लूका 5 - गददी

यीशु रै पैहलै चेलै

¹ यीशु जैहणै गलील झीला रै कण्ड़ै खडूरा थू, ता मणु री बड़ी भारी भीड़ तसेरै चौं कनारी खडी करी प्रमात्मैं रा बचन हुणना लगुरी थी, ता ऐसा भुआ कि,

² यीशु री नजर तैहा झीला रै कण्ड़ै खडूरी दूँ किस्ती पुर पैई जिंआं थऊँ मच्‍छवारै ओसी करी अपणै जाला धोऊ करदै थियै।

³ ता यीशु अक्की किस्ती पुर चड़ी गो, जैड़ी कि शमौन नां रै अक्की मणु री थी, तैसिओ बलणा लगू, “किस्ती जो कण्ड़ै थऊँ थोड़ा जिन्‍ना अगो लेई चल।” ता सो तैहा किस्ती पुर चड़ी करी तियां मणु जो बचन हुणाणा लगू।

⁴ जैहणै सो भिड़ा जो बचन हुणाई बैहु ता तिनी शमौना जो बल्लू “किस्ती जो डूगी आळी री कनारी लेई चल अतै मच्छी पकड़णै जो जाल फैंक।”

⁵ ता शमौने तैसिओ जवाव दिता, “हे मेरै गुरू अहै पूरी रात मेहनत करदै रै पर कख भी पल्लै ना पेयू, पर चलो जे तुहै बलदै ता अऊँ जाल फैंकदा”

⁶ जैहणै तिन्यै अपणै जाल फैंकै ता मती भारी मच्छी तंयारै जाला मन्ज फसी आई अतै तंयारै जाल छकी चलै।

⁷ ता ऐह हेरी करी तियैं अपणै संगी-साथिओ जेङै होरी किस्ती पुर थियै सिनका लाई के हैदणा लगै कि इन्दी मदद करा। फिरी तंयारी दोनों किस्ती मच्छी सितै ऐतनी भरी गई कि ईयां लगा कि अबै डूबी गाणी।

⁸ ऐह हेरी करी शमौन जैसेरा नां पतरस भी थू, यीशु रै पैरै पैऊ अतै बलणा लगू, “हे गुरू तुहै ऐठी थऊँ चली गच्छा क्ओकि अऊँ अक्क पापी मणु हा।”

⁹ तिनी इन्या ठेरै तांयें बल्लू क्ओकि तैसिओ अतै तसेरै साथिओ ऐतनी भारी मच्छी पकडी के बड़ी हैरानगी भूई।

¹⁰ जबदी रै पुत्रा याकूब अतै यूहन्‍ना जो जैड़ै तसेरै सोगी थियै ऐह हेरी करी हैरानगी भूई। तैहणै यीशु शमौना सितै बलणा लगू, “डर मत, हुण, मेरै पिचो चली अईआ, मुँ तुसिओ मणु जो पकडणा अतै तियां जो प्रमात्मैं पिचो चलनै बाळा बणाणा।”

¹¹ ऐह सब हुणी करी तियैं किस्ती कनारै पुर लेई अन्दी अतै सब कुछ छड़ी करी यीशु पिचो चली पै।

कोढ़ी जो ठीक करना

¹² फिरी अक्की नगरा मन्ज यीशु री मुलाकात अक्की कोढ़ी सोगी भूई, जैसिओ बडा भारी कोढ़ थू, सो यीशु अगो घुटनै रै भारै बही करी तैस सोगी प्रार्थना करना लगू, “हे प्रभु, अगर तुहै चाहन ता मिन्जो ठीक करी सकदै।”

¹³ यीशुऐ तसेरै नेड़ै ईच्ची करी तैसिओ छुऊँ, अतै बल्लू अऊँ चाहन्दा कि तू ठीक भूच्ची गच्छा ता सो तैहणै ही कोढ़ थऊँ ठीक भूच्ची गो।

¹⁴ तैत थऊँ बाद यीशुऐ तैसिओ बल्लू, “जैड़ा कुछ तिजो सोगी भुआ तैतिओ कसिओ मत दसदा। सिधा अपणै याजका जो गिच्ची करी दस अतै जैड़ा ठीक भूणै पुर मूसा री व्यवस्था अनुसार चढ़ावा हा तैतिओ चढ़ा, कि तियां जो तेरै ठीक भूणै रा पता लगा।”

¹⁵ पर यीशु रै कम्मा री चर्चा फैलदी गई, फिरी भिड़ा री भीड़ बीमारी थऊँ ठीक भूणै अतै तसेरी गल्ला हुणना तैस बलै ईणा लगी।

¹⁶ पर यीशु तियां थऊँ दूर गिच्ची करी बणा मन्ज प्रार्थना करदा थू।

अधरंगी जो ठीक करना

¹⁷ अक्क दिन ईयां भूआ कि यीशु मणु जो बचन हुणाणा लगुरा थू, ता तैठी फरीसी धर्मगुरू, अतै शास्त्री भी बैहुरै थियै। सो गलील अतै यहूदिया रै हर शहरा, ग्राँ अतै यरूशलेम थऊँ छुरै थियै। अतै बीमारा जो ठीक करनै री सामर्थ यीशु मन्ज थी।

¹⁸ ता तैठी कुछ मणु अक्की अधरंगी जो मन्जै पुर चुक्की करी लेई आये, सो तैसिओ यीशु वलै अन्दरा जो निणै रा पा तोपणा लगै।

