मरकुस 5 - गददी

दुष्‍टात्माग्रस्त मणु जो ठीक करना

¹ यीशु अतै तसेरै चेलै गलील झीला रै पार गिरासेनियों रै परदेस मन्ज पुजै,

² जैहणै सो किस्ती थऊँ ओसै ता तैहणै अक्क मणु कब्रिस्तान री कनारी थऊँ नकैई करी तियां सितै, मुळु जैड़ा दुष्‍टात्मा रै वशा मन्ज थू

³ सो कब्रिस्तान मन्ज ही रैहन्दा थू अतै मणु तैसिओ हंगळा सितै बनी रखदै थियै।

⁴ कोई तैसिओ वशा मन्ज ना करी पान्दा थू अतै हंगळा सितै बनणा भी मुसकिल थू क्ओकि सो बार बार हँगला जो त्रोड़ी दिन्दा अतै टुकड़ै-टुकड़ै करी दिन्दा थू।

⁵ सो लगातार रात-दिन कब्रिस्तान अतै फाटा मन्ज लेरा मारदा रैहन्दा अतै अपणै आपा जो पत्थरा सितै घायल करदा रैहन्दा थू।

⁶ सो यीशु जो दूरा थऊँ हेरी करी ही दौड़ी आ अतै अपणै घुटनै रै भारै बही करी तैसिओ प्रणाम करू।

⁷ यीशुऐ तैसा दुष्‍टात्मा जो बल्लू थू, “हे दुष्‍टात्मा, ऐस मणु थऊँ नकैई अई!”

⁸ ता सो मणु जोरा सितै बकी करी बलणा लगा, “हे यीशु, परमप्रधान प्रमात्मैं रै पुत्र, तून्दा मिन्जो सोगी कै कम हा? अऊँ तुसिओ प्रमात्मैं री सौगन्द पान्दा मिन्जो तकलीफ मत दिन्दै।”

⁹ यीशुऐ तैस थऊँ पूछु, “तेरा नां कै हा?” तिनी बल्लू, “मेरा नां सेना हा क्ओकि अहै मतै भारी हिन।”

¹⁰ अतै तैस सोगी बड़ी बिनती करी कि “असिओ ऐस देशा थऊँ बाहर मत भैज।”

¹¹ तैड़ी पहाड़ी पुर सूअंरा री गुआली चरू करदी थी।

¹² दुष्‍टात्मा तैस सितै बिनती करीके बल्लू, “असिओ ईयां सूअंरा मन्ज भैजी दे कि अहै ईयां अन्दर रैहन।”

¹³ यीशुऐ तियां जो हूक्म दिता अतै दुष्‍टात्मा नकैई करी सूअंरा मन्ज चली गई अतै सो गुआली जैड़ी कोई लगभग दोई हजार थी, पागल भूच्ची करी झीला मन्ज गिच्ची पैई अतै डूबी मरी।

¹⁴ गुआलु ऐह हेरी करी नह्ही गै अतै ग्राँ अतै शहरा मन्ज गिच्ची करी ऐह गल्ला हुणाई, अतै मणु हेरना आये कि कै भुआ हा।

¹⁵ ता ग्राँ अतै शहरा रै मणुऐ यीशु रै नेड़ै ईच्ची करी तैस मणु हेरू जैस मन्ज दुष्‍टात्मा थी मतलब दुष्‍टात्मा री पूरी सेना थी, कपड़ै लाई करी शान्त बैहुरा हेरू, ता सो मणु ऐह हेरी करी डरी गै।

¹⁶ हेरनैवाळै तसेरा, जैस मन्ज दुष्‍टात्मा थी अतै सूअंरा रा पुरा हाल तियां जो बली हुणाऊ।

¹⁷ ता सो अपणै नूकसान जो हेरी करी तैस सोगी बिनती करीके बलणा लगै कि इन्दै इलाकै थऊँ बाहर चली गा।

¹⁸ जैहणै सो किस्ती पुर चढ़णा लगा ता सो जैस मन्ज दुष्‍टात्मा थी, तैस सोगी बिनती करना लगा, “मिन्जो अपणै सोगी ईणा दे।”

¹⁹ पर तिनी ईणा ना दिता, अतै तैस सोगी बल्लू, “अपणै घरै गिचीकरी करी अपणै मणु जो दस्स कि तिजो पुर दया करीके प्रभुऐ तिजो तांयें किनै बड़ै कम करै हिन।”

²⁰ सो गिचीकरी दिकापुलिस परदेस मन्ज ऐसा गल्ला रा प्रचार करना लगु कि यीशुऐ मिन्जो तांयें किनै बड़ै कम करै हिन; अतै सब मणु हैरानी करदै थियै।

याईर री मरूरी कुल्ळी अतै अक्क रोगी जनानी

²¹ जैहणै यीशु अतै तसेरै चेलै फिरी किस्ती थऊँ पार आये, ता अक्क बड़ी भीड़ तैस बलै इकट्ठी भूच्ची गई। सो झीला रै कनारै ही थू।

²² ता यहूदी रै सभागार रा अक्क याईर नां रा सरदार आ, अतै तैस जो हेरी करी तसेरै पैरा पुर पैई गो,

