प्रकाशित वाक्य 13 - गददी

दोई पशु

¹ ता मैंई अक्क डरावनै पशु जो समुंद्र थऊँ निकळदै हेरू, जसेरै दस हिंग अतै सत सिर थियै। तसेरै हिंगा पुर दस राजमुकट अतै तसेरै हरेक सिरा पुर ऐसा नां थू जैड़ा प्रमात्मैं री निन्दा करदा थू।

² जैडा ड़रावना पशु मैंई हेरू सो चीतै सांईयै थू, अतै तसेरै पैर भालू सांईयै थियै, अतै मुँह शेरा सांईयै थू। तिनी अजगरै अपणी सामर्थ अतै अपणा सिंहासन अतै बड़ा अधिकार तैसिओ दि दिता।

³ मैंई तसेरै सिरा मन्ज अक्क ऐसा जख्म लगुरा हेरू मना सो मरनै पुर हा, फिरी तसेरा प्राण घातक जख्म खरा भूच्ची गो, अतै सब धरती रै मणु हैरान भूच्ची गै अतै तैस पशु पिचो हैरानी सोगी चली पै।

⁴ मणुऐ अजगरा री पूजा करी, क्ओकि तिनी तैस पशु जो अपणा अधिकार दि दिता थू, अतै ऐह बली करी पशु री पूजा करी, “ऐस पशु सांईयै कुणआ? कुण ऐस सोगी लड़ी सकदा?”

⁵ प्रमात्मैं तैसिओ डींग मारनै अतै निन्दा करनै तांयें अक्क मुँह दितुरा, अतै तैसिओ बताळी महीनै तक कम करनै रा अधिकार दितुरा हा।

⁶ तिनी प्रमात्मैं रै नां री निन्दा करी तिनी स्वर्गा री भी निन्दा करी जैड़ी प्रमात्मां रैहन्दा हा अतै तैस सोगी रैहणै बाळै री भी निन्दा करी।

⁷ तैसिओ ऐह भी अधिकार दिता गो कि सो पवित्र मणु सोगी लड़ा अतै तियां पुर जय पा, अतै तैसिओ हरेक कुल अतै मणु अतै भाषा अतै जाति पुर अधिकार दिता गो।

⁸ धरती रै तिन्या सबी रैहणैवाळै तैस पशु री पूजा करनी हा, जंयारै नां तैस मेम्नै री जिन्दगी री कताबा मन्ज लिखै ना गै, जैडा संसार री उत्पति थऊँ घात करूरा हा।

⁹ कना खोली करी मेरी गल्ला हुणी लेय्आ,

¹⁰ जैसिओ कैद मन्ज पैणा हा सो कैदा मन्ज पैणा, जैस तलवारा सितै मारना जरूरी हा सो तलवारा सोगी मारया गच्छा। पवित्र मणु रा धीरज अतै विस्वास ऐत मन्ज ही परखा गाणा।

¹¹ फिरी मैंई अक्क होर डरावनै पशु जो धरती थऊँ निकळदै हेरू, तसेरै मेम्नै सांईयै दोई हिंग थियै, अतै सो अजगर सांईयै वलु करदा थू।

¹² तिनी तैस पैहलै पशु रा सब अधिकार इस्तेमाल करू, अतै धरती अतै तैत मन्ज रैहणै बाळै थऊँ तैस पैहलै पशु री, जैसेरा प्राण घातक जख्म खरा भूच्ची गो थू, पूजा करांदा थू।

¹³ सो बड़ै-बड़ै चमत्कार दसदा थू, ऐड़ी तक कि मणु रै सामणै स्वर्गा थऊँ धरती पुर अग बरसाई दिन्दा थू।

¹⁴ तियां चमत्कारा री वजह थऊँ, जिंआं जो तैस पशु रै सामणै दसणै तांयें अधिकार तैसिओ दितुरा थू, सो धरती मन्ज रैहणै बाळै जो भरमांदा थू अतै धरती रै रैहणै बाळै जो बलदा थू कि जैस पशु जो तलवारा री लगुरी थी सो जी भूआ, तसेरी मूर्ति बणा।

¹⁵ तैसिओ तैस पशु री मूर्ति मन्ज प्राण दिणै रा अधिकार दिता गो कि मूर्ति बलणा लगा, अतै जैतणै मणु तैहा मूर्ति री पूजा ना करन, तियां जो मारी देय्आ।

¹⁶ तिनी हल्कै मोट्टै, अमीर-गरीब, आजाद-गुलाम सबी रै सज्जै हत्थ या तंयारै मत्थै पुर अक्क मोहर लाई दितुरी हा,

¹⁷ ताकि सो ही लेन देन ना करी सकदा जैस पुर मोहर मतलब तैस पशु रा नां या तसेरै नां रा अंक भोआ।

¹⁸ ज्ञान ऐत मन्ज ही हा जैसिओ बुद्धि भोआ सो ऐस पशु रा अंक जोड़ी लेय्आ, क्ओकि सो मणु रा अंक हा, अतै तसेरा अंक छिआ हौअ छियाट हा।