मरकुस 14 - गददी

यीशु रै वरोधा मन्ज षड्यन्त्र

¹ दूँ दिन बाद फसह रा अखमीरी रोटी रा त्यौहार भूणैवाळा थू। प्रधान याजक अतै शास्त्री ऐसा ताक मन्ज थियै कि यीशु जो कियां ठगी करी पकडन अतै मारी दीन।

² पर सो बलदै थियै कि, “त्यौहारा रै दिन ना, करखी ऐसा ना भोआ कि सब मणु दंगा करन।”

बैतनिय्याह मन्ज यीशु रा इत्र सोगी अभिषेक

³ जैहणै यीशु बैतनिय्याह ग्राँ मन्ज शमौन कोढ़ी रै घरै खाण खाणा बैहुरा थू, ता अक्क जनानी संगमरमर रै अक्की भाण्ड़ै मन्ज जटामांसी रा किमती शुद्ध इत्र लेई करी आई; अतै तैहै सो इत्र यीशु रै मुण्डा पुर मळु।

⁴ पर कई मणु जैड़ै तैड़ी बैहुरै थियै सो अपणै मना मन्ज रिस करी बलणा लगै, “ऐस इत्र जो कजो खराब करू?

⁵ क्ओकि ऐह इत्र त्राई सौ दीनार थऊँ भी मती किमता मन्ज बेचीकरी कंगाला मन्ज बण्ड़ी सकदै थियै।” अतै सो तैहा जो झिड़कणा लगै।

⁶ यीशुऐ बल्लू, “ऐसा जो मत झिड़का; ऐसा जो कजो सताऊ करदै हिन? सारा ऐह व्यवहार मिन्जो खरा लगु हा।

⁷ कंगाल तूसु सोगी सदा रैहन्दै हिन, अतै तुहै जैहणै चाहन तैहणै तियां पुर भलाई करी सकदै हिन; पर मुँ तूसु सोगी सदा ना रैहणा।

⁸ जैडा कुछ ऐह करी सकदी थी ऐहै करूआ; ऐहै मेरै दबाणै थऊँ पैहलै ही मेरै जिस्मां मन्ज इत्र मळूआ।

⁹ अऊँ तूसु सोगी सच बलदा कि पूरै संसारा मन्ज जैड़ी भी मेरा सुसमाचार प्रचार करलै, तैड़ी सारै ऐस कम्मा री चर्चा भी याद करनी हा।”

यहूदा रा विस्वासघात

¹⁰ ता यहूदा इस्करियोती जैडा बारह चेलै मन्ज अक्क चेला थू, प्रधान याजका बलै गो अतै बल्लू कि अऊँ यीशु जो तून्दै हत्थै पकडाई दिला।

¹¹ सो ऐह हुणी करी बड़ै खुश भुएै, अतै तैसिओ रूपियें दिणा मंजूर करै; अतै यहूदा मौका तोपणा लगा कि तैसिओ कस तरीकै पकडा।

चेलै सोगी फसह रा अन्तिम भोज

¹² अखमीरी रोटी रै त्यौहारा रै पैहलै दिन, जैत मन्ज सो फसह रा बलिदान करदै थियै। तसेरै चेलै तैस थऊँ पूछु, “तुहै कड़ी चाहन्दै कि अहै गिचीकरी तूसु तांयें अतै अपणै तांयें फसह खाणै री तैयारी करन?”

¹³ तिनी अपणै चेलै थऊँ दूँ जो ऐह बली करी भैजु, “यरूशलेम शहरा मन्ज गच्छा, अतै अक्क मणु पाणी रा घडा चुकुरा मुळना, तसेरै पिचो चली गच्छैं।

¹⁴ जैस घरा मन्ज सो गाला, तैस घरा रै मालका सितै बलै, ‘इन्दा गुरू बलदा कि असु तांयें ठहरनै रा कमरा कड़िआ जैत मन्ज अऊँ अपणै चेलै सोगी फसह खाऊँ?’

