मत्ती 10 - गददी

यीशु रै बारह चेलै

¹ यीशुऐ अपणै बारह प्रेरिता जो हैदी करी, तियां जो दुष्‍टात्मा जो कढणै रा अधिकार दिता, कि तियां जो कड्ड़ी सकन अतै सब तरह री बमारी अतै सब कमजोरी जो दूर करन।

² अतै बारह प्रेरिता रै नां ऐह हिन पैहला शमौन, जैसिओ पतरस भी बलदै हिन, तसेरा भाई अन्द्रियास; जबदी रा पुत्र याकूब, अतै तसेरा भाई यूहन्‍ना;

³ फिलिप्पुस अतै बरतुल्मै थोमा अतै चुंगी लैणै बाळा मत्ती, हलफै रा पुत्र याकूब अतै तद्दै।

⁴ शमौन कनानी, अतै यहूदा इस्करियोती, जिनी तैसिओ पकड़ाई भी दिता थू।

बारह चेलै रा सेवा रै कम

⁵ बारह प्रेरिता जो यीशुऐ ऐह हूक्म दी करी भैजु कि “गैर यहूदी री कनारी मत गान्दै, अतै सामरिया रै कसी भी नगर मन्ज प्रवेश मत करदै।

⁶ पर इस्त्राएल रै घरानै री गवाचुरी भैड़ा बलै ही गच्छैं।

⁷ अतै चलदै चलदै प्रचार करा कि ‘स्वर्गा रा राज्य नेड़ै हा।’

⁸ बमारा जो ठीक करा, मरूरै जो जिय्आ, कोढ़ी जो शुद्ध करा, दुष्‍टात्मा जो कडआ। तुहै मुफ्‍त मन्ज पाऊरा, मुफ्‍त मन्ज ही देय्आ।

⁹ अपणै बटुए मन्ज ना ता सोना, अतै ना रूपियें, अतै ना तांबा रखणा।

¹⁰ बत्ता तांयें ना झोल्ळी रखा, ना दोई कुरतै, ना जुटै अतै ना ही होट्‌ठी लेय्आ, क्ओकि मजदूर जो तसेरी मजदूरी मुळना चहिन्दीआ।

¹¹ “जैस कसी नगर या ग्राँ मन्ज गान, ता पता करा कि तैड़ी कुण विस्‍वासा लायक हा जैहणै तक तैड़ी रैहन तैस बलै ही रेय्आ।

¹² अतै घरा मन्ज प्रवेश करदै टैमैं तैसिओ आशीष दिन्यै।

¹³ अगर तैस घरा रै मणु योग्य भोलै ता तुन्दी आशीष तियां तक पुजणा पर अगर योग्य ना भोलै ता तुन्दी दितुरी आशीष तूसु बलै ही फिरी ईणिआ।

¹⁴ अतै जैडा कोई तुसिओ ना ग्रहण करला, अतै तुन्दी गल्ला ना हुणला, तैस घरा या तैस नगर थऊँ नकैन्दै अपणै पैरा री धूड झाड़ी फैकैं।

¹⁵ अऊँ तूसु सोगी सच बलदा, कि न्याय रै दिन तैस नगर री दशा सदोम अतै अमोरा रै शहरा रै बुरै मणु री दशा थऊँ भी बुरी भुणीआ।

इणै बाळा संकट

¹⁶ “हेरा, अऊँ तुसिओ असहाय भैड़ा साईयें ऐसै मणु रै मन्जै भैजु करदा जैड़ै भेड़िये सांईयै खतरनाक हिन। ठेरै तांयें कीड़ै सांई बुद्धिमान अतै कबूतरा सांई भोळै बणा।

¹⁷ पर मणु थऊँ सावधान रेय्आ, क्ओकि तियां तुसिओ यहूदी महासभा मन्ज घसिटणा, अतै अपणै सभागार मन्ज कोड़ै मरवाणै।

¹⁸ तुसै मेरै तांयें हाकमा अतै राजा रै सामणै तियां मणु पुर, अतै गैर यहूदी पुर गवाह भूणै तिकर पुजायै गाणै।

¹⁹ जैहणै तियां पकड़वाणा ता ऐह चिन्ता मत करदै कि कस तरीकै, या कै बलणा क्ओकि जैडा कुछ तूसु बलणा भोला, सो तैस ही टैमैं तुसिओ दसी दिणा।

²⁰ क्ओकि बलणै बाळै तुसै ना हिन, पर तून्दै पितै री आत्मा तूसु मन्ज बलदा हा।

²¹ “भाई, भाई जो अतै पितै पुत्रा जो, मारनै तांयें पकड़ाणा, अतै बच्चै बाळै माता पिता रै वरोधा मन्ज खड़ी करी तियां जो मरवाई दिणा।

