लूका 24 - गददी

यीशु मुरदै थऊँ जी भुआ

¹ हप्तै रै पैहलै दिन जनानी भ्यागा ही छैळ जिनी मुसका बाळी चिजा जो जैड़ी तियैं तैयार करूरी थी, लेई करी यीशु री कब्रा पुर आई।

² तियैं हेरू कि कब्रा रा पत्थर ता कब्रा पुर हाई नियां।

³ तियैं कब्रा अन्दर गिचीकरी हेरू ता यीशु री लाहश भी ना थी।

⁴ जैहणैं सो ऐसा गल्ला हेरी करी हैरान भुच्‍छु करदी थी, ता दोई मणु चमकीलै कपड़ै लऊरै तियां बल्लै ईच्ची खड़ियै।

⁵ सो डरी गैई अतै धरती री कनारी मुँह करीके खड़ी रैई। ता तियैं मणुऐ तियां जनानी सितै बल्लू, “तुसै जिन्दै यीशु जो मरुरै मन्ज कजो तोपू करदी हिन?

⁶ सो ऐठी नियां पर सो ता जी उठुरा। याद करा तिनी गलील मन्ज रैहन्दै तूसु जो कै बल्लुरा थू।

⁷ ‘ऐह जरूरी हा कि, मणु रा पुत्र पापी मणु रै हथै पकड़ाया गच्छा, अतै क्रूस पर मारेआ गच्छा, अतै त्रियै दिन मरूरै थऊँ जी उठा।’”

⁸ ता यीशु री गल्ला तियां जो याद आई।

⁹ जनानी फिरी आई अतै, तियैं यीशु रै ग्यारह चेलै जो, अतै होरी मणु जो भी ऐह सब गल्ला हुणाई।

¹⁰ जियें जे यीशु रै प्रेरिता सितै ऐह सब गल्ला हुणाई तियां सोगी मरियम मगदलीनी, योअन्ना, अतै याकूब री माता मरियम अतै होर भी मती जनानी थी।

¹¹ पर तिआंरी गल्ला खास चेलै जो अतै होरी मणु जो झूठी लगी, अतै तियैं ईयां जनानी रा विस्वास ना करू।

¹² ता पतरस ऊठु अतै कब्र री कनारी खिट लाई दिती। कब्रा पुर गिचीकरी तिनी कफणा री कनारी हेरू अतै जे कुछ भच्छुरा थू, तैत पुर हैरान भूच्ची करी अपणै घरा जो फिरी आ।

इम्माऊस रै रस्तै मन्ज दूँ चेलै जो दर्शन

¹³ तैस दिन यीशु रै दोई चेलै इम्माऊस नां रै अक्की ग्राँ जो चलुरै थियै। ऐह ग्राँ यरूशलेम थऊँ कोई सत मील दूर थू।

¹⁴ सो यीशु रै बारै मन्ज अप्पू माँ कणैदैं चलुरै थियै।

¹⁵ जैहणै सो अप्पू मन्ज गल-बात करदै, सोच-विचार करदै चलुरै थियै ता तैहणै ही यीशु तियां बलै आ अतै तियां सोगी-सोगी चलना लगू।

¹⁶ पर तियां चेलै री हाख्री मन्ज ऐसा पढ़दा पेऊरा थू कि सो यीशु जो पछैणी ना सकै।

¹⁷ यीशुऐ तियां थऊँ पूच्छु, “तुसै चलदै-चलदै कस घटना रै बारै मन्ज गप्‍प करू करदै हिन?”

¹⁸ जैहणै तियैं ऐह हुणु ता सो उदास भूच्ची करी खड़ी गै। तियां दूँ मन्ज अक्क क्‍लियुपास नां रा मणु थू तिनी बल्लू, “कै तू यरूशलेम मन्ज अक्क ऐसा परदेसी हा कि जैसियो ऐह ना पता कि ईयां दिना मन्ज यरूशलेम मन्ज कै घटना घटिआ?”