¹⁵ तैस तुसिओ अक्क सजी सजाई अतै तैयार करूरी बड़ी बोढ़ दस्सी दिणिआ, तैड़ी तुहै असु तांयें तैयारी करा।”

¹⁶ ता सो दोई चेलै यरूशलेम शहरा जो चली आये, अतै जिंआं तिनी तियां सोगी बलुरा थू, तियां ही सो भुआ; अतै तियैं फसह तैयार करू।

¹⁷ जैहणै सँझ भूई ता सो बारह प्रेरिता सोगी आ।

¹⁸ जैहणै सो खाणा बैईठै अतै खाणा लगै ता यीशुऐ बल्लू, “अऊँ तूसु सोगी सच बलदा कि तूसु मन्ज अक्क, जैडा मिन्जो सोगी खाणा लगुरा, तैस मिन्जो पकड़ाणा।”

¹⁹ सो उदास भूच्ची गै अतै अक्क अक्क करीके तैस थऊँ पुछणा लगै, “कै सो अऊँ हा?”

²⁰ तिनी तियां सितै बल्लू, “सो बारह मन्ज अक्क हा, जैडा मिन्जो सोगी बैही करी कटोरै मन्ज रोटी डुबाई करी खाऊ करदा।

²¹ क्ओकि मणु रा पुत्र ता, जिंआं तसेरै बारै मन्ज पवित्रशास्त्र री कताबा मन्ज लिखुरा तियां ही भूणा। पर हाय तैस मणु पुर जसेरी वजह थऊँ मणु रा पुत्र पकड़ाया गान्दा। तैस मणु तांयें ता ऐह खरा भुन्दा अगर तैस मणु रा जन्म ना भच्छुरा भुन्दा।”

प्रभु-भोज

²² जैहणै सो खाऊ करदै थियै, ता यीशुऐ रोटी लेई अतै आशीष मगींकरी त्रोड़ी अतै तियां जो दिकरी बल्लू, “लेय्आ ऐह मेरा जिस्म हा।”

²³ फिरी तिनी कटोरा लेई करी धन्यवाद करू, अतै तियां जो दिता; अतै तिन्यै सबीये तैस कटोरै थऊँ ही पिऊ।

²⁴ अतै यीशुऐ तियां सितै बल्लू, “ऐह नोए वायदै रा मेरा सो खून हा, जैडा मतै री पापा री माफी तांयें बहाआ गान्दा।

²⁵ अऊँ तूसु सोगी सच बलदा मुँ अंगुरा रा रस तैस दिन तांयें फिरी कदी ना पीणा, जैहणै तक प्रमात्मैं रै राज्य मन्ज नौआ ना पिऊ।”

²⁶ फिरी सो भजन गाईकरी जैतून रै पहाड़ा पुर गै।

पतरसा रै इनकार री भविष्‍यवाणी

²⁷ ता यीशुऐ अपणै चेलै सोगी बल्लू, “तूसु सबी मेरा साथ छड़ी करी चली गाणा,” क्ओकि भविष्‍यवक्तै पवित्रग्रन्था मन्ज लिखुरा : “मुँ रखवाळा मारना अतै भैड़ा तितर-बितर भूच्ची गाणा।”

²⁸ “पर मुँ अपणै दोबारा जी उूठणै थऊँ बाद तूसु थऊँ पैहलै गलील परदेस जो गाणा।”

²⁹ पतरसै तैस सोगी बल्लू, “अगर सब तिजो छड़न ता छडी दिन, पर मुँ तिजो ना छड़णा।”

³⁰ यीशुऐ तैस सोगी बल्लू, “अऊँ तिजो सोगी सच बलदा कि अज ही ऐसा राती ही कुक्कड़ा री दोई बरी बाँग दिणै थऊँ पैहलै तुद त्राई बरी मेरै बारै मन्ज मुकरी गाणा।”

³¹ पर तिनी होर जोर दिकरी बल्लू, “अगर मिन्जो तिजो सोगी मरना भी पैला तांभी मुँ तेरा इन्कार कदी ना करना।” ऐस तरीकै सबीये भी बल्लू।

गतसमनी बगीचे मन्ज प्रार्थना

³² तैत थऊँ सो गतसमनी नां रै अक्की बगीचे मन्ज आये, अतै तिनी अपणै चेलै सोगी बल्लू, “ऐठी बैही रेय्आ, जैहणै तक अऊँ प्रार्थना करदा।”

³³ अतै सो पतरस, याकूब अतै यूहन्‍ना जो अपणी सोगी लेई गो; अतै बडा ही उदास अतै व्याकुल भूणा लगा।

³⁴ तिनी बल्लू, “मेरा मन बड़ा उदास हा, ऐतना कि मेरै प्राण निकलणा लगुरै, तुहै ऐड़ी रूका अतै जागदै रेय्आ।”

