लूका 9 - गददी

बारह प्रेरिता रा भैजणा

¹ फिरी यीशुऐ बारह प्रेरिता जो हैदी करी तियां जो दुष्‍टात्मा जो कड़णै री अतै बमारा जो ठीक करनै री सामर्थ अतै अधिकार दिता।

² तिनी सो प्रमात्मैं रै राज्य रै बारै मन्ज मणु जो हुनाणै तांयें अतै बमारा जो ठीक करनै तांयें भैजै।

³ तिनी तियां जो वल्‍लु, “सफरा तांयें अप्पू सोगी कुछ मत लैन्दै, ना ता होठी, ना ता झोल्ळू, ना ता रोटी, ना पैहा-धेला अतै ना ही दोई-दोई कुरतै

⁴ जैस कसी रै घरै तुहै गल्लै, तैठी ही तुहै रैहन अतै तैड़ी थऊँ ही अगो गच्छैं।

⁵ जैडा कोई तुन्दी गल्ला हुणी करी अणहुणा करा, ता तैसा जगहा थऊँ निकळदै टैमैं अपणै पैरा री धुड़ झाड़ी फैकैं ताकि तियां पुर ऐसा गल्ला री गवाही भोआ।”

⁶ अतै चेलै ग्राँ शहरा मन्ज हड़न्दै-फिरदै सुसमाचार हुणादै अतै बमारा जो भी ठीक करदै गै।

राजा हेरोदेस री उलझन

⁷ देशा रै चौथै हिस्से रा राजै हेरोदेस भी जैहणै ऐह सब कुछ हुणु ता ड़री गो क्ओकि कुछ मणु बलदै थियै कि यूहन्‍ना मरूरै थऊँ जी भुआ,

⁸ कुछ बलणा लगै कि एलिय्याह भविष्‍यवक्ता हुजुआ अतै कुछ होर बलणा लगै कि पूराणै जमानै रा कोई भविष्‍यवक्ता जी ऊठुआ।

⁹ पर हेरोदेस बलणा लगा, “यूहन्‍ना बपतिस्मा दिणैबाळै रा ता मैंई सिर कटवाऊरा थू, अबै ऐह कुण हा जसेरै बारै मन्ज अऊँ ऐह गल्ला हुणु करदा?” ता हेरोदेसा जो तैसिओ हेरनै री रूह भूई।

पँज हजार मणु जो खुआणा

¹⁰ सो प्रेरित जैहणैं फिरी आये ता तियैं अपणै-अपणै कम्मा रै बारै मन्ज यीशु जो दस्सी दिता ता फिरी यीशु तियां जो टारा करीके बैतसैदा नां रै शहरा जो लेई गो।

¹¹ पर जैहणै मणु जो ऐह पता लगु ता सो तंयारै पिचो चली पै अतै यीशु भी बड़ी खुशी सितै तियां सोगी मुळु अतै प्रमात्मैं रै राज्य री तियां सोगी गल्ला करना अतै बमारा जो ठीक करना लगा।

¹² जैहणै दिन घरही चलु ता सो बारह चेलै ईच्ची करी यीशु सितै बलणा लगै, “ऐसा भिड़ा जो ऐठी थऊँ भैजी देय्आ ताकि ऐह ग्राँ मन्ज गिच्ची करी अपणै खाणै रा बन्‍दोबस्त करी लैन, क्ओकि ऐसा सुनसान जगहा मन्ज ता खाणै जो कुछ ना मुळनै बाळा।”

¹³ ता तिनी तियां जो वल्‍लु, “तुहै ही इन्या जो खाणै रा प्रबन्ध करा भला।” ता तियैं वल्‍लु, “असु वलै पँजा रोटी अतै दूँ मछली छड़ी होर कुछ भी नियां पर हाँ, जे अहै खरीदी करी लैईन ता खुआई सकदै हिन,”

¹⁴ (क्ओकि तैहा भिड़ा मन्ज लगभग पँज हजार मर्द ही मर्द थियै जनानी अतै बच्चै री गिणती ना करूरी थी) ता यीशुऐ चेलै सितै वल्‍लु, “ईयां सबी मणु जो पजाँह-पजाँह री पंक्ति मन्ज बहाली देआ।”

