मरकुस 4 - गददी

बी बाणै बाळै रा उदाहरण

¹ यीशु फिरी गलील झीला रै कनारै उपदेश दिणा लगा अतै ऐसी भीड़ किटठी भूच्ची गई कि ता सो झीला मन्ज अक्की किस्ती पुर बैही गो, अतै पूरी भीड़ जमीना पुर झीला रै कनारै खड़ी रैई।

² अतै सो उदाहरण मन्ज बड़ी सारी गल्ला सखाणा लगु, अतै अपणै उपदेशा मन्ज तियां जो बल्लू,

³ “हुणा! अक्क बी बाणैबाळा बी बाणा निकळू।

⁴ बान्दै टैमैं कुछ बी बता रै कनारै पै अतै पखेरू ईच्ची करी सो चुगी लैऊ।

⁵ कुछ बी पत्थरली जमीना पुर पै जैड़ी तैतिओ बड़ी मिट्टी ना मुळी अतै गहरी मिट्टी ना मुळन री वजह थऊँ, सो झट जमीं पैऊँ,

⁶ अतै जैहणै सूरज निकळू ता सो फूकी गै, अतै जड़ ना पकड़णै री वजह थऊँ हुक्की गो।

⁷ कुछ बी झिन्ड़ा मन्ज पै, अतै झिन्ड़ै सो जमीं करी दबाई दिता, अतै सो फलबन्त ना भुआ

⁸ पर कुछ बी खरी जमीना पुर पै, अतै सो जमीं करी फलबन्त भुआ अतै कोई तीह गुणा, कोई सठ गुणा अतै कोई सौ गुणा फळै।”

⁹ ता यीशुऐ बल्लू, “मेरी गल्ला ध्याना सोगी कन्‍ना खोली करी हुणी लेय्आ।”

उदाहरण रा उदेश्य

¹⁰ जैहणै यीशु अकेला रैई गो, ता तसेरै साथी तियां बारह प्रेरितै तैस थऊँ ईयां उदाहरण रै बारै मन्ज पूछु

¹¹ तिनी तियां सितै बल्लू, “तुसिओ ता प्रमात्मैं रै राज्य रै भेदा री समझ दितुरी हा, पर बाहरा बाळै तांयें सब गल्ला उदाहरण मन्ज भुन्दी हिन।

¹² ठेरैतांये कि यशायाह भविष्‍यवक्ता री कताबा मन्ज लिखुरा हा, “ ‘ऐह हेरी करी भी समझी ना पान अतै हुणी करी भी ना समझन; क्ओकि ऐसा ना भोआ कि ऐह अपणै पापा थऊँ फिरी ईन, अतै प्रमात्मां तियां जो माफी देय्आ।’ ”

बी बाणैवाळै उदाहरण री व्याख्या

¹³ यीशुऐ तियां सोगी बल्लू, “कै तुहै ऐह उदाहरण ना समझदै? ता फिरी होर सब उदाहरण जो कियां समझणा?

¹⁴ बी बाणैबाळा किसान ऐस तरीकै हा जियां कोई प्रमात्मैं रा बचन हुणान्दा।

¹⁵ कुछ मणु ऐस तरीकै हिन जियां बी रस्तै मन्ज पैऊरै हिन, मणु जैहणै तियैं बचन हुणु, ता शैतान झट ईच्ची करी तैस बचना जो चुकी लेई गान्दा हा।

¹⁶ तियां ही जैड़ै बी पथरीली जमीना पुर पेऊरा हा, ऐह ईयां मणु सांईयै हिन जैड़ै बचन जो हुणी करी झट खुशी सोगी ग्रहण करी लैन्दै हिन।

¹⁷ पर अपणै मना मन्ज गहराई थऊँ विस्वास ना करनै री वजह थऊँ थोड़ै ही दिन तांयें रैहन्दै हिन ऐत थऊँ बाद जैहणै बचन री वजह थऊँ क्‍लेश या सताव भुन्दा सो झट बचन पुर विस्वास करना छड़ी दिन्दै हिन।

¹⁸ जैड़ै बी झिन्ड़ा मन्ज पेऊरा, ऐह तियां मणु सांईयै हिन जैड़ै बचन हुणदै पर,

¹⁹ संसारा री चिन्ता, अतै धन रा धोखा, अतै होर चिजा रा लोभ तियां मन्ज इन्दा अतै सो बचन जो दबाई दिन्दै, अतै सो तियां कम्मा जो ना करी सकदै जैतिओ प्रमात्मां चाहन्दा।

²⁰ अतै जैडा बी खरी जमीना पुर पैऊ सो ऐसै मणु सांईयै हिन जैड़ै बचन जो हुणी करी विस्वास करदै अतै तियां कम्मा जो करदै हिन जैतिओ प्रमात्मां चाहन्दा। सो ऐसी फसल सांईयै फलदै कोई तीह गुणा, कोई सठ गुणा, कोई सौ गुणा।”

