लूका 20 - गददी

यीशु रै अधिकार रा सवाल?

¹ अक्क दिन जैहणै सो मणु जो मन्दरा मन्ज उपदेश दिच्छु अतै सुसमाचार हुणाऊ करदा थू, ता प्रधान याजक, स्याणै, शास्त्री नेता मणु सोगी तसेरै नेड़ै ईच्ची खड़ियै;

² अतै बलणा लगै, “असिओ दस्स, तू इन्या कम्मा जो कसेरै हक्का सोगी करदा, अतै ऐसा कुण हा जिनी तिजो ऐह हक्क दितुरा?”

³ तिनी तियां जो जवाव दिता, “अऊँ तूसु थऊँ अक्क गल्ल पूछदा; मिन्जो दस्सा

⁴ यूहन्‍ना रा बपतिस्मा स्वर्गा री तरफ थऊँ थू या मणु री तरफा थू?”

⁵ ता सो अप्पू मन्ज कणैणा लगै, “अगर अहै स्वर्गा री तरफ थऊँ दसदै, ता ऐस बलणा, ता तुहै विस्वास कजो ना करू?”

⁶ अतै जे अहै बलदै, “मणु री तरफा थऊँ, ता ईयां मणु ही असिओ पत्थर मारनै, क्ओकि ऐह सचमुच जाणदै हिन कि यूहन्‍ना भविष्‍यवक्ता थू।”

⁷ ता तियैं जवाव दिता, “असिओ न पता सो कसेरी तरफा थऊँ थू।”

⁸ यीशुऐ तियां जो वलु, “ता मुँ भी तुसिओ ना दसणा कि ऐह कम अऊँ कसेरै हक्का सोगी करदा।”

दुष्‍ट किसाना रा उदाहरण

⁹ ता सो मणु जो ऐह उदाहरण हुणाणा लगा “कसकि मणुऐ अंगुरा रा बगीचा लाऊ, अतै जिमीदारा जो ठेका दी करी कई दिना तिकर परदेसा जो चली गो।

¹⁰ फिरी कई दिन बाद जैहणै अंगुरा री फसला रा टैमं आ ता तिनी अपणै नौकरा जो तियां जिमीदारा बल्लै भैजु कि कुछ फळा रा हिस्सा लेई ईन, पर तियैं जिमीदारै सो नौकर मारी मारी करी खाली हत्थै दड़ाई लायै

¹¹ फिरी तिनी अक्क होर नौकर भैजु, अतै तियैं तैस जो भी मारी मारी अतै बेईज्ती करीके फेरी भैजु।

¹² फिरी तिनी मालकै त्रिया नौकर भैजु, ता फिरी तियैं तैस जो भी मारी मारी के भैजु।”

¹³ “ता तिनी अंगुरा रै बगीचे रै मालकै सोचु, अऊँ कै करू? मुँ अपणै प्यारे जिन्‍नै पुत्रा जो भैजणा, भूच्ची सकदा सो सेरा आदर करन।

¹⁴ जैहणै जिमीदारै तसेरै पुत्रा जो इन्दै हेरू ता अप्पू मन्ज बल्लू, ऐह ता वारिस हा; ऐसिओ मारी दीन ता ऐह सब मीरास इन्दी भूच्ची गाणी हा।

¹⁵ ता तियैं जिमीदारै तैसिओ अंगुरा रै बगीचे थऊँ बाहर नी करी मारी दिता।” ता यीशुऐ पूछु, “मिन्जो दस्सा जैहणै तैस मालका जो पता लगणा ता तैस ईयां जिमीदारा सोगी कै करना?”

¹⁶ “कै तैस ईच्ची करी तियां सबी जो मारी ना दिणा, अतै तैस अंगुरा रा बगीचा कसकि होरी जो ना दि दिणा।” ता हुणनैबाळै बलणा लगै। “प्रमात्मां करा ऐसा ना भोआ।”

¹⁷ यीशुऐ तआंरी कनारी हेरू अतै वलु, “कै तुहै जाणदै पवित्र शास्‍त्रा मन्ज कै लिखुरा ‘जैस पत्थर जो मिस्त्रिये बेकार ठहराऊ थू, सो पत्थर ही कोणै रा सिरा बणु।’”

¹⁸ “जैस कसी तैस पत्थर पुर पैणा तैस चकनाचूर भूच्ची गाणा, या जे सो पत्थर कसकि पुर पैला ता भी तैस सो पिह दिणा।”

कैसर जो कर दिणा

¹⁹ तैस टैमैं ही शास्त्री अतै प्रधान याजक तैसिओ पकड़ना चाहन्दै थियै, क्ओकि सो समझी गै ऐह गल्ल तिनी तियां जो ही कणैई थी, पर सो तसेरै सोगी चलुरै मणु थऊँ ड़री गै।

²⁰ तसेरी कोई गलती या कमजोरी पकड़नै तांयें तियैं अपणै कुछ मणु तसेरै चेलै रै भेषा मन्ज तैसा भिड़ा मन्ज भैजै कि सो तसेरी खबर तियां जो दिन्दै रैहन, अतै सो रोमी राज्यपाल वलै तसेरी शिकायत करी सकन।

²¹ ता तियैं मणुऐ तैस थऊँ पूछु, “हे गुरू, अहै जाणदै तू ठीक बलदा अतै सखांदा भी हा, अतै कसी रा पक्ष भी ना लैन्दा, पर प्रमात्मैं रा रस्ता सच्चाई सितै दसदा।

²² अहै पुछणा चाहन्दै, कै कैसर जो कर दिणा ठीक हा या ना?”