¹⁹ यीशुऐ पूच्छु, “कजो कै भुआ? किनी घटना, अऊँ ना जाणदा?” तियैं बल्लू, “कै तू यीशु नासरी रै बारै मन्ज ना जाणदा सो प्रमात्मैं अतै सबी मणु री नजरा मन्ज कमां अतै बचना मन्ज ताकतवर भविष्‍यवक्ता थू।

²⁰ इन्दै प्रधान याजक अतै इन्दै सरदारै तैसिओ पकड़वाई दिता ताकि तैसिओ मौती रा हूक्म दितआ गच्छा अतै सो क्रूस पुर चढाया गच्छा।

²¹ पर असिओ ऐसा गल्ला री उम्मीद थी कि, ऐस ही इस्त्राएल जो रोमी राज्य थऊँ छुटकारा दिणा अतै ऐसा गल्ला जो भच्छुरै अज त्राई दिन भुएै हिन।

²² असु सोगी कुछ जनानी भी थी जियें असिओ भी चक्करा मन्ज पाई दितुरा, जैड़ी भ्यागा हि यीशु री कब्रा पुर गच्छुरी थी।

²³ पर तियां जो कब्रा मन्ज यीशु री लाहश ना हुजुरीआ। अतै तियैं फिरी करी असु सितै बल्लू कि अहै स्वर्गदूता रा दर्शन हेरूआ अतै स्वर्गदूतै बल्‍लूआ कि यीशु जिन्दा भूच्ची गच्छुरा।

²⁴ ता फिरी इन्दै कुछ साथी कब्रा पुर गिचीकरी हेरू कि जनानी सच कणैऊ करदी हिन।”

²⁵ ता यीशुऐ तियां दूँ चेलै सितै बल्लू, “ओ बुदुओ! तुसै भविष्‍यवक्ता री गल्ला पुर विस्वास करनै तांई कतूणैं नासमझ हिन!

²⁶ कै ऐह जरूरी ना थू कि मसीह ऐह दुख चुक्‍कदा अतै तां फिरी अपणी महिमा मन्ज दाखल भुन्दा?”

²⁷ ता फिरी यीशुऐ अपणै बारै मन्ज मूसै थऊँ शुरू करीके सबी भविष्‍यवक्ता अतै सब पवित्रग्रन्थ मन्ज लिखुरी गल्ला रा अर्थ तियां जो समझाई दिता।

²⁸ गल्ला करदै-करदै सो तैस ग्राँ रै नेड़ै पुजी गै जैठिओ सो चलुरै थियै। पर तियां मणु जो ईयां लगु कि यीशु अगलै ग्राँ जो चलूरा हा।

²⁹ पर तियैं तैसिओ बल्लू कि सन्‍ज लगुरीआ भूणा अतै दिन भी घरही गच्छुरा ता अज असु सोगी ही रेआ, ता यीशु मन्‍नी गो अतै तियां सोगी रैहणा अन्दरा जो चली गो।

³⁰ जैहणै यीशु तियां सोगी खाण-खाणा बैहु ता यीशुऐ रोटी लेई करी प्रमात्मैं रा धन्यवाद करू, अतै रोटी तियां जो दिणा लगू।

³¹ ता चेलै री हाख्री खुली गई, अतै तियैं यीशु पछैणी पैऊ पर यीशु तिंआरी हाख्री थऊँ छिप्‍पी गो।

³² अतै सो चेलै अप्पू मन्ज बलणा लगै, “जैहणै जे यीशु बत्ता मन्ज असु सितै गल्ला करू करदा थू, अतै पवित्रग्रन्था रा मतलब समझाऊ करदा थू, ता इन्दै मन उत्साह अतै उम्मीद सोगी भरू करदै थियै।”

³³ सो तैस ही टैमैं उूठी भुएै अतै यरूशलेम जो चली गै। तैठी तियैं ग्यारह चेलै जो अतै तंयारै साथिओ सोगी हेरू।

³⁴ सो अप्पू मन्ज गल्ला करू करदै थियै कि “यीशु जी भच्छुरा, अतै पतरस जो हुजुरा।”

³⁵ ता तियैं दूनी बत्ता मन्ज यीशु सितै भच्छुरी गल्ला तियां चेलै जो हुणाई। तियैं ऐह भी दसु कि रोटी तोड़दै अहै यीशु जो कियां पछैणु।

होर चेलै जो यीशु रै दर्शन

³⁶ चेलै ईयां गल्ला री चर्चा करू ही करदै थियै कि यीशु तियां मन्‍झै ईच्ची खडू अतै यीशुऐ बल्लू, “तूसु जो शान्ती मुळा!”

