मत्ती 23 - गददी

शास्त्री अतै फरीसी थऊँ सावधान

¹ ता यीशुऐ भिड़ा सोगी अतै अपणै चेलै सितै बल्लू,

² “शास्त्री अतै फरीसी जो मूसा री व्यवस्था री व्याख्या करनै रा अधिकार हा;

³ ठेरै तांयें सो जैडा कुछ तूसु सोगी बलन ता सो करा अतै मना, पर तियां मणु साईयें कम मत करदै; क्ओकि सो बलदै ता हिन पर करदै ना हिन।

⁴ सो ऐसै भारी बोझ जो जैतिओ चुकणा मुसकल हा, तैतिओ सो मणु रै कन्धै पुर लदी दिन्दै हिन; पर अप्पू तैतिओ उँगळी सोगी सरकाणा भी ना चाहन्दै। सो कैई तरह रै नियमा जो बणान्दै हिन, जैतिओ निभाणा मणु तांयें मुसकिल हा; पर अप्पू सो तियां नियमा रा पालन करनै री कोशिश भी ना करदै।”

⁵ “सो अपणै सब कम मणु जो दसणै तांयें करदै हिन; सो अपणै तबीजा जो चौड़ा करदै हिन अतै कपड़ै रै कोणै री झालरा जो ज्यादा करदै हिन।

⁶ धामा मन्ज उची उची जगह अतै करखी यहूदी रै सभागार मन्ज भी उची उची जगह बैहदैं हिन,

⁷ बजारा मन्ज नमस्कार, अतै मणु थऊँ आदर पाणा अतै रब्बी (गुरू) कहलवाणा तिईआं जो खरा लगदा।”

⁸ “पर तुहै अपणै आपा जो रब्बी (गुरू) मत कहलान्दैं, क्ओकि तून्दा अक्क ही गुरू हा, अतै तुहै सब भाई-बैहण अक्क समान हिन।

⁹ धरती मन्ज कसी जो अपणा पिता मत बलदै, क्ओकि तून्दा अक्क ही पिता हा, जैडा स्वर्गा मन्ज हा।

¹⁰ अतै स्वामी भी मत कहलान्दैं, क्ओकि तून्दा अक्क ही स्वामी हा, मतलब मसीहा।

¹¹ जैडा तूसु मन्ज बड़ा हा, सो तून्दा सेवक बणा।

¹² जैडा कोई अपणै आपा जो बड़ा समझदा, सो हल्का भूणा अतै जैडा कोई अपणै आपा जो हल्का समझदा, सो बड़ा करया गाणा।”

शास्त्री अतै फरीसी जो तंयारै पाखण्ड़ तांयै झिड़कणा

¹³ “हे पखंड़ी शास्त्री अतै फरीसीयों, तूसु पुर हाय! तुहै मणु तांयें स्वर्गा रै राज्य रै दारा बन्द करदै हिन, ना ता तुहै अप्पू प्रवेश करदै अतै जैडा कोई प्रवेश करना चाहन्दा तैसिओ भी रोकदै हिन।

¹⁴ [हे पखंड़ी शास्त्री अतै फरीसीयों, तूसु पुर हाय! विधवा रै घरा बार जो हड़प करी गान्दै हिन, अतै दसणै तांयें बड़ी देरा तक प्रार्थना करदै हिन ठेरैतांये तुसिओ ज्यादा दण्ड मुळना।”]

¹⁵ “हे पखंड़ी शास्त्री अतै फरीसीयों, तूसु पुर हाय! तुहै अक्की जिणै जो अपणै मत मन्ज लैईणै तांयें पूरै जल अतै थल मन्ज दूर-दूर तक फिरदै हिन, अतै जैहणै मर्जी मन्ज चली इन्दा ता तैसिओ अप्पू थऊँ भी दूगणा पखंड़ी बणाई दिन्दै हिन कि सो भी तूसु सोगी नरका जो गच्छा।”

¹⁶ “हे अंधे अगुवो, तूसु पुर हाय! जैडा कोई बलदै हिन कि अगर कोई मन्दरा री सौगन्द खा ता कुछ ना, पर अगर कोई मन्दरा रै सोनै री सौगन्द खा ता तैस सोगी बनी गाणा।

¹⁷ ओ मूर्खा अतै अंध्ओ, कुण बड़ा हा; सोना या सो मन्दर जैत मन्ज सोना पवित्र भुन्दा हा?

¹⁸ फिरी बलदै हिन अगर कोई वेदि री सौगन्द खा ता कुछ ना, पर जैड़ी भेंट चढ़ाऊरी, अगर कोई तठेरी सौगन्द खाला ता सो बनी गाणा।

¹⁹ ओ अंध्ओ कुण बड़ा हा; भेंट या वेदि जैत मन्ज भेंट पवित्र भुन्दी हा?