²³ सो तंयारी चलाकी जो जाणी करी, अतै तियां जो वलु, “अक्क रोमी सिक्का मिन्जो दसा।

²⁴ ऐत मन्ज कसेरा नां अतै छाप लगुरी हा?” तियैं वलु, “कैसर रा।”

²⁵ ता यीशुऐ तियां जो वलु, “जैडा कैसर रा हा सो कैसर जो देआ; अतै जैडा प्रमात्मैं रा हा सो प्रमात्मैं जो देआ।”

²⁶ सो तसेरै जवाव हुणी करी हैरान भूच्ची करी चुप रैह, अतै तैसिओ फसाई ना सकै

मरनै थऊँ बाद दोबारा जीणा अतै बैह

²⁷ तैहणै कुछ सदूकि जैड़ै बलदै थियै कि मरनै थऊँ वाद दोबारा जी उठणा हा कि ना, सामणै ईच्ची करी तैस थऊँ पुछणा लगै,

²⁸ “हे गुरू, मूसा रै विधान मन्ज असु तांयें ऐह लिखुरा, ‘अगर कोई मरी गच्छा, अतै तसेरी घरावाळी जिन्दा भोआ पर कोई औलाद ना भोआ, ता तैस मणु रा भाई तैहा विधवा सितै बैह करीके अपणै भाई तांयें वंश पैदा करा।’

²⁹ मना कोई सत भाई थियै, पैहला भाई बैह करीके बिना औलाद रा मरी गो।

³⁰ फिरी दूये अतै त्रियै भी तैहा ही जनानी सितै बैह करी लैऊ

³¹ ईयां ही सो सब सत बिना बच्चै रै मरी गै।

³² आखिर मन्ज सो जनानी भी मरी गई।

³³ ठेरैतांये दोबारा जीणै थऊँ बाद सो जनानी तियां मन्ज कसेरी भूणी हा, क्ओकि सो ता सबी री घरावाळी थी।”

³⁴ यीशुऐ तियां सोगी वलु, “बैह ता धरती पुर मणु तांयें हा।

³⁵ पर मरनै थऊँ बाद स्वर्गा मन्ज ईयां कुछ ना भूणा। तैड़ी ना बैह भूणै, अतै ना ही बैह तांयें कसकि जो दिणा

³⁶ तियां कदी भी ना मरना, सो स्वर्गदूता सैई भूणै अतै दोबारा जी भूणै री वजह थऊँ प्रमात्मां री औलाद भूणै।

³⁷ पर मरूरै जीणा या ना? मूसा भी ऐह गल्ल सावित करी गच्छुरा, जैहणै तिनी झिन्ड़ा री कथा रै बारै मन्ज लिखुरा। मूसा प्रभु जो अब्राहम, इसहाक, अतै याकूब रा प्रमात्मां भी बलदा हा

³⁸ प्रमात्मां मुरदै रा ना पर जिन्दै रा प्रमात्मां हा; ठेरा मतलब ऐह हा कि ऐह सब आत्मिक रूप थऊँ प्रमात्मैं सामणै जिन्दा हिन।”

³⁹ ऐह हुणी करी कुछ शास्त्री मणु बलणा लगै, “हे गुरू तैंई बड़ा छैळ बल्लू हा।”

⁴⁰ फिरी तियां जो यीशु थऊँ पुछणै री होर हिम्मत ना भूई।

मसीहा कसेरा पुत्र हा?

⁴¹ फिरी यीशुऐ तियां थऊँ पूछु, “मसीह जो दाऊद री औलाद कियां बलदै हिन?

⁴² दाऊद भजन संहिता री कताबा मन्ज अप्पू ही बलदा ‘प्रभुऐ मेरै प्रभु सितै वलु,

⁴³ मेरै सज्जी कनारी बैह, जैहणै तक अऊँ तेरै बैरी जो तेरै पैरा थलै ना करी दिछुं।’”

⁴⁴ “दाऊद ता तैसिओ प्रभु बल्लू करदा; ता फिरी सो तसेरी औलाद कियां हा?”

ढ़ोन्गी मणु थऊँ सावधान

⁴⁵ जैहणै मणु तसेरी गल्ला हुणु करदै थियै ता तिनी अपणै चेलै सितै बल्लू,

⁴⁶ “झूठै शास्त्री थऊँ चौकनै रेआ, जियां जो लम्बै-लम्बै चोळै लाणा अतै बजारा मन्ज मणु थऊँ नमस्कार हुणना अतै यहूदी रै सभागार मन्ज या धाम-दाबता मन्ज उच्चै जिन्‍नै सिंहासना पुर बैहणा खरा लगन्दा हा।

⁴⁷ ऐह मणु जो दसणै लम्बी लम्बी प्रार्थना करदै हिन पर ऐह विधवा रै घरा बार जो हड़प करी गान्दै हिन, ईयां जो बड़ा भारी दण्ड़ मुळना।”