मरकुस 12 - गददी

दुष्‍ट किसाना रा उदाहरण

¹ फिरी यीशु उदाहरण मन्ज यहूदी धर्मगुरू सितै गल्ला करना लगा। “कसकि मणुऐ अंगुरा रा बगीचा लाऊ, अतै तठेरै चऊँ कनारी बाड़ लाऊ, अतै रस नचोढ़णै तांयें कुण्ड़ बणाऊ, अतै चौकीदारी करनै तांयें अक्क टपरी भी बणाई। तठेरा ठेका किसाना जो दिकरी अप्पू परदेसा जो चली गो।

² फिरी फला रै मौसमा मन्ज तिनी मणुऐ किसाना बलै अपणै अक्की नौकरा जो भैजु कि सो किसाना थऊँ अंगुरा रै बगीचे रै फला रा हेसा लेई अईआ।

³ पर किसाने सो पकड़ी करी मारू अतै खाली हत्थै भैजी दिता।

⁴ फिरी तिनी अक्क होर नौकर किसाना बलै भैजु; तियैं तसेरै मुण्डा मन्ज भोक्क पाई दिता अतै तसेरा अपमान भी करू।

⁵ फिरी तिनी मालकै अक्क होर नौकर भैजु; तियैं सो जानी थऊँ ही मकाई दिता। ता तिनी मणुऐ होर मतै मणु भैजै ता तियैं किसाने सो मारै-जकै अतै कुछ जो ता जानी थऊँ ही मकाई दिता।”

⁶ अबै तैस मणु बलै अक्क ही रैई गो थू जैडा तसेरा प्यारा पुत्र थू; आखरी मन्ज तिनी तियां बलै अपणा पुत्र ऐह सोची करी भैजु कि तियां सेरा आदर करना।

⁷ पर तियैं तैस पुत्रा जो इन्दै हेरू ता किसाने अप्पू मन्ज ऐह बल्लू कि, “ऐह ता वारिस हा; अईआ, अहै ऐसिओ ही मारी दिन्दै, ता ऐह मीरास इन्दी भूच्ची गाणीआ।”

⁸ अतै तियैं तैसिओ भी पकड़ी करी जानी थऊँ ही मकाई दिता, अतै अंगुरा रै बगीचे रै बाहर फैंकी दिता।

⁹ “ठेरैतांये अंगुरा रै बगीचे रै मालका कै करना? तैस ईच्ची करी तियां किसाना रा नाश करना, अतै अंगुरा रै बगीचा होर कसकि किसाना जो दि दिणा।

¹⁰ कै तुहै पवित्रग्रन्था मन्ज ऐह बचन ना पढुरा : “ ‘जैस पत्थरा जो राजमिस्त्रीये नक्कमा ठहराऊ थू, सो ही कूणा रा पत्थर भुन्दा।

¹¹ ऐह प्रभु री तरफा थऊँ हा, अतै इन्दी नजरा मन्ज अदभुत हा’!”

¹² ता तियैं प्रधान याजक, शास्त्रीये अतै स्याणै मणुऐ यीशु जो पकडणा चाऊ, क्ओकि सो समझी गै कि ऐह उदाहरण इन्दै वरोधा मन्ज बल्लू हा। सो मणु थऊँ डरै कि करखी ऐसा ना भोआ ऐह मणु इन्दै विरोधा मन्ज ना भूच्ची गान ता सो तैसिओ छड़ी के चली गै।

महाराजा जो कर दिणा

¹³ ता तियैं यीशु जो गल्ला मन्ज फसाणै तांयें कुछ फरीसी अतै हेरोदेस राजा रै गुट रै मणु तैस बलै भैजै।

¹⁴ तियैं ईच्ची करी तैस सोगी बल्लू, “हे गुरू, अहै जाणदै कि, तुहै सचै हिन। तुहै कसी री परवाह ना करदै; क्ओकि तुहै मणु री शक्ला हेरी के गल्ल ना करदै, पर प्रमात्मैं री बत्ता जो सच्चाई सोगी दसदै हिन। ता कै महाराजा जो कर दिणा ठीक हा या ना?