²² मेरै नां री वजह थऊँ मणु तूसु सोगी बैर करना, पर जैस अन्त तक धीरज रखणा उद्धार तसेरा ही भूणा।

²³ जैहणै सो तुसिओ अक्की नगर मन्ज सतान, ता दूये नगरा जो नह्ही गच्छैं। अऊँ तूसु सोगी सच बलदा, जैहणै तूसु इस्त्राएल रै सबी नगरा मन्ज घुमी बैहणा ता मणु रै पुत्रा चली ईणा।

²⁴ “चेला अपणै गुरू थऊँ बड़ा निय्आ; अतै ना दास अपणै स्वामी थऊँ।

²⁵ चेलै रा गुरू रै, अतै दासा रा स्वामी रै बराबर भूणा ही बड़ा हा। जैहणै तिन्यै घरा रै स्वामी जो शैतान बल्लू ता तसेरै घरावाळै जो कजो ना बललै?”

कस थऊँ डरना?

²⁶ “ठेरैतांये तियां थऊँ मत डरदै, क्ओकि कुछ भी छिपुरा निय्आ जैडा खुलणा निय्आ, सब कुछ जैड़ा छिपुरा सो प्रकट भूच्ची गाणा।

²⁷ जैडा अऊँ तूसु सोगी चुपचाप बलदा जियां मणु नैहरै मन्ज बलदै हिन्‍न, सो उजालै मन्ज बला अतै जैडा कुछ कनै हुणदै हिन, तैतिओ उच्ची जगह थऊँ प्रचार करा।

²⁸ जैड़ै शरीरा जो मारदै हिन, पर आत्मा जो ना मारी सकदै, तियां थऊँ मत डरदै पर प्रमात्मैं थऊँ ड़रा, जैडा आत्मा अतै शरीर दूनी जो नरक री अगी मन्ज करी सकदा हा।

²⁹ अक्क पैसै री दोई चिड़ी बिकदी हिन? फिरी भी तून्दा पिता प्रमात्मां जाणदा जैहणै तियां मन्ज अक्क भी पैन्दी हा।

³⁰ पर तून्दै हैरा रै बाळ भी सब गीणुरै हिन।

³¹ ठेरैतांये ड़रा मत; तुन्दी किमत मती चिड़ी थऊँ बदिकरी हा।”

³² “जैस कसी मणु सामणै मिन्जो मनी लैणा, सो मुँ भी स्वर्गा मन्ज बैहुरै अपणै पितै रै सामणै मनी लैणा

³³ पर जैस कसी मणु सामणै मेरा इन्कार करना मुँ भी तसेरा स्वर्गा मन्ज बैहुरै अपणै पितै रै सामणै इन्कार करना।”

यीशु रै आगमन रा परिणाम

³⁴ “ऐह मत समझा, कि अऊँ धरती पुर मणु मन्ज मेल मिलाप करवाणा छूरा; अऊँ मेल मिलाप कराणा ना, पर तलवार चलवाणा छूरा।”

³⁵ अऊँ ता छूरा, कि “मणु जो तसेरै पिता थऊँ, अतै कुल्ळी जो तसारी मौआ थऊँ, अतै नूहा जो तसारी हहुआ थऊँ अलग करू।

³⁶ मणु रै बैरी तसेरै घरा रै मणु ही भूणै।”

³⁷ “जैडा माता या पिता जो मिन्जो थऊँ मता प्यारा जाणदा, सो मेरै लायक निय्आ अतै जैडा दब्बू या कुल्ळी जो मिन्जो थऊँ प्यारा जाणदा सो भी मेरै लायक निय्आ।

³⁸ अतै जैडा अपणा क्रूस लेई करी मिन्जो पिचो ना चला सो मेरै चेला ना भुच्‍ची सकदा।”

³⁹ “जैडा अपणै प्राण बचांदा, तैस सो खोई दिणै; अतै जैडा मेरी वजह थऊँ अपणै प्राणा जो देला, तैस सो पाणै हिन।

प्रतिफल

⁴⁰ “जैडा तूसु जो ग्रहण करदा, सो मिन्जो ग्रहण करदा; अतै जैडा मिन्जो ग्रहण करदा, सो मेरै भैजणै बाळै जो ग्रहण करदा।

⁴¹ जैडा भविष्‍यवक्ता जो भविष्‍यवक्ता जाणी करी ग्रहण करदा, तैस भविष्‍यवक्ता रा इनाम पाणा; अतै जैडा धर्मी जाणी करी धर्मी जो ग्रहण करदा, तैस धर्मी रा इनाम पाणा।

⁴² जैडा कोई ईयां हल्कै थऊँ अक्की जो भी मेरा चेला मनी करी सिर्फ अक्क गलास ठंड़ा पाणी पयांदा, अऊँ तूसु सोगी सच बलदा, तैस अपणा इनाम जरूर पाणा।”