¹⁵ तियैं तसेरै कणैऊरै मुताबक कमाऊ, अतै सबी री पंक्ति लाई दिती।

¹⁶ फिरी तिनी सो पँज रोटी अतै दोई मच्छी लेई अतै स्वर्गा री कनारी हेरी करी प्रमात्मैं रा धन्यवाद करू अतै रोटीयो त्रोड़ी-त्रोड़ी करी चेलै जो दिन्दा गो ताकि सो मणुओ दीन।

¹⁷ सब मणु खाई करी रजी गै अतै चेलै रोटी रै बचुरै टुकड़ै री बारह टोकरी भरी।

पतरसा जो यीशु जो मसीहा स्वीकार करना

¹⁸ जैहणै यीशु एकान्त मन्ज प्रार्थना करू करदा थू ता चेलै भी तैस सोगी थियै, ता तिनी तियां थऊँ पूच्छु, “मणु मिन्जो कै बलदै?”

¹⁹ तियैं जवाव दिता, “कोई बल्‍दा यूहन्‍ना बपतिस्मा दिणैबाळा, कोई बलदा एलिय्याह अतै कोई ऐह भी बलदा कि पूराणै भविष्‍यवक्ता थऊँ कोई जी ऊठुआ।”

²⁰ यीशुऐ तियां थऊँ पूच्छु, “पर तुहै मिन्जो कै बलदै हिन?” पतरसै जवाव दिता, “प्रमात्मैं रा मसीह।”

²¹ ता यीशु तियां जो टणकाई करी वल्‍लु कि, “यहा गल्ला कसी सितै मत बलदै।”

अपणी मौती रै बारै मन्ज यीशु री भविष्‍यवाणी

²² फिरी यीशुऐ वल्‍लु, “मणु रै पुत्रा तांयें जरूरीआ कि सो दुख भोगा अतै धर्मा री गल्ला जो जाणनै बाळै, स्याणै, प्रधान याजक अतै शास्त्री तैसिओ बुरा समझी करी मारी दीन अतै सो त्रिऐ दिन फिरी जी उठा।”

यीशु रै पिचो चलनै रा अर्थ

²³ यीशुऐ सबीओ वल्‍लु, अगर कोई मिंजो पिचो ईणा चाहन्दा ता, सो अपणै आपा रा इन्कार करा अतै रोज अपणा क्रूस चुकी करी मिन्जो पिचो चला।

²⁴ क्ओकि जैडा कोई अपणै प्राणा जो बचाणा चाहला तैस अपणै प्राणा थऊँ हथ्‍थ धूणै पर जैस कसी मिंजो पिचो अपणै प्राण दिणै तसेरै प्राण बचाया गाणै हिन।

²⁵ अगर दुनिया रै सुखा-चैना पान्दै-पान्दै मणु रै प्राण ही चली गाहन या तसेरा कोई नूकसान ही भूच्ची गच्छा ता तैसा गल्ला रा कै फायदा?

²⁶ जैडा कोई मेरा नां लैन्दा बेईज्ती महसुस करला ता जैहणै मणु रै पुत्रा अपणै पिता अतै पवित्र स्वर्गदूता महिमा सोगी ईणा ता तैस भी तैस मणु थऊँ बेईज्ती महसुस करनी हा।

²⁷ अऊँ तुसिओ बलदा, “कि जैड़ै ऐठी खडुरै हिन, तियां तैहणै तिकर ना मरना जैहणा तिकर प्रमात्मैं रा राज्य ना ईन्दा।”

यीशु रा रूप बदलिणा

²⁸ ईयां गला रै कोई अठ दिन बाद यीशु अपणै चेलै पतरस, यूहन्‍ना अतै याकूब जो सोगी लेई करी प्रार्थना करनै तांयें पहाड़ा जो गो।

²⁹ जैहणै यीशु प्रार्थना करू करदा थू, ता तसेरै चेहरै रा रूप बदली गो अतै तसेरै कपड़ै बर्फा सैई चमकणा लगै।

³⁰ अतै भविष्‍यवक्ता मूसा अतै एलिय्याह तैठी यीशु सोगी गल्ला करू करदै थियै।

³¹ ऐह महिमा सोगी हुजै अतै प्रतापी भविष्‍यवक्ता यीशु रै मरनै री चर्चा करू करदै थियै, जैड़ी कि यरूशलेम मन्ज भूणैबाळी थी।

