प्रकाशित वाक्य 17 - गददी

बड़ी वेश्या

¹ जिन्या सत स्वर्गदूता बलै सो सत कटोरै थियै, तियां मन्ज अक्कीयै ईच्ची करी मिन्जो बल्लू, “ऐठी अई, अऊँ तिजो अक्क बड़ी वेश्या रा दण्ड दसदा, जैड़ी मतै सारै पाणी पुर बैहुरी हा।

² जैसा सोगी धरती रै राजै व्यभिचार करू; अतै धरती रै रैहणै बाळै तसारै व्यभिचार री शराब सोगी मतवाळै भूच्ची गै थियै।”

³ फिरी पवित्र आत्मा री मदद सोगी स्वर्गदूत मिन्जो बणा मन्ज लेई गो, अतै मैंई लाल रंगा रै पशु पुर, जैडा बुराई रै नां सोगी भरूरा थू अतै जसेरै सत सिर अतै दस हिंग थियै, अक्क जनानी जो बैहुरै हेरू।

⁴ ऐह जनानी बैंगणी अतै लाल रंगा रै कपड़ै लाई करी बैहुरी थी, अतै सोनै अतै किमती मणी अतै मोती सोगी सजुरी थी, अतै तैसारै हत्था मन्ज अक्क सोनै रा कटोरा थू जैडा घृणित चिजा थऊँ अतै तेसेरै व्यभिचार री अशुद्ध चिजा सोगी भरूरा थू।

⁵ तसारै मत्थै पुर अक्क नां लिखुरा थू, जठेरा अक्क गुप्त भेद हा, “अऊँ ही बेबीलोन नगर हा जैड़ा संसार री बुरी चिजा अतै वेश्या री माँ हा।”

⁶ मैंई तैहा जनानी जो पवित्र मणु रा खून अतै यीशु रै गवाह रा खून पीणै सोगी मतवाळी हेरू, तैहा जो हेरी करी अऊँ हैरान भूच्ची गो।

⁷ ता तिनी स्वर्गदूतै मिन्जो सोगी बल्लू, “तू कजो हैरान भूआ? अऊँ ऐसा जनानी अतै ऐस पशु रा, जैस पुर ऐह सवार हा अतै जसेरै सत सिर अतै दस हिंग हिन, तिजो भेद दसदा।

⁸ जैडा पशु तैंई हेरू हा, सो पैहलै ता थू पर अबै निय्आ, अतै अथाह कुण्ड़ थऊँ निकळी करी विनाश मन्ज पैणा, अतै धरती रै रैहणैवाळै जंयारै नां संसारा री उत्पति रै टैमां थऊँ जिन्दगी री कताबा मन्ज ना लिखै गै, तिन्या ऐस पशु जो जैड़ा मरी गच्छुरा थू दोबारा हेरी करी हैरान भूच्ची गै”।

⁹ ज्ञान ऐत मन्ज ही हा जैसिओ बुद्धि भोआ सो ऐह समझी लेय्आ कि सो सत सिर सत पहाड़ जिंआं पुर सो जनानी बैहुरी हा। ऐह सत पहाड़ सत राजा जो भी दर्शान्दै हिन।

¹⁰ पँज राजा ता मरी चुकुरै हिन अतै अक्क अबै हा जैड़ा राज करू करदा अतै आखरी हालि तक आ निय्आ, अतै जैहणै तैस ईणा ता कुछ टैमां तक ही राज करना हा।

¹¹ जैडा पशु पैहलै थू, अतै अबै निय्आ, सो अठुँवा राजा हा अतै तिन्या सत राजा सांईयै हा, अतै सो भी विनाश री कनारी चलूरा हा।

¹² जैड़ै दस हिंग तैंई हेरै सो दस राजा हिन जिन्यैं हालि तक राज्य ना पाऊ, पर तैस पशु सोगी घड़ी भर तांयें राजा सांईयै अधिकार पाणा।

¹³ इन्या सबी अक्क मन भूणा, अतै अपणी अपणी सामर्थ अतै अधिकार तैस पशु जो दिणा।

¹⁴ तिन्या मेम्नै सोगी लड़ना, अतै मेम्ना तियां पुर जय पाणिआ, क्ओकि सो प्रभु रा प्रभु अतै राजा रा भी राजा हा, अतै जैड़ै हैदुरै अतै चुणुरै हिन अतै विस्वासी हिन सो तैस सोगी हिन, तिन्या भी जय पाणी हा।

¹⁵ फिरी तिनी मिन्जो सोगी बल्लू, “जैड़ै पाणी तैंई हेरै, जिंआं पुर वेश्या बैहुरी हा, सो ता मणु री भीड़ हा हरेक जाति अतै भाषा थऊँ।

¹⁶ जैड़ै दस हिंग तैंई हेरै हिन सो दस राजा हिन, तिन्या अतै पशु तैहा वेश्या सोगी बैर रखणा, अतै तैहा जो लाचार अतै नंगी करी दिणा, अतै तसारा मांस खाई गाणा, अतै तैहा जो अगी मन्ज फूकी दिणा।

¹⁷ क्ओकि प्रमात्मैं तंयारै मना मन्ज ऐह पाणा कि तसारी इच्छा पूरी करा, अतै जैहणै तक प्रमात्मैं रा बचन पुरा ना भोआ तैहणा तक अक्क मन भूच्ची करी अपणा अपणा राज्य पशु जो दि देय्आ।

¹⁸ सो जनानी, जेहा जो तैंई हेरूरा, सो बड़ा नगर हा जैडा धरती रै राजा पुर राज्य करदा हा।”