प्रकाशित वाक्य 20 - गददीहजार साला रा राज्य 1 फिरी मैंई अक्क स्वर्गदूता जो स्वर्गा थऊँ ओसदै हेरू, जसेरै हत्था मन्ज अथाह कुण्ड़ री कुंजी अतै अक्क बड़ी जंजीर थी। 2 तिनी तैस अजगर, मतलब पूराणै कीड़ै जो, जैडा शैतान हा, पकड़ी करी हजार साल तांयें बनी दितुरा हा। 3 तिनी तैसिओ अथाह कुण्ड़ मन्ज पाई करी बन्द करी दितुरा अतै तैस पुर मोहर लाई दितुरी कि सो हजार साल रै पूरै भूणै तक जाति जाति रै मणु जो फिरी ना भरमा। ऐत थऊँ बाद जरूरी हा कि सो थोड़ी देर तांयें फिरी खोलया गाणा। 4 फिरी मैंई सिंहासन हेरै, अतै तियां पुर मणु बैहुरै हेरै, अतै तियां जो न्याय करनै रा अधिकार दिता गो। मैंई तंयारी आत्मा जो भी हेरू, जंयारै सिरा जो यीशु री गवाही दिणै अतै प्रमात्मैं रै बचना री वजह कटुरा थू, अतै जिन्यैं ना तैस पशु री, अतै ना तसेरी मूर्ति री पूजा करी थी, अतै ना तसेरी मोहर अपणै हत्था अतै मत्थै पुर लाऊरी थी। सो जिन्दै भूच्ची करी मसीह सोगी हजार साला तक राज्य करदै रैह। 5-6 ऐह सो मणु हिन जिन्या जो पैहली बरी जिन्दा करया गाणा अतै सो सच मन्ज धन्य अतै पवित्र हिन। दूई मौत रा इन्या मणु पुर कोई अधिकार निय्आ। इन्या प्रमात्मैं अतै मसीह तांयै याजक बनणा अतै इन्या सोगी हजार साल तक राज्य करना। होरी मरूरै मणु जो जिन्दा ना करया गाणा जैहणै तक हजार साल पूरै ना भूच्ची गान्दै। शैतान रा विनाश 7 जैहणै हजार साल पूरै भूच्ची गाणै ता शैतान कैदा थऊँ छड़ी दिणा। 8 तैस तियां जाति जो जैड़ी चऊँ कनारी धरती पुर भुणीआ, मतलब गोग अतै मागोग जो जंयारी गिणती समुंद्र री रेता रै बराबर भुणीआ, भरमाईकरी लड़ाई तांयें इकट्ठा करनै जो निकलणा। 9 सो पूरी धरती पुर फैली करी तैस नगर जो घेरी लैणा जिन्या सोगी प्रमात्मां प्रेम करदा हा जैड़ी पवित्र मणु रैहन्दै हिन, अतै अगी स्वर्गा थऊँ ओसी करी शैतान री पूरी सेना जो भस्म करी दिणा। 10 तियां जो भरमाणै बाळा शैतान अगी अतै गन्धक री तैहा झीला मन्ज, जैत मन्ज सो पशु अतै झूठा भविष्यवक्ता भी भूणा, पाई दिणा हा, अतै तिन्या रात दिन युगायुग पीड़ा मन्ज तड़पदै रैहणा। बड़ा सफेद सिंहासन अतै अन्तिम न्याय 11 फिरी मैंई प्रमात्मैं जो अक्क बड़ा सफेद सिंहासन पुर बैहुरा हेरू, तसेरै सामणै थऊँ धरती अतै अम्बर गायब भूच्ची गै, कुणिए भी तिन्या जो फिरी ना हेरू। 12 फिरी मैंई हल्कै बड़ै सब मरूरै जो सिंहासन रै सामणै खडुरै हेरू, फिरी कई कताबा खोली गई अतै फिरी जिन्दगी री कताब जो खोलया गो, जिन्या तैहा कताबा मन्ज लिखुरा थू, तिन्या ही तंयारै कम्मा रै अनुसार मरूरै रा न्याय करआ गो। 13 समुंद्रै अपणै मन्ज पैऊरै मरूरै मणु जो दी दिता, अतै मौती अतै अधोलोक भी तिन्या मणु जो दी दिता जैड़ै तिन्या बलै थियै अतै तिन्या सबी रा तंयारै कम्मा अनुसार न्याय करया गो। 14 मौत अतै अधोलोक भी अगी री झीला मन्ज पाऐ गै। ऐह अगी री झील दूई मौत हा। 15 अतै जैस कसी रा नां जिन्दगी री कताबा मन्ज लिखुरा ना मूळु, सो अगी री झीला मन्ज पाई दिता। |
This work is licensed under Creative Commons Attribution-ShareAlike 4.0 License.