¹⁵ अहै दीन या ना दीन?” यीशुऐ तंयारै कपटी मना जो जाणी करी बल्लू, “मिन्जो कजो परखदै हिन? अक्क दीनार मिन्जो बलै लैईआ, कि अऊँ तैतिओ हेरू।”

¹⁶ सो लेई आये, अतै तिनी तियां सितै बल्लू, “ऐस दीनार मन्ज कसेरी छाप अतै नां हा?” तियैं बल्लू, “महाराजा रा।”

¹⁷ यीशुऐ तियां सितै बल्लू, “जैडा महाराजा रा हा सो महाराजा जो अतै जैडा प्रमात्मैं रा सो प्रमात्मैं जो देय्आ।” ता तियां जो तैस पुर बड़ी हैरानी भूई।

मरनै थऊँ बाद दोबारा जीणा अतै बैह

¹⁸ फिरी सदूकि जैड़ै बलदै हिन कि मरनै थऊँ दोबारा जी उठणा हा हि ना, यीशु वलै ईच्ची करी पुछणा लगै कि

¹⁹ “हे गुरू, मूसा री व्यवस्था मन्ज लिखुरा कि अगर कसकि रा भाई बिना औलाद रै मरी गच्छा अतै तसेरी घरावाळी रैई गच्छा। ता तसेरा भाई तैहा सितै बैह करी लेय्आ अतै अपणै भाई तांयें वंश पैदा करा।

²⁰ अक्क उदाहरण ऐह हा कि सत भाई थियै। पैहला भाई बैह करीके बिना औलाद रा मरी गो।

²¹ ता दूये भाई तैहा जनानी सितै बैह करी लैऊ अतै सो भी बिना औलादा रा मरी गो; अतै तियां ही त्रियै भी करी लैऊ।

²² अतै सता बलै भी औलादा ना भूई। सबी रै पिचै सो जनानी भी मरी गई।

²³ पर दोबारा जीणै थऊँ बाद सो कसेरी घरावाळी भुणीआ? क्ओकि सो सता भाई री घरावाळी थी।”

²⁴ यीशुऐ तियां सितै बल्लू, “तुहै ऐसा भुला मन्ज हिन कि तुहै ना पवित्रग्रन्था जो जाणदै हिन अतै ना हि प्रमात्मैं री सामर्थ जो?

²⁵ क्ओकि जैहणै तियां मरूरै थऊँ जी भूणा, ता ना ता तियां बैह करना अतै ना ही बैह मन्ज दिणै हिन, पर स्वर्ग मन्ज स्वर्गदूता सैईयें भूणै।

²⁶ मरूरै रा जी उूठणै रै बारै मन्ज तुहै मूसै री कताबा मन्ज झाड़ी रै उदाहरण मन्ज ना पढुरा कि प्रमात्मैं तैस सोगी बल्लू, ‘अऊँ तून्दै पूर्वज अब्राहम रा इसहाक रा, अतै याकूब रा प्रमात्मां हा?’

²⁷ प्रमात्मां मरूरै ना पर जिन्दै रा प्रमात्मां हा; पर तुहै बड़ी भुला मन्ज पैऊरै हिन।”

सबी थऊँ बडा हूक्म

²⁸ तियां मन्ज अक्क शास्त्री ऐह सोची करी कि यीशुऐ इन्या मणु जो ठीक-ठीक जवाव दितै, ता तिनी यीशु थऊँ पूछु, “सबी थऊँ मुख्य आज्ञा कुण जिनी हा?”

²⁹ यीशुऐ तियां जो जवाव दिता, “हे इस्त्राएल रै मणुओ हुणा! सबी आज्ञा मन्ज मुख्य ऐह हा कि ‘प्रभु इन्दा प्रमात्मां अक्कमात्र ही प्रभु हा।’

³⁰ ‘तू प्रभु अपणै प्रमात्मैं सोगी पूरै मना सितै, अपणै पूरै प्राणा सितै, अपणी पूरी अक्ला सितै अतै अपणी पूरी शक्ति सितै प्‍यार रखैं।’