³⁵ फिरी सो थोड़ा जिनी अगो गो अतै धरती पुर घुटनै रै भारै बैही करी प्रार्थना करना लगा, कि अगर भूच्ची सकदा ता ऐस दुखा थऊँ अऊँ बच्ची गच्छू।

³⁶ तिनी बल्लू, “हे अब्बा, हे पिता, तूसु थऊँ सब कुछ भूच्ची सकदा ऐस दुखा जो मिन्जो थऊँ दूर करी लेआ, तांभी जिन्‍ना अऊँ चाहन्दा तियां ना पर जैडा तुहै चाहन्दै सो ही भोआ।”

³⁷ प्रार्थना करीके यीशु फिरी आ अतै तियां जो सुतुरा हेरू अतै पतरसा सोगी बल्लू, “हे शमौन, तू सोऊँ करदा? कै तू अक्क घड़ी भी ना जागी सकू?

³⁸ जागदै रेय्आ अतै प्रार्थना करदै रेय्आ कि तुहै परीक्षा मन्ज ना पैन। आत्मा ता तैयार हा, पर जिस्म कमजोर हा।”

³⁹ अतै यीशु फिरी प्रार्थना करना चली गो अतै तियां ही शब्दा मन्ज प्रार्थना करी।

⁴⁰ फिरी ईच्ची करी यीशुऐ तियां जो सुतुरै हेरू, क्ओकि तियां जो बड़ी निन्द्र लगुरी थी; अतै निन्द्रा मन्ज ना पता लगु कि तैसिओ कै जवाव दीन।

⁴¹ यीशु फिरी त्रीं बरी प्रार्थना करना गो अतै जैहणै प्रार्थना करीके फिरी आ तियां सोगी बल्लू, “तुहै हालि तिकर सोऊ करदै अतै आराम करू करदै हिन? अबै बस करा! हेरा सो घड़ी चली आई हा; हेरा मणु रा पुत्र पापी रै हत्थै पकड़ाया गाणा।

⁴² उठा, चला! हेरा, मिन्जो पकडाणैवाळा नेड़ै ईच्ची रैऊआ!”

यीशु जो धोखै सोगी पकड़ाणा

⁴³ यीशु बल्लू ही करदा थू कि यहूदा जैडा बारह चेलै मन्ज अक्क थू, अपणै सोगी प्रधान याजका अतै शास्त्री अतै स्याणै मणु री तरफा थऊँ अक्क भीड़ तलवारा अतै होट्‌ठी लेई करी ईच्ची पुजी।

⁴⁴ यहूदै पकड़णै बाळै जो बलुरा थू कि जैसिओ अऊँ पोक्कु दिला सो ही यीशु हा, तैसिओ पकड़ी लैं।

⁴⁵ यहूदा आ, अतै झट यीशु बलै गिच्ची करी बल्लू, “हे रब्बी!” (मतलब हे गुरू) अतै तैसिओ पोक्कु दिता।

⁴⁶ ता तियैं यीशु जो पकड़ी लैऊ।

⁴⁷ तसेरै चेलै जैड़ै तैस सोगी खडुरै थियै, अक्कीयै तलवार कड़ी करी महायाजक रै अक्की दासा पुर चलाई, अतै तसेरा कन कटी दिता।

⁴⁸ यीशुऐ तियां जो बल्लू, “कै तुहै मिन्जो डाकू समझी करी तलवारा अतै डण्डै़ लेई करी पकड़ना आये?

⁴⁹ अऊँ ता हर रोज मन्दरा मन्ज तूसु सोगी रैई करी उपदेश दिन्दा थू, अतै तैहणै तुहै मिन्जो ना पकडु पर ऐह ठेरैतांये हा कि पवित्रग्रन्था री गल्ला पूरी भून।”

⁵⁰ ऐह सब हेरी करी यीशु रै सब चेलै तैसिओ छड़ी करी नह्ही गै।

⁵¹ अक्क जवान अपणै नंगे जिस्मां जो चादर सितै लपेटी करी तैस पिचो चली पैऊ; अतै मणुऐ तैसिओ पकड़नै री कोशिश करी।

⁵² पर तंयारै हत्थै थऊँ चादर फिसली गैई अतै सो चादरा छडी करी नंगा ही नह्ही गो।

महासभा सामणै यीशु

⁵³ फिरी सो मणु यीशु जो महायाजक बलै लेई गै; अतै सब प्रधान याजका, स्याणै अतै शास्त्री तैड़ी किटठी गै।

