फिलिप्पियों 4 - गददीव्यावहारिक निर्देश 1 ऐत तांई मेरै विस्वासी भाईओ, तूसु सोगी अऊँ बड़ा प्यार करदा। तूसु सोगी मिलणै री मेरी बड़ी इच्छा हा जैड़ा मेरी खुशी अतै घमण्ड़ रा कारण हा। प्यारे भाईओ प्रभु पुर ईयां ही विस्वास मन्ज मजबुत अतै आज्ञाकारी रेय्आ। 2 अऊँ यूओदिया अतै सुन्तुखे दूनी बैहणी सोगी बिनती करदा कि सो प्रभु मन्ज एक मन भूच्ची करी अप्पू मन्ज मेल-मिलाप करी लेय्आ, क्ओकि तुहै प्रभु सोगी जुडुरै हिन। 3 अतै मिन्जो सोगी सच्चाई सितै कम करनै बाळै साथी सोगी भी बिनती करदा कि, तू तियां जनानी री मेल-मिलाप करनै मन्ज मदद कर। क्ओकि तिऐं मिन्जो सोगी सुसमाचार फैलाणै मन्ज, दुखा क्लेशा मन्ज अतै मेरै साथी कलेमेंस सोगी मेहनत करूरी हा, जिआंरै कि नां जिन्दगी री कताबा मन्ज लिखुरै हिन। 4 प्रभु मन्ज हमेशा खुश रेय्आ, अऊँ फिरी बल्दा कि खुश रेय्आ। 5 तून्दा कोमल स्वभाव सबी पुर प्रकट भोआ कजो कि प्रभु रा दोबारा आगमन नेड़ै हा। 6 कसी भी गल्ला री चिन्द मत करा पर हर अक्क हालात मन्ज प्रार्थना करा। तुन्दी प्रार्थना अतै बिनती धन्यवाद सोगी प्रमात्मैं रै सामणै हाजिर करै गाहन। 7 ता प्रमात्मैं री शान्ती जैड़ी कि मणु री समझ थऊँ बिलकुल बाहर हा, तून्दै दिला अतै विचारा जो मसीह यीशु सम्भाळी करी रखा। 8 आखिर मन्ज, हे भाईओ, जैड़ी-जैड़ी गल्ला सच हिन, जैड़ी-जैड़ी गल्ला आदर-मान जोगी हिन, जैड़ी-जैड़ी गल्ला ठीक हिन, जैड़ी-जैड़ी गल्ला पवित्र हिन, जैड़ी-जैड़ी गल्ला छैळ हिन, जैड़ी-जैड़ी गल्ला मनां जो भान्दी हिन, आखरी, जैड़ी-जैड़ी खरै गुणा बाळी अतै प्रशंसा योग्य हिन तियां पुर ही मन लगाऊ करा। 9 जैड़ी गल्ला तुसै मिन्जो थऊँ सिखुरी हिन अतै मनुरी हिन अतै हुणुरी हिन अतै मिन्जो मन्ज हेरूरी हिन तियां जो ही मन्नु करा ता शान्ती रा प्रमात्मां तूसु सोगी रैहणा। दान तांयें धन्यवाद 10 अऊँ प्रभु मन्ज बड़ा खुश हा कि अबै ऐतनै दिन बाद तुसिओ मेरी याद आई अतै तुहै मेरी आर्थिक मदद करी हा, जरूर तूसु जो शुरू मन्ज भी ठेरा विचार थू, पर तुसिओ मेरी मदद करनै रा मौका ना मुळु। 11 ऐह ना कि मिन्जो बल्लै कसी चिजा री कमी हा, क्ओकि मैंई ऐह सिखुरा कि जैस भी हालात मन्ज अऊँ हा तैत पुर सन्तुष्ट ररेऊँ। 12 अगर मिन्जो बल्लै थोड़ी चिजा हिन तांभी या मती हिन तांभी, भूखा रैहणा अतै रजणा दूनी हालात मन्ज अऊँ जीणा जाणदा। हर अक्क गल्ला मन्ज अतै सबी हालात मन्ज तृप्त रैहणा मैंई सिखुरा हा। 13 मसीह जैडा मिन्जो सामर्थ दिन्दा हा तैस मन्ज अऊँ सब कुछ करी सकदा। 14 तांभी तुसै भला करू कि मेरै क्लेशा मन्ज मिन्जो सोगी रैह। 15 अतै हे फिलिप्पी शहर मन्ज रैहणै बाळैओ तुसै अप्पू ही जाणदै हिन, कि सुसमाचार प्रचार रै शुरूआत मन्ज जैहणै अऊँ तून्दै मकिदुनिया परदेस थऊँ चली गो ता तुसिओ छड़ी करी होरी कसी भी कलीसिया मेरी आर्थिक रूप सोगी मदद ना करी। 16 इन्नी साहबै जैहणै अऊँ थिस्सलुनीके शहर मन्ज थू तांभी तुसै मेरी जरूरता जो पुरा करनै तांई कई बरी कुछ ना कुछ भेज्जू थू। 17 ऐह ना कि अऊँ दान चाहन्दा थू, पर अऊँ तून्दै भलै कमा मन्ज अक्क कम होर जोड़ना चाहन्दा थू, ताकि तुसिओ प्रमात्मैं थऊँ इनाम मुळा। 18 मिन्जो बल्लै ता सब कुछ हा, बल्की उम्मीद थऊँ भी ज्यादा हा, जैड़ी चिजा तुहै भाई इफ्रदीतुस रै हथै भैजुरी थी तियां जो पाई करी अऊँ तृप्त भुच्ची गो हा, सो ता खुशबुदार अतै ग्रहण करनै योग्य बलिदान हा जैडा कि प्रमात्मैं जो खरा लगदा हा। 19 इन्दा पिता प्रमात्मां, अपणै अपार धन रै अनुसार मसीह यीशु मन्ज तुन्दी सब जरूरता जो पूरी करला। 20 इन्दै पिता प्रमात्मैं री महिमा जुगा-जुगा तिकर भुन्दी रेय्आ। आमीन। अन्तिम नमस्कार 21 यीशु मसीह मन्ज हरेक पवित्र मणु जो मेरी नमस्ते बल्ला, अतै जैड़ै विस्वासी भाई मिन्जो सोगी हिन, तूसु जो नमस्ते बल्दै हिन। 22 सब पवित्र मणु, खास करीके सो विस्वासी जैड़ै महाराजा कैसर रै घरानै रै हिन तूसु जो नमस्कार बल्दै हिन। 23 ईन्दै प्रभु यीशु मसीह रा अनुग्रह तूसु पुर बणी रेय्आ। आमीन। |
This work is licensed under Creative Commons Attribution-ShareAlike 4.0 License.