²⁰ ठेरैतांये जैडा वेदि री सौगन्द खान्दा, सो तसेरी अतै जैडा कुछ तैत मन्ज हा तठेरी भी सौगन्द खान्दा हा।

²¹ जैडा मन्दरा री सौगन्द खान्दा, सो तसेरी अतै तैत मन्ज रैहणै बाळै री भी सौगन्द खान्दा।

²² जैडा स्वर्गा री सौगन्द खान्दा, सो प्रमात्मैं रै सिंहासना री भी अतै तैत मन्ज बैहणै बाळै री भी सौगन्द खान्दा।”

²³ “हे पखंड़ी शास्त्री अतै फरीसीयों, तूसु पुर हाय! तुहै पुदिनै, हौंफ, अतै जीरै सांईयै स्वाद बाळी चिजा रा ता दशवांश दिन्दै हिन, पर तुहै व्यवस्था री खास गल्ला जो जियां कि न्याय, दया, अतै बफादारी जो छड़ी दितुरा; तुसिओ ता इन्या जो करदै रैहणा चहिन्दा थू। ईयां गल्ला जो ना छड़णा चहिन्दा थू।

²⁴ हे अंधे अगुवो, तुहै मच्छरा जो ता छाणी दिन्दै हिन, पर ऊँटा जो निगळी पान्दै हिन।”

²⁵ “हे पखंड़ी शास्त्री अतै फरीसीयों, तूसु पुर हाय! तुहै कटोरै अतै थाळी जो ऊपरा ऊपरा थऊँ ता मांजदै हिन पर अन्दरा थऊँ काळै अतै वेसवरै हिन।

²⁶ हे अंधे फरीसीयों, पहलै कटोरै अतै थाळी जो अन्दरा थऊँ भी मांजा कि सो बाहरा थऊँ भी छैळ भूच्ची गान।”

²⁷ “हे पखंड़ी शास्त्री अतै फरीसीयों, तूसु पुर हाय! तुहै तियां कब्रा साईयें हिन जियां पुर चूना फेरूरा अतै जैड़ी ऊपरा थऊँ ता छैळ हुजदी हिन, पर अन्दर मुरदै री हड्डी अतै सब तरह री गन्दगी सोगी भरूरी हिन।

²⁸ ऐस तरीकै तुहै भी मणु जो धर्मी ता हुजदै हिन, पर अन्दर कपट अतै अधर्म सोगी भरूरै हिन।”

शास्त्री अतै फरीसी पुर दण्ड री भविष्‍यवाणी

²⁹ “हे पखंड़ी शास्त्री अतै फरीसीयों, तूसु पुर हाय! तुहै भविष्‍यवक्ता री कब्रा जो सँवारदै हिन अतै धर्मी री कब्रा बणान्दै हिन,

³⁰ अतै बलदै हिन, ‘अगर अहै बापदादे रै टैमैं भुन्दै ता भविष्‍यवक्ता री हत्या मन्ज तंयारै सोगी ना भुन्दै।’

³¹ ईयां ता तुहै अपणै आप ही गवाही दिच्छु करदै हिन तुहै भविष्‍यवक्ता रै हत्यारै री सन्तान हिन।

³² ता गच्छा अतै तियां पापा जो पुरा करा जैड़ा तून्दै बापदादे करना शुरू करूरै थियै।”

³³ “तुहै जहरीलै अतै खतरनाक कीड़ै सांईयै दगाबाज अतै दुष्‍ट हिन, तूसु नरका रै दण्ड थऊँ किआं बचणा?

³⁴ ठेरैतांये हेरा, अऊँ तूसु बळै भविष्‍यवक्ता अतै बुद्धिमान अतै शास्त्री जो भैजदा हा; अतै तूसु तियां मन्ज कुछ जो मारी दिणा अतै क्रूस पुर चढ़ाई दिणा, अतै कुछ जो यहूदी रै सभागार मन्ज कोड़ै मरवाणै, अतै अक्की नगर थऊँ दूये नगरा जो नहाणै हिन।

³⁵ जिआं धर्मी हाबील थऊँ लेई करी बिरिक्याह रै पुत्र जकरिया तक, जियां जो तुहै मन्दरा अतै वेदि रै मन्जै मारी दितुरा थू, जैतणै धर्मी मणु रा खून धरती पुर बहाऊरा, सो तून्दै ही मुण्डा पुर पैणा हा।

³⁶ अऊँ तूसु सोगी सच बलदा, ईयां सबी गुनाह री सजा ऐस पीढ़ी रै मणु पर ईच्ची पैणी हा।”

यरूशलेम तांयें विलाप

³⁷ “हे यरूशलेम रै मणुओ! तुहै भविष्‍यवक्ता जो मारी दिन्दै, अतै जैड़ै तिजो बलै भैजै, तियां जो तैंई पत्थर मारै। कैतनी बरी मैंई चाऊ कि जियां कुकड़ी अपणै बच्चै जो अपणै पंखा थलै बचान्दीआ, तिईआं ही अऊँ भी तेरै बच्चै जो कठेरू पर तुहै मिन्जो ईयां ना कमाणा दिता।

³⁸ हेरा, तून्दा शहर तूसु तांयें उूजाड़ भूच्ची गोआ।

³⁹ क्ओकि अऊँ तूसु सोगी बलदा कि अबै थऊँ जैहणै तक तूसु ना बलणा, ‘धन्य हिन सो, जैड़ै प्रभु रै अधिकारा सोगी इन्दै हिन’ तैहणै तक तूसु मिन्जो फिरी कदी ना हेरना।”