³² पतरस अतै तसेरै सोगी चेलै निन्द्रा मन्ज टुलु करदै थियै अतै जैहणै सो चत्तन भुएै ता तियैं यीशु रै चेहरै पुर तेज हेरू अतै दोई मणु तसेरै ब्रखै खडुरै हेरै।

³³ जैहणै सो मणु यीशु रै नेड़ै थऊँ गाहणा लगै ता पतरस यीशु सितै बलणा लगु, “हे स्वामी मिन्जो लगदा इन्दा ऐठी रैहणा ही ठीक हा अतै अबै असु ऐठी त्राई झोपड़ी बनाणी, अक्क तिजो तांऐ, अक्क मूसा अतै अक्क एलिय्याह तांयें।” पर सो ना जाणदा थू कि कै कणैऊ करदा।

³⁴ जैहणै सो ऐह कणैणा ही लगुरा थू ता अक्की बदळै सो घेरी लै, सो ऐह हेरी करी ड़री गै।

³⁵ ता फिरी तैस बदळा थऊँ ऐह आकाशवाणी भूई, “ऐह मेरा पुत्र हा, मैंई ऐसिओ चुणुरा हा अतै तुहै सेरी हुणा।”

³⁶ ऐसा आकाशवाणी भुन्दै ही यीशु अकेला भूच्ची गो अतै चेलै भी चुप भूच्ची गै अतै तियैं जे कुछ भी हेरू, तठेरी चर्चा कसी सितै ना करी।

दुष्‍टात्मा रै सताऊरै दब्बू जो ठीक करना

³⁷ दुऐ दिन जैहणै यीशु अतै चेलै पहाड़ा थऊँ ओसै ता मणु री बड़ी भीड़ तैस सितै मुळी।

³⁸ तैहा भिड़ा मन्ज अक्क मणुऐ जोरा सितै बल्लू, “हे गुरू अऊँ तिजो सितै बिनती करदा मेरै गोबरू पुर दया-दृष्‍टि कर क्ओकि ऐह मेरा इकलौता ही पुत्र हा।

³⁹ अतै हेर भला दुष्‍टात्मा ऐसिओ पकड़ी करी मरोडु करदी हा अतै ऐह हेरदै-हेरदै ही बकी नकैन्दा। सेरै मुआँ थऊँ झाग नकैन्दा अतै दुष्‍टात्मा थऊँ ऐस जो छुटकारा ना मुळु करदा।

⁴⁰ मैंई ऐसा दुष्‍टात्मा जो कढणै तांयें तेरै चेलै वलै बिनती करी पर सो इन्यारै वोलै ना नेकैई।”

⁴¹ ता यीशुऐ जवाव दिता, “ओ अविस्वासी अतै भटकुरै मणुओ, मुँ कैहणै तिकर तूसु सोगी रैई करी तुन्दी हुणदै रैहणा? अपणै गोबरू जो मिन्जो बलै लेई।”

⁴² ता सो जैहणै तैसिओ लेई करी आ ता दुष्‍टात्मैं सो फिरी मरोडु अतै परछाड़ी करी फैकुं, पर यीशुऐ दुष्‍टात्मा जो फटकार लाई करी तैस थऊँ नकाळी दिता अतै गोबरू जो ठीक करीके तसेरै पिता रै हवालै करी दिता।

अपणी मौती रै बारै मन्ज यीशु री दोबारा भविष्‍यवाणी

⁴³ ता सब मणु प्रमात्मैं रै ऐस महान कम्मा जो हेरी करी हैरान भूच्ची गै।

⁴⁴ पर जैहणै सो सब मणु ईयां कमां जो हेरी करी हैरान भूच्छु करदै थियै ता यीशुऐ अपणै चेलेओ वल्‍लु, “तुहै ईयां गल्ला री कनारी धैन देआ, मणु रै पुत्रा जो मणु ही पकड़ाणै बाळै हिन।”

⁴⁵ पर सो ना ता यहा गल्ला जो समंझी सकै अतै ना ही ऐसा गल्ला रा भेद पाई सकै अतै यहा गल्ला जो पुच्छणै थऊँ भी डरदै थियै।

सबी थऊँ बड़ा कुण?