³¹ अतै दूई आज्ञा ऐह हा कि, ‘तू अपणै पड़ेही सोगी अप्पू जिन्‍ना प्‍यार कर।’ ऐत थऊँ बड़ी होर कोई आज्ञा निय्आ।”

³² सो शास्त्री तैस सोगी बलणा लगा, “हे गुरू, बिलकुल ठीक! तुहै सच बल्लू कि प्रमात्मां अक्क ही हा, अतै तैसिओ छड़ी करी होर कोई भी प्रमात्मां निय्आ।

³³ अतै तैस सोगी पूरै मना, पूरी अक्ला, अपणै प्राणा सितै, अतै अपणी शक्ति सोगी प्‍यार रखा अतै पड़ेही सोगी भी अप्पू साईयें प्‍यार रखणा, सब तरह री बलिदान करना अतै भेंट चढ़ाणै थऊँ ऐह सब बदिकरी हा।”

³⁴ जैहणै यीशुऐ ऐह हेरू कि तिनी अक्ला रा जवाव दिता ता यीशुऐ तैसिओ बल्लू, “तू प्रमात्मैं रै राज्य रै नेड़ै हा।” अतै होर कसिओ कुछ पुछणै री हिम्मत ना भूई।

मसीह कसेरा पुत्र हा?

³⁵ फिरी यीशुऐ मन्दरा मन्ज उपदेश दिन्दै ऐह बल्लू, “शास्त्री क्ओ बलदै कि मसीह दाऊद रा पुत्र हा?”

³⁶ क्ओकि पवित्र आत्मा री मदद सोगी दाऊदे ऐह बलुरा : “प्रमात्मैं मेरै प्रभु सितै बल्लू, मेरै खब्बै कनारी बैह, जैहणै तक कि अऊँ तेरै बैरी जो हराई ना दिच्छु।”

³⁷ दाऊद अप्पू ही मसीह जो प्रभु बलदा, फिरी सो तसेरा पुत्र कियां? अतै भिड़ा रै मणु तसेरी गल्ला बडी खुशी सोगी हुणदै थियै।

शास्त्री थऊँ सावधान

³⁸ यीशुऐ अपणै उपदेश मन्ज तियां सितै बल्लू, “शास्त्री थऊँ चौकनै रेय्आ, जैड़ै लम्बै लम्बै चोगै पैहनी करी फिरदै अतै चाहन्दै कि मणु तियां जो बजारा मन्ज नमस्कार करन,

³⁹ यहूदी रै सभागार मन्ज उच्चै उच्चै सिंहासना पुर अतै धामा मन्ज भी खास खास जगह बैहणा चाहन्दै।

⁴⁰ सो विधवा रै घरा बार जो हड़प करी गान्दै हिन, अतै दिखावे तांयें बड़ी देर तक प्रार्थना करदै रैहन्दै हिन। सो अपणै आपा जो धर्मी दसणै री कोशिश करदै हिन। इन्या जो ज्यादा दण्ड़ मिलणा।”

कंगाल विधवा रा दान

⁴¹ जैहणै यीशु मन्दरा मन्ज दान पात्रा रै सामणै बैही करी हेरू करदा थू कि मणु मन्दरा रै दान पात्रा मन्ज कस तरीकै पैसै पाऊ करदै हिन; ता मतै सारै अमीर मणुऐ मता कुछ पाऊ।

⁴² ऐतनै मन्ज अक्क गरीबण विधवा ईच्ची करी दोई पैसै, जैड़ी की अक्की धेलै रै बराबर भी ना भुन्दी, सो दान दिता।

⁴³ ता यीशुऐ अपणै चेलै जो हैदी करी बल्लू, “अऊँ तूसु सोगी सच बलदा कि मन्दरा रै भण्ड़ारा मन्ज पाणै बाळै मन्ज ऐसा गरीब विधवै सबी थऊँ ज्यादा दान दिता हा।

⁴⁴ क्ओकि सबीये अपणी-अपणी कमाई री बढ़ोतरी थऊँ कुछ पाऊ हा, पर ऐसै ता अपणी कमी थऊँ पाऊ हा मतलब जैडा कुछ ऐसा बलै थू, अपणी पूरी कमाई पाई दितिआ।”