⁵⁴ पतरस दूरा थऊँ पिचो पिचो महायाजक रै अँगणा तक गो अतै तंयारै सपाई सोगी बैही करी अग सेकणा लगा।

⁵⁵ प्रधान याजक अतै पूरी यहूदी महासभा यीशु जो मारनै तांयें तसेरै वरोधा मन्ज गवाही रै चक्करा मन्ज थियै पर कोई ना मुळी।

⁵⁶ क्ओकि मतै सारै तसेरै वरोधा मन्ज झूठी गवाही दिच्छु करदै थियै, पर तंयारी गवाही अक्क जिनी ना थी।

⁵⁷ ता कुछ मणुऐ खड़ी करी तसेरै वरोधा मन्ज ऐह झूठी गवाही दिणा लगै।

⁵⁸ “अहै ऐसिओ ऐह बलदै हुणुरा कि ‘मुँ ऐस हत्था रै बणाऊरै मन्दरा जो ढ़ाई दिणा, अतै त्रियै दिन फिरी बणाणा, जैडा हत्था रा ना बणुरा भोआ।’”

⁵⁹ पर ऐह गवाही भी तंयारी अक्क जिनी ना निकळी।

⁶⁰ ता महायाजकै सामणै खड़ी करी यीशु सोगी बल्लू, “तू कोई जवाव ना दिन्दा? ऐह मणु तेरै वरोधा मन्ज कै गवाही दिच्छु करदै हिन?”

⁶¹ पर यीशु मौन रैऊ, अतै कुछ भी जवाव ना दिता। महायाजकै तैस थऊँ फिरी पूछु, “कै तू प्रमात्मैं रा पुत्र मसीह हा?”

⁶² यीशुऐ बल्लू, “अऊँ हा, तूसु मणु रै पुत्रा जो सर्वशक्तिमान री सज्जै कनारी बैहुरै, अतै अम्बरा मन्ज बदळा सोगी इन्दै हेरना।”

⁶³ ता महायाजकै हैरान भूच्ची करी अपणा चोगा फाड़ी करी बल्लू, “असिओ अबै गवाह री कोई जरूरत निय्आ।

⁶⁴ तुहै ऐह निन्दा हुणी। ऐह ता प्रमात्मैं री बुराई करू करदा अबै तुहै दस्सा कि तुन्दी कै राय हा?” तियैं सबीये बल्लू ऐह जानी थऊँ मारनै लायक हा।

⁶⁵ ता कोई तैस पुर थुकणा लगै, कोई तसेरै मुँहा घटना लगै, कोई मुक्‍कै मारना लगै अतै कोई बलणा लगै, “भविष्‍यवाणी कर!” अतै सपाई पकड़ी करी तैसिओ थप्पड़ मारै।

पतरसा रा मुकरना

⁶⁶ जैहणै पतरस अँगणा मन्ज थू, ता महायाजक री अक्क नौकरैणी तैड़ी आई,

⁶⁷ पतरसा जो अगी सेकदै हेरी करी अक्क नजर हेरदी रैई अतै बलणा लगी, “तू भी ता तैस यीशु नासरी सोगी थू।”

⁶⁸ सो मुकरी गो, अतै बलणा लगा, “अऊँ ना जाणदा अतै ना समझदा कि तू कै बल्लू करदी हा।” फिरी सो बाहर आ अतै तैहणै ही कुक्कड़ै बाँग दिती।

⁶⁹ सो नौकरैणी तैड़ी खडुरै मणु सितै बलणा लगी, “ऐह यीशु रै मणु थऊँ अक्क हा।”

⁷⁰ पर सो फिरी मुकरी गो। थोड़ी देरा बाद तियैं जैड़ै पतरसा रै नेड़ै खडुरै थियै तैस सोगी बल्लू, “पक्का तू तंयारा ही मणु हा क्ओकि तेरी गल्ला थऊँ लगदा कि तू भी गलीली मणु हा।”

⁷¹ ता पतरस सौगन्द खाई करी बलणा लगा कि धिक्‍कार हा मिन्जो पुर जे अऊँ झूठ बल्लू, “अऊँ ऐस मणु जो ना जाणदा।”

⁷² ता तैहणै ही दूई बरी कुक्कड़ै बाँग दिती। पतरसा जो यीशु री सो गल्ल याद आई कि “दोई बरी कुक्कड़ा री बाँग दिणै थऊँ पैहलै तुद मेरा त्राई बरी इन्कार करना।” अतै सो यहा गल्ला जो याद करीके फूटी-फूटी करी रूणा लगा।