मत्ती 16 - गददी

स्वर्गीय नशाणी री मांग

¹ फरीसी अतै सदूकि तैस बलै ईच्ची करी तैसिओ परखणा लगै तिनी बल्लू, “असिओ स्वर्गा रा कोई चमत्कार दस।”

² यीशुऐ भिड़ा सितै बल्लू, “जैहणै सँझ भुन्दी हा ता तुहै बलदै हिन जे, मौसम खरा रैहणा, क्ओकि अम्बर लाल हा,

³ अतै भ्यागा, अज तूफान ईणा, क्ओकि अम्बर लाल अतै ड़रावना हा। तुहै अम्बरा रै वदलाव जो पछैन्दै हिन, पर टैमां रै चिन्ह जो ना पछैन्दै?

⁴ दुष्‍ट अतै विस्वास ना करनै बाळै मणु चमत्कार हेरना चाहन्दै हिन, पर योना रै चमत्कार जो छड़ी होर कोई चमत्कार ना दसणा हा।” फिरी सो तियां जो छड़ी करी चली गो।

फरीसी अतै सदूकि री शिक्षा रा खमीर

⁵ अतै चेलै पार गान्दै टैमैं रोटी लैणा भुली गै थियै।

⁶ यीशुऐ तियां सितै बल्लू, हेरा; “फरीसी अतै सदूकि रै खमीरा थऊँ चौकनै रेय्आ।” “ठेरा अर्थ ऐह हा कि तुहै तंयारी गलत शिक्षा थऊँ बची करी रेय्आ।”

⁷ सो अप्पू मन्ज कणैणा लगै कि, “ऐह ठेरै तांयें बल्लू करदा कि अहै रोटी ना अन्दी।”

⁸ पर यीशुऐ ऐह जाणी करी बल्लू, “हे विस्‍वासा मन्ज कमजोर मणुओ, तुहै कजो अप्पू मन्ज ऐह विचार करू करदै हिन कि असु बलै रोटी निय्आ?

⁹ कै तुहै हालि तिकर ना समझै कि याद निय्आ कि जैहणै पँज हजार मणु तांयें पँज रोटी थी ता तुहै कतूणैं टोकरै चुकै थियै?

¹⁰ अतै चंऊर हजार मणु तांयें सत रोटी थी ता तुहै कैतनी टोकरी चुकी?

¹¹ तुहै कजो ना समझदै कि मैंई तूसु सितै रोटी रै बारै मन्ज ना बल्लू थू पर ऐह कि तुहै फरीसी अतै सदूकि रै खमीरा थऊँ चौकनै रेय्आ?”

¹² ता तंयारी समझा मन्ज आ कि तिनी रोटी रै खमीरा रै बारै मन्ज ना पर फरीसी अतै सदूकि री शिक्षा थऊँ चौकनै रैहणै जो बलुरा थू।

पतरसा रा यीशु जो मसीह स्वीकार करना

¹³ जैहणै यीशु कैसरिया फिलिप्पी रै शहरा मन्ज आ ता चेलै थऊँ पुछणा लगा; “मणु रा पुत्र कुण हा? मणु कै बलदै हिन?”

¹⁴ तिन्यै बल्लू, “कुछ बलदै हिन कि यूहन्‍ना बपतिस्मा दिणैबाळै, कुछ एलिय्याह कुछ यिर्मयाह अतै कुछ बलदै हिन भविष्‍यवक्ता थऊँ कोई अक्क हा।”

¹⁵ तिनी तियां सितै बल्लू, “पर तुहै कै बलदै हिन? अऊँ कुण हा?”

¹⁶ शमौन पतरस बलणा लगा, “तुहै जिन्दै प्रमात्मैं रा पुत्र मसीह हिन।”

¹⁷ यीशुऐ तैस सोगी बल्लू, “हे शमौन, योना रै पुत्र, तू धन्य हा, क्ओकि मांस अतै खूने ऐह तिजो ना दसु, पर मेरै पितै जैडा स्वर्गा मन्ज हा तसेरै कारण ऐह गल्ल तिजो पुर प्रकट भूई।

¹⁸ अऊँ तिजो सितै ऐह भी बलदा हा कि तू पतरस हा अतै ऐसा ही चट्टाना पुर मुँ अपणी कलीसिया बणाणिआ, अतै मौत री शक्ति भी तिजो पुर हाबी ना भूणी।

¹⁹ मुँ तिजो स्वर्गा रै राज्य री कुंजी दिणी, अतै जैडा कुछ तुद धरती पुर बनणा सो स्वर्गा मन्ज बनिणा, अतै जे कुछ तुद धरती पुर खोलणा सो स्वर्गा मन्ज खुलणा।”

²⁰ ता तिनी चेलै जो चेतावनी दिती कि सो कसी सोगी ना बलन कि अऊँ मसीह हा।

अपणी मौती रै बारै मन्ज यीशु री भविष्‍यवाणी

²¹ तैस टैमां थऊँ यीशु मसीह अपणै चेलै जो दसणा लगा कि “जरूरी हा कि अऊँ यरूशलेम जो गच्छू अतै स्याणै, प्रधान याजका अतै शास्त्री थऊँ मता दुख साऊं अतै मारया गच्छू अतै त्रियै दिन जी भूच्छुं।”

²² ऐह हुणी करी पतरस तैसिओ अलग लेई गो अतै ऐह बली करी झिड़कणा लगु “हे प्रभु, प्रमात्मां ऐसा ना करा! तूसु पुर कदी ऐसा ना भोआ!”

²³ यीशुऐ पतरस सोगी बल्लू, “हे पतरस शैतान जियां चाहन्दा तियां मिन्जो सोगी मत बल्ल अतै प्रमात्मैं री योजना मन्ज रूकावट मत बण। तू प्रमात्मैं री गल्ला पुर ना, पर मणु री गल्ला पुर मन लगांदा हा।”

यीशु पिचो चलनै रा मतलब

²⁴ ता यीशुऐ अपणै चेलै सोगी बल्लू, “अगर कोई मेरै पिचो ईणा चाह ता अपणै आपा रा इन्कार करा अतै अपणा क्रूस चुकी करी मेरै पिचो चला।

²⁵ क्ओकि जैडा कोई अपणा प्राण बचाणा चाह तैस सो खोई दिणै, पर जैस कसी मेरै तांयें अपणै प्राण दिणै, तैस सो पाणै।

²⁶ अगर मणु सब कुछ जैडा तसेरी इच्छा हा पाई लेय्आ अतै अपणै प्राणा जो खोई देय्आ ता तठेरा कै फायदा? अतै मणु अपणै प्राणा रै बदलै कै दिणा?

²⁷ क्ओकि मणु रा पुत्र अपणै स्वर्गदूता सोगी पिता री महिमा करदा ईणैबाळा हा। ता तैस सबी मणु जो तसेरै कम्मा रै अनुसार प्रतिफल दिणा।

²⁸ अऊँ तूसु सोगी सच बलदा कि ऐड़ी खडुरै मन्ज कुछ, जैहणै तक मणु रै पुत्रा जो तसेरै राज्य मन्ज इन्दा ना हेरी लैन, तैहणै तक तियां ना मरना।”