प्रकाशित वाक्य 22 - गददी1 फिरी तिनी मिन्जो बिल्लौर सांईयै झलकदी, जिन्दगी रै पाणी री नदी दसी, जैड़ी प्रमात्मैं अतै मेम्नै रै सिंहासन थऊँ निकळी करी 2 तैस नगर री सड़क रै मन्जै वगदी थी। नदी रै दोनो तरफ जिन्दगी रा रुख थू, तैत मन्ज बारह तरह रै फल लगदै थियै, अतै सो हर महीनै फलदा थू; अतै तैस रूखा रै पतै थऊँ जाति जाति रै मणु चंगै भुन्दै थियै। 3 फिरी प्रमात्मैं द्धारा हरापित कोई भी चिज तैस नगरा मन्ज ना भूणी हा। प्रमात्मैं अतै मेम्नै रा सिंहासन तैस नगरा मन्ज भूणा अतै प्रमात्मैं रै दासा प्रमात्मैं री सेवा करनी हा। 4 तियां प्रमात्मैं जो आमणै-सामणै हेरना, अतै तसेरा नां तंयारै मत्थै पुर लिखुरा भूणा। 5 फिरी रात ना भूणी, अतै तियां जो दीया अतै सूरज रै उजियाले री जरूरत ना भूणी, क्ओकि प्रभु प्रमात्मैं तिन्या जो लौ दिणी हा, अतै तिन्या युगायुग राज्य करना। यीशु रा पुनरागमन 6 फिरी स्वर्गदूतै मिन्जो सोगी बल्लू, “जैड़ा कुछ तैंई हुणु अतै हेरू हा ऐह विस्वासयोग्य अतै सच हा। प्रभु प्रमात्मां, जैड़ा अपणै भविष्यवक्ता जो प्रेरणा दिन्दा हा तिनी अपणै स्वर्गदूता जो भैजु कि अपणै दासा जो दसी सका कि ईणै बाळै टैमां मन्ज कै कुछ भूणा हा।” 7 प्रभु यीशुऐ बल्लू “हेर, अऊँ जल्दी ईणैबाळा हा धन्य हा सो, जैडा ऐसा कताबा री भविष्यवाणी री गल्ला जो मन्दा।” 8 अऊँ सो ही यूहन्ना हा, जैडा ऐह गल्ला हुणदा अतै हेरदा थू। जैहणै मैंई हुणु अतै हेरू, ता जैडा स्वर्गदूत मिन्जो ऐह गल्ला दसदा थू, अऊँ तसेरै पैरा पुर आराधना करनै तांयें पैई गो। 9 पर तिनी मिन्जो सोगी बल्लू, “हेर, ऐसा मत कर; क्ओकि भविष्यवक्ता, अतै ऐस कताबा री गल्ला जो मनणैवाळै मणु सांईयै अऊँ भी अक्क दास हा। तू सिर्फ प्रमात्मैं ही जो प्रणाम कर।” 10 फिरी तिनी मिन्जो सोगी बल्लू, “ऐसा कताबा री भविष्यवाणी री गल्ला जो गुप्त मत रख, क्ओकि ठेरा पुरा भूणै रा टैमं नेड़ै हा। 11 ठेरैतांये जैडा अन्याय करदा हा, सो अन्याय ही करदा रेय्आ, जैडा दुष्ट हा, सो दुष्ट बणी रेय्आ, तैस तरीकै ही जैडा धर्मी हा, सो धर्मी बणी रेय्आ अतै जैडा पवित्र हा; सो पवित्र बणी रेय्आ।” 12 प्रभु यीशुऐ बल्लू “हेर, अऊँ जल्दी ईणैबाळा हा अतै मुँ हरेक जो तंयारै कम्मा रै अनुसार इनाम अतै दण्ड़ दिणा। 13 अऊँ ही अल्फा अतै ओमेगा, पैहला अतै आखरी, आदि अतै अन्त हा। 14 “धन्य हिन सो, जैड़ै अपणै चोळै जो धोई लैन्दै हिन, क्ओकि तिन्या जो जिन्दगी रै रूखा थऊँ फळ खाणै रा अधिकार मुळना, अतै सो आजादी सोगी तैस नगर मन्ज प्रवेश करी सकदै हिन। 15 पर दुष्ट, टोन्णै, व्यभिचारी, हत्यारै, मूर्तिपूजक, अतै हरेक झूठ रा चाहणैवाळै अतै धोखा दिणैबाळै शहर रै बाहर रैहणा। 16 “अऊँ यीशु हा अतै मैंई अपणै स्वर्गदूता जो ठेरैतांये तूसु बल्लै भैजुरा कि सो इन्या गल्ला जो सब कलीसिया मन्ज बल्ली सका। अऊँ राजा दाऊद रै वंश हा, अतै तैस तारै सांईयै हा जैड़ा भ्यागा रै टैमैं चमकदा हा।” 17 पवित्र आत्मा अतै मेम्नै री दुल्हन दोनो यीशु सोगी बलदी हिन, “आई!” अतै इन्या गल्ला जो हुणनैबाळा भी बला, “आई!” ता जैडा कोई त्रिहणा भोआ सो अईआ अतै जिन्दगी रा पाणी मुफ्त पिआ। उपसंहार 18 अऊँ यूहन्ना हरेक मणु जो चेतावनी दिन्दा जैडा ऐसा कताबा री लिखुरी भविष्यवाणी जो हुणदा हा, अगर तुहै इन्या गल्ला सोगी मिलावट करीके बढ़ान्दै हिन, ता प्रमात्मैं तूसु तांयै दण्ड़ बढ़ाणा। प्रमात्मैं तिन्या महामारी सोगी दण्ड़ दिणा हा जठेरै बारै मन्ज मैंई ऐसा कताबा मन्ज लिखुरा हा। 19 अगर कोई ऐसा भविष्यवाणी री कताबा री गल्ला मन्ज कुछ नकाळी देय्आ, ता प्रमात्मां तैस जिन्दगी रै रूखा अतै पवित्र नगरा मन्ज, जैसेरा वर्णन ऐसा कताबा मन्ज हा, तठेरा हेस्सा नकाळी दिणा। 20 यीशु सो हा जैड़ा इन्या गल्ला री गवाही दिन्दा सो ऐह बलदा, “हाँ, अऊँ जल्दी ईणैबाळा हा।” आमीन। मैंई जवाव दिता, “हे प्रभु यीशु आई!” 21 अऊँ प्रार्थना करदा हा कि प्रभु यीशु रा अनुग्रह पवित्र मणु रै सोगी भुन्दा रेय्आ। आमीन। |
This work is licensed under Creative Commons Attribution-ShareAlike 4.0 License.