दीयै रा उदाहरण

²¹ यीशुऐ तियां सितै बल्लू, “कै दीयै जो ठेरैतांये लेईंदै कि टोकरू थलै ढ़की करी या मन्जै थलै रखन? बल्कि ठेरैतांये लेईंदै हिन कि उच्ची जगह पुर रखन ताकि सबी जो लौ भोआ।

²² क्ओकि जैड़ी गल्ला छिपुरी हिन सो प्रकट भूच्ची गाणी अतै जैडा कुछ गुप्त हा, सो भी प्रकट भूच्ची गाणा।

²³ मेरी गल्ला ध्याना सोगी कन्‍ना खोली करी हुणी लेय्आ।”

²⁴ यीशुऐ तियां सितै बल्लू, “चौकनै रेय्आ अतै ध्याना सितै हुणा। जैस नापा सितै तुसै नापदै हिन तैस ही नापा सितै तूसु तांयें भी नापया गाणा, बल्कि तुसिओ मता ही दिणा हा।

²⁵ क्ओकि जैड़ा मेरी शिक्षा जो हुणदै अतै समझदै हिन तियां जो होर समझ दिणिआ, पर जैड़ी ना हुणदै ता तियां बलै जैड़ी समझ हा सो भी तियां थऊँ लेई लैणीआ।”

उगणै बाळै बी रा उदाहरण

²⁶ फिरी तिनी बल्लू, “प्रमात्मैं रा राज्य इआं जिंआं कि कुणकी किसाने जमींना पुर बी बायै,

²⁷ सो हर दिन अपणा कम करीके राती सुन्दा अतै दिय्आ जागदा, पर तैसिओ पता भी ना लगदा कि सो बी इन्‍नै जमदै हिन।

²⁸ धरती अप्पू ही फसल दिन्दी हा, पैहलै लून्गा, फिरी हिल्लै, अतै हिल्लै मन्ज तैयार दाणा।

²⁹ पर जैहणै फसल पक्की गान्दी हा ता तैत मन्ज झट दराटी लगान्दै हिन, क्ओकि तैहणै फसल री वढाई रा टैमं ईच्ची रैहन्दा हा।”

राई रै दाणै रा उदाहरण

³⁰ फिरी तिनी बल्लू, “अहै प्रमात्मैं रै राज्य रा उदाहरण कस सोगी दीन, अतै कस उदाहरण सोगी तसेरा बखान करन?

³¹ सो राई रै दाणै रै बराबर हा; कि जैहणै जमीना मन्ज बान्दै हिन ता धरती रै सबी बीआ थऊँ हल्का भुन्दा,

³² पर जैहणै बान्दै हिन, ता जंमी करी सबी साग सब्जी थऊँ बडा भूच्ची गान्दा हा, अतै तठेरी ऐसी बड़ी बड़ी डाळी नकैन्दी हिन, कि अम्बरा रै पखेरू भी तठेरी छाई मन्ज बसेरा करी सकदै हिन।”

³³ यीशु तियां जो ऐस तरीकै रै मतै सारै उदाहरण दि दिकरी तंयारी समझा अनुसार बचन हुणान्दा थू,

³⁴ अतै सो तियां सोगी उदाहरण मन्ज ही गल्ला करदा थू, पर एकान्त मन्ज सो अपणै चेलै जो सब उदाहरण रा अर्थ दसदा थू।

आँधी जो शान्त करना

³⁵ तैस ही दिन जैहणै सँझ भूई, ता तिनी चेलै सोगी बल्लू, “अईआ अहै झीला रै पारीयें कनारी जो किस्ती मन्ज चलदै।”

³⁶ अतै सो भिड़ा जो छड़ी करी अपणै चेलै सोगी किस्ती पुर चली पैऊ; अतै बाकी होर मणु भी होरी किस्ती पुर चलै।

³⁷ ता अक्क बडा तूफान चली आ, अतै लैहरा रै पाणी सितै किस्ती भरीणा लगी पैई।

³⁸ पर सो अप्पू पिछली कनारी गद्‍दी पुर सोऊँ करदा था। तैहणै चेलै तैस जो जगाई करी तैस सितै बल्लू, “हे गुरू, कै तिजो फिकर निय्आ, कि अहै मरना लगुरै हिन?”

³⁹ ता तिनी उूठी करी तूफाना जो झिड़कू, अतै तूफान सितै बल्लू, “शान्ती रख, रूकी गा।” ता तूफान रूकी गो अतै बडा चैन भूच्ची गो;

⁴⁰ अतै तिनी बल्लू, “तुहै कजो डरदै हिन? कै तुसिओ हल्ली तिकर विस्वास निय्आ?”

⁴¹ सो बड़ै ही डरी गै अतै अप्पू मन्ज बलणा लगै, “ऐह किना मणु हा कि तूफान अतै पाणी भी सेरै हूक्मा जो मन्दै हिन?”