³⁷ पर सो चकराई गै अतै डरना लगै। तियैं समझू कि सो ता कसी भूता-परेता जो हेरू करदै हिन।

³⁸ यीशुऐ तियां जो बल्लू “तुसै कजो डरू करदै हिन? तून्दै मनां मन्ज शक कजो भूच्छु करदा?

³⁹ मेरै हथा पैरा हेरा अऊँ सो ही यीशु हा। मिंजो हत्थ लाई करी हेरा, आत्मा री हड्डी-मांस ना भुन्दा जियां कि तुसै मिन्जो मन्ज हेरू करदै हिन।”

⁴⁰ ऐह बली करी यीशुऐ तियां जो अपणै हत्थ पैर दसै।

⁴¹ पर अपणी खुशी री वजह थऊँ सो ऐसा गल्ला पुर हल्ली तिकर भी विस्वास ना करी पाऐ। सो हैरान थियै, ता यीशुऐ तियां जो बल्लू, “कै तूसु बलै कुछ खाणै जो हा?”

⁴² चेलै यीशु जो भुज्‍जुरी मच्छी रा टुकड़ा दिता।

⁴³ यीशुऐ सो भुज्‍जुरी मच्छी लेई अतै तियां चेलै रै सामणै खाई।

⁴⁴ फिरी यीशुऐ तियां सितै बल्लू, “ऐह सो गल्ला हिन जैड़ी कि मैंई तूसु सितै तैहणै बल्ली थी, जैहणै अऊँ तूसु सोगी थू। सो सारी गल्ला जैड़ी कि मेरै बारै मन्ज मूसै री व्यवस्था मन्ज भविष्‍यवक्ता अतै भजनां री कताबा मन्ज लिखुरी सो पूरी भून।”

⁴⁵ ता यीशुऐ पवित्रग्रन्था जो समझणै तांई तिआंरी अक्ल खोली दिती।

⁴⁶ अतै बल्लू, “पवित्र शास्‍त्रा मन्ज ईयां लिखुरा कि मसीह दुख झेलना अतै मरनै थऊँ बाद त्रिऐ दिन जी भूणा।

⁴⁷ अतै यरुशलेम थऊँ लेई करी सारै देशा मन्ज पापा थऊँ मन फेरनै अतै पापा री माफी रा संदेश रा सुसमाचार तसेरै ही नां लेई करी हुणाया गाहणा।

⁴⁸ तुसै सब ईयां गल्ला रै गवाह हिन।

⁴⁹ हेरा, जैसा गल्ला री सौगन्द मेरै पितै खऊरीआ, अऊँ तैतिओ तूसु जो दिन्दा। तुसै तैहणै तिकर ऐस नगरा थऊँ मत गान्दै जैहणै तिकर कि तुसै स्वर्गा थऊँ सामर्थ सितै ना भरी गाहन।”

यीशु स्वर्गा जो चुक्की लैऊ

⁵⁰ फिरी यीशु चेलै जो बैतनिय्याह ग्राँ तक लेई गो अतै अपणा हत्थ चुकी करी तियां जो अशीर्वाद दिता।

⁵¹ यीशु अशीर्वाद दिन्दा-दिन्दा ही तियां थऊँ दूर भुच्‍ची गो अतै स्वर्गा जो चुक्की लैऊ।

⁵² ता चेलै यीशु रा स्तुतिगान करदै अतै खुशी-खुशी यरूशलेम जो फिरी आये;

⁵³ अतै सो रोजा रा रोज मन्दरा मन्ज गिचीकरी प्रमात्मैं री भक्ति करदै रैह।