¹⁹ पर तैठी भीड़ ऐतनी थी कि अन्दर “तिल फैंकणै री जगह” भी ना थी ता सो मणु तैस छपरा जो चड़ी गै अतै छपरा रै हैळा जो घेरना लगै; अतै जैहणै तियैं हैळ घेरी दितै ता सो मणु खाट समेत रस्सी पाई करी यीशु बलै थलै पुजाई दिता।

²⁰ यीशुऐ तंयारा विस्वास हेरी करी बल्लू, “हे पुत्र मैंई तेरै पाप माफ करी दितै।”

²¹ ता ऐह हेरी करी फरीसी धर्मगुरू अतै शास्त्री अप्पू मन्ज कणैणा लगै कि, “ऐह कुण हा? जैडा प्रमात्मैं री बुराई करू करदा! प्रमात्मैं जो छड़ी होर कुण हा जैडा पापा जो माफ करी सकदा।”

²² यीशुऐ तंयारै मनां री जाणी लेई अतै तियां जो जवाव दिता, “तुहै अपणै मना मन्ज ऐह कजो सोचु करदै हिन?

²³ कै तुहै ऐह ना जाणदै कि ठीक करनै थऊँ पापा जो माफ करना आसान हा क्ओकि तैतिओ हेरी ना सकदै। पर चंगाई रै कम्मा जो हेरी सकदै हिन कि सो ठीक भूआ कि ना?

²⁴ पर ऐह ठेरैतांये हा कि तुसिओ पता लगी गच्छा कि मणु रै पुत्रा जो पापा माफ करनै रा अधिकार हा।” तिनी तैस अधरंगी जो वलु, “अऊँ तिजो बलदा उठ अपणी खाट चुक अतै अपणै घरा जो चली गा”

²⁵ सो झट ऊठु अतै तंयारै हेरदै-हेरदै जैस मन्जै पुर सो पेऊरा थू तैसिओ चुआई करी प्रमात्मैं रा गुणगान करदा अपणै घरा जो चली गो।

²⁶ ऐह हेरी करी तैठी सब हैरान भूच्ची करी प्रमात्मैं रा गुणगान करना लगै अतै बडै डरा सोगी बलणा लगै कि अज अहै बडा चमत्कार हेरू हा

लेवी नां रै मणु जो चेला बणाणा

²⁷ ऐत थऊँ वाद यीशु नगरा थऊँ बाहर चली गो ता तैठी अक्क चुंगी लैणै री चौकी थी, ता तैठी यीशुऐ अक्क लेवी नां रै चुंगी लैणैबाळै मणु जो चौकी पुर बैहुरै हेरू। यीशुऐ तैस सोगी वलु, आई मेरा चेला वणी गा।

²⁸ ता सो लेवी अपणा सब कुछ छड़ी करी यीशु पिचो चली पैऊँ।

²⁹ सो लेवी अपणै घरै अक्क वडी धाम लान्दा अतै तैड़ी चुंगी लैणैबाळै अतै होर भी खासी भीड़ मेहमाना री भुन्दी हा।

³⁰ पर शास्त्री जैड़ै फरीसी थियै, यीशु रै चेलै सोगी बुडबुड़ान्दै कि, “तुहै वेईमानी सितै चुंगी लैणैबाळै अतै पापी सोगी कजो खाऊ करदै हिन?”

³¹ ता यीशुऐ तियां जो जवाव दिता, बैईद भलै-चंगै तांयें ना, पर बीमारा तांयें जरूरी भुन्दै।

³² अऊँ धर्मी जो ना, पर पापी जो बचाणै तांयें छूरा हा।

ब्रता रै बारै मन्ज सवाल?

³³ ता तैठी जैड़ै धार्मिक नेता थियै तिन्यै यीशु सोगी शिकायत करी कि, “यूहन्‍ना रै चेलै ता व्रत रखदै, प्रार्थना करदै अतै तियां ही फरीसी रै चेलै भी करदै। पर तेरै चेलै ता हमेशा कजो खान्दै-पिन्दै रैहन्दै”?

³⁴ यीशुऐ तियां सितै वलु, “जैहणै तक दूल्हा बराती सोगी हा, ता तुहै बराती थऊँ कियां व्रत करवाई सकदै?

³⁵ पर सो धैङै ईणै, जैहणै दूल्हा तियां थऊँ अलग करना ता तियां धैङै मन्ज तियां व्रत करनै।”

³⁶ यीशुऐ अक्क होर गल्ल हुणाई करी वलु, “कोई भी मणु नोए कपड़ै छकी करी टल्ली पूराणै कपड़ै मन्ज ना लान्दा, क्ओकि नोए छकी गाणा अतै पुराणी टल्ली सितै तैस मेल ना खाणा।

³⁷ कोई भी मणु नौआ दाखरस पुराणी खलड़ी मन्ज ना भरदा, क्ओकि नौआ दाखरस तियां खलड़ी जो फाड़ी करी नकैई गाणा, जैत थऊँ खलड़ी भी खराब भूच्ची गाणी।

³⁸ नौआ दाखरस नोई खलड़ी मन्ज ही भरना चहिन्दा।

³⁹ जैड़ा कोई भी पुराणा दाखरस पिन्दा सो नौआ दाखरस ना पीणा चाहन्दा। सो बलदै पुराणा ही खरा हा।”