पर सो तैहा मण्ड़ळी रै सदस्य हिन जैडा शैतान री हा। मुँ ऐसा करना कि तियां ईच्ची करी तेरै पैरा पुर झुकी गाणा, अतै तियां ऐ जाणी गाणा कि तुहै ही सो मणु हिन जिन्या सोगी अऊँ प्रेम करदा हा। 10 क्ओकि मैंई आज्ञा दितुरी थी धीरज सोगी दुखा जो सैहणै तांयै, जठेरा तैंई पालन करू हा ठेरैतांये जैहणै ऐस पूरै संसार मन्ज रैहणै बाळै पुर परीक्षा रा टैमं ईणा ता मुँ तेरी रक्षा करनी हा। 11 अऊँ तोळा ईणैबाळा हा ठेरैतांये अपणै विस्वास मन्ज बणी रैह ताकि कोई तिजो थऊँ तेरै इनाम जो खुस्सी ना लेय्आ जैड़ा प्रमात्मैं तेरै तांयै रखूरा। 12 जैडा जय पा सो प्रमात्मैं रै मन्दरा मन्ज अक्क खंभै सांईयै भूणा जसेरी अऊँ सेवा करदा हा अतै तिन्या जो कदी मन्दर छड़णा ना पैणा। मुँ तंयारै शरीरा पुर प्रमात्मैं रा नां लिखणा जैत सोगी ऐह पता लगणा कि ऐह तसेरै हिन अतै प्रमात्मैं रै शहर रा नां भी लिखणा जैतिओ नौआ यरुशलेम बलदै हिन। ऐह सो शहर हा जैड़ा मेरै प्रमात्मैं री तरफा थऊँ स्वर्गा थऊँ उतरी ईणा अतै मुँ तैड़ी अपणा नौआ नां तिन्या पुर लिखणा हा। 13 कना खोली करी मेरी गल्ला हुणी लेय्आ कि पवित्र आत्मा कलीसिया सीतै कै बलदा हा।” लौदीकिया जो संदेश 14 “लौदीकिया शहर री कलीसिया रै दूत जो ऐह लिख, अऊँ ही आमीन हा क्ओकि अऊँ ही विस्वासयोग्य हा अतै अऊँ ही पक्का करदा कि प्रमात्मां सचा हा, अऊँ ही सो हा जसेरै द्धारा प्रमात्मैं सबी चिजा री रचना करी। 15 अऊँ तेरै सबी कम्मा जो जाणदा हा, तू इनकार ना करदा कि तू मिन्जो पुर भरोसा रखदा, पर तू मिन्जो सोगी ज्यादा प्यार भी ना करदा। तू ऐसा हा जियां पाणी ना ता ठंड़ा अतै ना ही गर्म हा खरा भुन्दा तू ठंड़ा या गर्म भुन्दा। 16 ठेरैतांये कि तू गुनगुना हा, ना तू ठंड़ा अतै ना ही गर्म हा, मुँ तिजो अपणै मुँहा थऊँ उँगळी दिणा मतलब कि तून्दा विस्वास मिन्जो पुर पूरी रीति सितै निय्आ ठेरैतांये मुँ तुसिओ त्यागी दिणा। 17 तुहै सोचदै हिन कि तुहै अमीर हिन अतै तूसु बलै कसी चिजा री कमी निय्आ पर तुहै सच्चाई जो ना जाणदै क्ओकि सच्चाई ता ऐह हा कि तुहै अभागै हिन, तुच्छ हिन, कंगाल हिन, अन्धै हिन अतै नंगे हिन क्ओकि तुहै मिन्जो पुर थोड़ा ही भरोसा करदै हिन। 18 ठेरैतांये अऊँ तिजो सलाह दिन्दा कि अगी मन्ज तपाऊरा सोना मिंजो थऊँ खरीदी लै ताकि तू अमीर भूच्ची गच्छा, अतै चिट्टै कपड़ै लेई लै ताकि तिजो तियां जो पैहनी करी अपणै नगैंपना थऊँ शर्म ना भुआ, अतै अपणी हाख्री मन्ज लाणै तांऐ सुर्मा लेई लै ताकि तू हेरना लगा। 19 अऊँ जिन्या जिन्या सितै प्रेम करदा हा, तियां सबी जो डांट अतै ताड़ना दिन्दा हा; ऐस तांयें तू तोंळ कर अतै मन फेर। 20 हेर, अऊँ दारा पुर खड़ी करी खटखटान्दा, अगर कोई मेरा बोल हुणी करी दारा खोलला ता मुँ तैस बलै ईच्ची करी तैस सोगी रोटी खाणी हा अतै तैस मिन्जो सोगी। 21 जैड़ा जय पा मुँ सो अपणै सोगी अपणी गद्दी पुर बहालना, जियां अऊँ भी जय पाई करी अपणै पिता सोगी तसेरी गद्दी पुर बैहुरा हा। 22 कना खोली करी मेरी गल्ला हुणी लेय्आ कि पवित्र आत्मा कलीसिया सीतै कै बलदा।” |
This work is licensed under Creative Commons Attribution-ShareAlike 4.0 License.