मरकुस 3 - गददी

डुन्डै मणु जो ठीक करना

¹ यीशु फिरी यहूदी रै सभागार मन्ज गो; तैड़ी अक्क मणु थू जैसेरा हत्थ डुण्ड़ा थू।

² फरीसी मणु तैस पुर दोष लाणै तांयें मौके री तलाश मन्ज थियै अतै हेरना चाहन्दै थियै कि ऐह विश्रामदिन तैसिओ ठीक करदा कि ना।

³ तिनी तैस डुन्डै मणु सोगी बल्लू, “सामणै ईच्ची करी खड़ी गा।”

⁴ अतै यीशुऐ तियां जो बल्लू, “मूसा री व्यवस्था मन्ज कै लिखुरा विश्रामदिन भलाई करना खरा कि बुरा करना, प्राणा जो बचाणा खरा या मारना?” पर सो चुप रैह।

⁵ तिनी तंयारै मना रै ढ़ीठपन थऊँ उदास भूच्ची करी जळणी सितै चंऊ कनारी हेरू, अतै तैस मणु सोगी बल्लू, “अपणा हत्थ अगो कर।” तिनी हत्थ अगो करू अतै सो ठीक भूच्ची गो।

⁶ तैहणै फरीसी झट बाहर गिच्ची करी हेरोदेस राजा रै गुट रै मणु सोगी तसेरै वरोधा मन्ज योजना बणाणा लगै कि तसेरा किआं नाश करन।

भिड़ा रा यीशु पिचो चलना

⁷ यीशु अपणै चेलै सोगी कफरनहूम शहरा जो छड़ी करी गलील झीला री कनारी चली गो अतै गलील परदेस थऊँ अक्क बड़ी भीड़ तसेरै पिचो चली पैई।

⁸ यहूदिया परदेस यरूशलेम शहर, इदूमिया परदेस, यरदन नदी रै पारा थऊँ, सूर अतै सैदा शहरा रै नेड़ै तेड़ै थऊँ मणु री अक्क बड़ी भीड़ ऐह हुणी करी कि सो कियां हैरानी रै कम करदा हा, तैस बलै आई।

⁹ तिनी अपणै चेलै सोगी बल्लू, “भिड़ा री वजह थऊँ अक्क हल्की जिनी किस्ती मिन्जो तांयें तैयार रखा ताकि भीड़ मिन्जो पुर चड़ी ही ना गच्छा।”

¹⁰ क्ओकि तिनी मतै जो ठीक करूरा थू, ठेरैतांये जैतणै मणु रोगी थियै, तैसिओ छुणै तांयें तैस पुर चड़ी चलदै थियै, ताकि सो भी तैसिओ छुई करी ठीक भूच्ची गान।

¹¹ दुष्‍टात्मा भी, जैहणै तैसिओ हेरदी थी ता तैस अगो टिरी पैन्दी थी, अतै चिल्लाई करी बलदी थी कि तू प्रमात्मैं रा पुत्र हा;

¹² अतै तिनी दुष्‍टात्मा जो सख्त हूक्म दिता कि “मेरै बारै मन्ज कसी जो मत दसदै।”

बारह चेलै जो चुनणा

¹³ फिरी यीशु पहाड़ा पुर चड़ी गो, अतै जिंआं जो सो चाहन्दा थू तियां जो अप्पू बलै हैदु; अतै सो तैस वलै आये।

¹⁴ तैहणै तिनी बारह मणु जो चुणु अतै तियां जो प्रेरित बल्लू कि सो तैस सोगी रैहन, अतै सो तियां जो भैजा कि सो प्रचार करन,

¹⁵ अतै दुष्‍टात्मा जो कढणै रा अधिकार रखन।

¹⁶ सो ऐह बारह प्रेरित हिन शमौन जैसेरा नां तिनी पतरस रखू,

¹⁷ जबदी रा पुत्र याकूब अतै तसेरा हल्का भाई यूहन्‍ना, जैसेरा नां तिनी बुअनरगिस मतलब “गर्जन रा पुत्र” रखू, क्ओकि सो जोशीलै थियै।