⁴⁶ फिरी तसेरै चेलै अप्पू मन्ज वैंसणा लगै कि असु मन्ज बड़ा कुण हा।

⁴⁷ पर यीशु तंयारै मना री जाणी लेई अतै अक्की दब्बू जो अपणै ब्रखै खरेडी करी

⁴⁸ तिआंओ वल्‍लु, “जैडा कोई मेरै नां सितै ऐस गोबरूओ ग्रहण करदा सो मिन्जो ग्रहण करदा अतै जैडा कोई मिन्जो ग्रहण करदा सो मेरै भैजणै बाळै जो ग्रहण करदा। जैडा कोई तूसु मन्ज अपणै आपा जो सबी थऊँ हल्का समझदा सो ही सबी थऊँ बड़ा।”

जैडा विरोधी निय्आ सो इन्दै पक्ष मन्ज हा

⁴⁹ तैहणै यीशु रै चेलै यूहन्‍नै वल्‍लु, “हे स्वामी, अहै अक्की मणु जो तेरा नां लेई करी दुष्‍टात्मा जो कड़दै हेरूआ अतै अहै तैसिओ मना करीआ, क्ओकि सो इन्दा सोगी भूच्ची करी भी तेरै पिचो ना चलदा।”

⁵⁰ यीशुऐ तैसिओ वल्‍लु, “तैस जो ना मत करा क्ओकि जैडा तून्दा विरोधी निआं, तैस जो अपणा ही समझा।”

सामरी यीशु रै विरोधी बणै

⁵¹ जैहणै यीशु रै स्वर्गा जो गाणै रै दिन पूरै भूणै बाळै थियै, ता तिनी यरूशलेम जो गाहणै रा पक्का विचार करू।

⁵² तिनी अपणै अगो सामरिया देशा रै हर ग्राँ मन्ज ऐसा गल्ला रा संदेसा लेई करी दूत भैजै कि, सो तैस तांयें जगह तैयार करन।

⁵³ पर तैस देशा रै मणुऐ सो तैड़ी ईणा ना दितै, क्ओकि सो तैस रस्तै मितै यरूशलेम जो चलूरा था।

⁵⁴ ऐह हेरी करी तसेरै चेलै याकूब अतै यूहन्‍नै वल्‍लु, “हे प्रभु कै तू चाहन्दा कि अहै ऐह हूक्म दीन कि अम्बरा थऊँ अग बरी करी ईयां जो भस्म करी देआ?”

⁵⁵ पर यीशुऐ तियां जो झिड़कू अतै वल्‍लु, “कै तुहै जाणदै कि तुहै कसा आत्मा रै हिन?

⁵⁶ क्ओकि मणु रा पुत्र मणु रै प्राणा जो नाश करना ना पर बचाणा छूरा।” अतै सो कसकि होरी ग्राँ मन्ज चली गै।

यीशु रा चेला बणनै री किमत

⁵⁷ जैहणै सो बता मन्ज चलुरै थियै ता, कसकिऐ यीशु सितै वल्‍लु, “जैड़ी कड़ी तूसु गाणा, मुँ भी तून्दै पिचो ही चलना।”

⁵⁸ यीशुऐ तैस सोगी बल्लू, “लोमड़ी रै रैहणै जो कूड्‍ड भुन्दै अतै अम्बरा रै पखेरू रै रैहणै तांई अल्लै भुन्दै हिन, पर मणु रै पुत्रा जो रैहणै तांई अपणा कोई ठकाणा निय्आ।”

⁵⁹ तिनी दूये मणु जो बल्लू, “मेरै पिचो चली आई।” तिनी वल्‍लु, “हे प्रभु, मिन्जो पैहलै घरा जो गाणा देआ, कि मेरै पिता रै मरनै थऊँ बाद तसेरा दाह संस्कार करनै थऊँ बाद तेरै पिचो चलूं”

⁶⁰ यीशुऐ तैसिओ वल्‍लु, “मरूरै जो अपणै मुरदै रा दाह संस्कार करना दे, पर तू गिचीकरी प्रमात्मैं रै राज्य रा समाचार हुणा।”

⁶¹ ता अक्की होरी वल्‍लु, “हे प्रभु, अऊँ तिजो पिचो चलला पर पैहलै मिन्जो गाहणा दे कि अपणै घरावाळै थऊँ बिदाई लेई करी ईच्छुं।”

⁶² यीशुऐ वल्‍लु, “जैडा कोई अपणा हथ्‍थ हल्ळा पुर रखी करी पचूँह हेरदा सो प्रमात्मैं रै राज्य रै काबल नियां।”