²³ अतै ऐह बली करी तैस सितै बड़ी बिनती करी, “मेरी हल्की कुल्ळी मरना लगुरी हा; तू ईच्ची करी तैहा पुर हत्थ रख कि सो ठीक भूच्ची करी जिन्दी रेय्आ।”

²⁴ ता यीशु अतै तसेरै चेलै तैस सोगी चली पैऊ; अतै बड़ी भीड़ तैस पिचो चली पैई, भीड़ ऐतनी थी कि मणु तैस पुर चड़ी चलुरै थियै।

²⁵ अक्क जनानी थी, जेहा जो बारह साला थऊँ खून चलनै री बमारी थी।

²⁶ तैहै बड़ै बईद्दा थऊँ भी बडा दुख भोगुरा थू, अपणी सब पूंजी खर्च करनै पुर भी कोई लाभ ना भच्छुरा थू, पर सो होर भी ज्यादा बमार भूच्ची गच्छुरी थी।

²⁷ सो यीशु री चर्चा हुणी करी कि सो मणु जो ठीक करदा हा ता भिड़ा मन्ज तसेरै पिचो आई अतै तसेरै कपड़ै रै पल्लै जो छुई लैऊ।

²⁸ सो अपणै मनां मन्ज सोचदी थी, “अगर अऊँ तसेरै कपड़ै जो भी छुई लैली ता मुँ ठीक भूच्ची गाणा हा।”

²⁹ जैहणै तैहै यीशु रा पल्ला छुऊँ ता तैहणै ही तसारा खून चलना बन्द भूच्ची गो। तैहा जो अपणै शरीरा मन्ज पता लगी गो कि अऊँ ठीक भूच्ची गई हा।

³⁰ यीशु जो भी महसुस भूआ कि मिन्जो थऊँ सामर्थ निकळी हा, अतै भिड़ा मन्ज पिचो मुड़ीकरी पूच्छु, “मेरै ओड़णा जो कुणी छुऊँ हा?”

³¹ तसेरै चेलै बल्लू, “तिजो हुजु करदा कि भीड़ ता तिजो पुर चड़ी चलुरी हा, अतै तू बलदा कि कुणी मिन्जो छुऊँ?”

³² ता यीशुऐ ऐह हेरनै तांयें कि मिन्जो कुणी छुऊआ, चंऊ कनारी अपणी नजर फेरी।

³³ ता सो जनानी ऐह जाणी करी कि मेरी किनी भलाई भूई हा, ड़रदी अतै कम्मदी कम्मदी आई, अतै तसेरै पैरै पैई करी तैस सोगी सब हाल सच-सच दसी दिता।

³⁴ यीशुऐ तैहा सितै बल्लू, “पुत्री तेरै विस्वासै तिजो ठीक करू हा शान्ती सोगी चली गा अतै अपणी ऐसा बमारी थऊँ बची रैह।”

³⁵ यीशु ऐह बल्लू ही करदा थू कि यहूदी सभागार रै सरदार याईर रै घरा थऊँ कुछ मणु ईच्ची करी तैस सितै बलणा लगै, “तेरी कुल्ळी ता मरी गई हा, अबै गुरू जो अपणै घरै ईणै रा कष्‍ट मत दे।”

³⁶ जैड़ी गल्ल सो करू करदै थियै, तैहा गल्ला जो यीशुऐ हुणी करी यहूदी रै सभागार रै सरदारा सितै बल्लू, “मत डरा सिर्फ विस्वास रखा।”

³⁷ अतै तिनी पतरस, याकूब अतै तसेरै भाई यूहन्‍ना जो छड़ी करी होरी कसी जो अपणै सोगी ना ईणा दिता।

³⁸ तैस यहूदी सभागार रै सरदारा रै घरै पुजीकरी तिनी मणु जो रून्दै अतै लेरा पान्दै हेरू।

³⁹ ता तिनी अन्दर गिचीकरी तियां सोगी बल्लू, “तुहै हल्ला कजो पाऊरा अतै कजो रोऊ करदै हिन? कुल्ळी मरूरी निईआ, पर सोऊँ करदी हा।”

⁴⁰ सो तसेरी गल्ला हुणी करी हासी उड़ाणा लगै, पर तिनी सबी जो कड्ड़ी दिता अतै कुल्ळी रै माँ-पिता अतै अपणै तियां त्राई चेलै सोगी अन्दर गो, जैड़ी कुल्ळी पैऊरी थी।

⁴¹ अतै कुल्ळी रा हत्थ पकड़ी करी तैहा सितै बल्लू, “तलीता कूमी!” जठेरा मतलब हा, “हे कुल्ळी, अऊँ तिजो सितै बलदा, उठ!”

⁴² अतै कुल्ळी झट उूठी करी चलना लगी पैई क्ओकि सो बारह साला री थी। ऐसा गल्ला थऊँ सो बड़ै हैरान भूच्ची गै।

⁴³ फिरी तिनी तियां जो टणकाई करी हूक्म दिता कि ऐह गल्ल कसिओ पता ना लगा अतै बल्लू, “ऐसा जो कुछ खाणै जो देआ।”