मत्ती 4 - गददी

यीशु री परीक्षा

¹ फिरी पवित्र आत्मा यीशु जो बियावान मन्ज लेई गो, ताकि शैतान तसेरी परीक्षा करी सका।

² यीशुऐ चाळी दिन रात कुछ ना खाऊ, फिरी तैसिओ भूख लगी।

³ ता शैतान ईच्ची करी तैस जो बलणा लगा, “अगर तू प्रमात्मैं रा पुत्र हा, ता बल्ली दे ऐह पत्थर रोटी बणी गान।”

⁴ यीशुऐ बल्लू; “पवित्रग्रन्था मन्ज लिखुरा कि मणु सिर्फ रोटी खाई करी ही ना, पर हरेक तैस बचन थऊँ जिन्दा रैई सकदा, जैडा कि प्रमात्मैं रै मुँहा थऊँ नकैन्दा।”

⁵ फिरी शैतान तैसिओ पवित्र नगर यरूशलेम रै मन्दरा जो लेई गो, अतै तैस मन्दरा री उच्ची जिनी चून्डी पुर खडेरी दिता।

⁶ अतै बल्लू, “अगर तू प्रमात्मैं रा पुत्र हा ता अपणै आपा जो ऐठी थऊँ फैंकी दे क्ओकि पवित्रग्रन्था मन्ज लिखुरा कि” “तैस तेरै बारै मन्ज अपणै स्वर्गदूता जो हूक्म दिणा; कि सो तिजो हत्थै-हत्थ चुक्की लैन; करखी ईयां ना भोआ कि तेरै पैरा मन्ज ठोकर लगा।”

⁷ यीशुऐ तैस सितै बल्लू “पवित्रग्रन्था मन्ज ऐह भी लिखुरी, तू प्रभु अपणै प्रमात्मैं री परीक्षा मत कर।”

⁸ फिरी शैतान यीशु जो अक्क बड़ै उच्चै जिन्‍नै पहाड़ा पुर लेई गो, अतै पूरै संसार रा राज्य अतै वैभव दसी करी

⁹ यीशु सोगी बल्लू, कि “जे अगर तू मेरै पैरै पैई करी मिन्जो प्रणाम करा, ता ऐह सब कुछ मुँ तिजो दि दिणा।”

¹⁰ ता यीशुऐ तैस सोगी बल्लू; “हे शैतान दूर भूच्ची गा, क्ओकि पवित्रग्रन्था मन्ज लिखुरी कि” “तू प्रभु अपणै प्रमात्मैं रै ही अगो झूकैं अतै सिर्फ तैसिओ प्रणाम करै।”

¹¹ ता शैतान तसेरै नेड़ै थऊँ चली गो, अतै स्वर्गदूत ईच्ची करी तसेरी सेवा करना लगै।

यीशु रै सेवा रै कम्मा री शुरूआत

¹² जैहणै यीशुऐ हुणु कि यूहन्‍ना पकडाई दिता ता यीशु यहूदा परदेस थऊँ गलील परदेसा जो चली गो।

¹³ अतै यीशु अतै तसेरै चेलै नासरत ग्राँ जो छड़ी करी झीला रै कनारै कफरनहूम ग्राँ मन्ज रैहणा लगा, जैडा कि जबूलून अतै नपताली रै इलाकै रै ब्रखै हा।

¹⁴ ताकि जैडा यशायाह भविष्‍यवक्तै बलुरा थू, पुरा भोआ कि :

¹⁵ “मणु जैड़ै जबूलून अतै नपताली रै इलाकै मन्ज रैहन्दै थियै, अतै यरदन नदी रै पार गैर यहूदी मणु जैड़ै गलील इलाकै मन्ज,

¹⁶ नैहरै मन्ज जिऊ करदै थियै, तिन्यै अक्क बड़ी लौ हेरी; अतै जैड़ै मौत रै नेड़ै बैहुरै थियै, तियां पुर सो लौ चमकी।”

¹⁷ तैस टैमां थऊँ यीशु प्रचार करना अतै ऐह बलणा शुरू करू, कि “अपणै पापा थऊँ मन फेरा क्ओकि स्वर्गा रा राज्य नेड़ै चली आ।”

पैहलै चेलै रा हैदआ गाणा

¹⁸ यीशुऐ गलील री झीला रै कनारै हन्डदै-हन्डदै दूँ भाई जो जंयारै नां शमौन जैसिओ पतरस बलदै हिन, अतै तसेरै भाई अन्द्रियास जो झीला मन्ज जाल पान्दै हेरू; क्ओकि सो मच्छुआरै थियै।

¹⁹ अतै तिनी तियां जो बल्लू, “मेरै पिचो चली अईआ, मुँ तुसिओ मणु जो इक्‍कठा करना अतै तियां जो प्रमात्मैं पिचो चलनै बाळा बणाणा।”

²⁰ सो तैहणै ही अपणै जाला जो छड़ी करी तैस पिचो चली पै।

²¹ तैड़ी थऊँ अगो गिच्ची करी, तिनी जबदी रै पुत्रा याकूब अतै यूहन्‍ना जो अपणै पिता सोगी किस्ती पुर जाला जो सुधारदै हेरू अतै यीशुऐ सो भी हैदी लै।

²² सो भी तैहणै ही किस्ती अतै अपणै पिता जो छड़ी करी तैस पिचो चली पै।

यीशु रा रोगी जो ठीक करना

²³ अतै यीशु पूरै गलील परदेस मन्ज फिरदा अतै यहूदी रै सभागार मन्ज उपदेश करदा अतै राज्य रा सुसमाचार प्रचार करदा, अतै मणु री हर तरह री बमारी अतै कमजोरी जो दूर करदा रैऊ।

²⁴ पूरै सीरिया इलाकै मन्ज तसेरा नां फैलदा गो, मणु सब बमारा जो, जैड़ै कई तरह री बमारी अतै दुखा मन्ज पैऊरै थियै, जिंआ मन्ज दुष्‍टात्मा थी, मिर्गी बाळै, अधरंगी जो तैस बलै लेई आये अतै तिनी तियां जो ठीक करू।

²⁵ गलील, दिकापुलिस, यरूशलेम, यहूदिया री जगह अतै यरदन नदी रै पारा थऊँ भिड़ा री भिड़ा तैस पिचो चली पैई।