¹⁸ अन्द्रियास, फिलिप्पुस, बरतुल्मै, मत्ती, थोमा, हलफई रा पुत्र याकूब, तद्दै, अतै शमौन कनानी

¹⁹ अतै यहूदा इस्करियोती जिनी तैसिओ पकड़वाई भी दिता थू।

यीशु अतै शैतान

²⁰ तैहणै यीशु अतै तसेरै चेलै कफरनहूम मन्ज तैस ही घरा मन्ज ठहरू जैड़ी सो रूकदा थू, अतै तैड़ी ऐतनी भीड़ इकट्ठी भूच्ची गई कि सो खाणा भी ना खाई सकै।

²¹ जैहणै यीशु रै टबरा रै मणुऐ ऐह हुणु, ता सो तैसिओ पकड़णै तांयें निकळै क्ओकि सो बलदै थियै कि ऐह पागल हा।

²² शास्त्री भी जैड़ै यरूशलेम थऊँ छुरै थियै, ऐह बलदै थियै कि “ऐस मन्ज शैतान हा,” अतै “ऐह मुख्य शैतान री मदद सोगी मणु थऊँ दुष्‍टात्मा जो कड़दा हा।”

²³ ठेरैतांये यीशु तियां जो नेड़ै हैदी करी तियां सोगी उदाहरण मन्ज कणैणा लगा, “शैतान कियां अपणी दुष्‍टात्मा जो कड़ी सकदा हा?

²⁴ अगर कसकि राज्य रै मणु मन्ज फूट पैई गच्छा, ता सो कियां टिकी सकदा हा?

²⁵ अतै अगर कसकि परिवार मन्ज फूट भोआ ता सो परिवार विखरी गान्दा हा?

²⁶ ठेरैतांये अगर शैतान अपणी ही दुष्‍टात्मा रै वरोध करा, ता सो टिकी ना सकदा? तसेरा ता अन्त ही भूच्ची गाणा।

²⁷ पर कोई भी मणु कसकि ताकतवर रै घरा मन्ज घुसड़ीकरी तसेरा घर ना लुटी सकदा, जैहणै तक कि सो तैस ताकतवर जो बनी ना लेय्आ तां सो तसेरै घरा जो लुटी सकदा हा।

²⁸ अऊँ तूसु सोगी सच बलदा हा मणु री औलादा रै सब पाप अतै बुराई जैडा सो करदै हिन, माफ भूच्ची गाणी हा,

²⁹ पर जैडा पवित्र आत्मा री बुराई करा, सो कदी भी माफ ना भूणा पर सो सदा रै पापा रा अपराधी बणदा हा।”

³⁰ यीशुऐ ऐह गल्ला तियां जो बल्ली, क्ओकि सो ऐह बलदै थियै कि सो “दुष्‍टात्मा रै वशा मन्ज हा।”

यीशु री माँ अतै भाई

³¹ तैहणै तसेरी माता अतै हल्का भाई आये, अतै बाहर खड़ी करी तैसिओ हैदी भैजु।

³² भीड़ तसेरै अखै-ब्रखै बैहुरी थी, अतै तियैं तैस सितै बल्लू, “गुरू, तुन्दी माता अतै भाई-बैहण बाहर हिन अतै तुसिओ तोपू करदै हिन।”

³³ यीशुऐ तियां जो जवाव दिता, “मेरी माता अतै भाई कुण हिन?”

³⁴ अतै अपणै अखै-ब्रखै बैहुरै री कनारी हेरी करी बल्लू, “हेरा, मेरी माता अतै भाई ऐह हिन।

³⁵ क्ओकि जैडा कोई प्रमात्मैं री इच्छा पुर चलदा, सो ही मेरा भाई, बैहण अतै माता हा।”