लूका 2 - गददी

यीशु रा जन्म

¹ तियां दिन महाराजा पूरै रोमी देशा मन्ज जनगणना करनै रा हूक्म दिता।

² ऐह पैहली मणु री जनगणना तैस टैमैं भूई जैहणै किवरनियुस सीरिया परदेस रा राज्यपाल थू।

³ ता सब मणु अपणा-अपणा नां लिखाणै तांई अपणै-अपणै पुरखा रै शहरा जो गै।

⁴ यूसुफ भी गलील परदेसा रै नासरत शहरा थऊँ यहूदिया परदेसा मन्ज दाऊद रै नगरा बैतलहम जो गो, कजो कि सो राजा दाऊद रै परिवार रा अतै वंशा रा थू।

⁵ सो अपणी गर्भवती मंगेतर मरियम जो भी अपणै सोगी नां लिखाणै तांई लेई गो।

⁶ तंयारै तैड़ी रैहन्दै-रैहन्दै तैसारै लोकिणै रै दिन पूरै भूच्ची गै।

⁷ मरियम अपणै पहलै पुत्रा जो जन्म दिता अतै फालडू मन्ज लपेटी करी गोरू री खुरली मन्ज सुलाई दिता, क्ओकि तियां जो सरांई मन्ज रैहणै जो जगह न मुळुरी थी।

स्वर्गदूता रा पाहला जो संदेश

⁸ तैस इलाकै मन्ज कुछ पाहल थियै। सो अक्की बलड़ा मन्ज राती जो अपणै धणा रा पैहरा करू करदै थियै।

⁹ ता अचानक ही प्रभु रा अक्क स्वर्गदूत तंयारै सामणै ईच्ची खडू अतै प्रभु रा तेज तंयारी चौं कनारी चमंकु, ऐह हेरी करी सो ड़री गै।

¹⁰ पर स्वर्गदूतै बल्लू, “ड़रा मत! हुणा, अऊँ तुसिओ बड़ी खुशी रा सुसमाचार हुणान्दा जैड़ी कि सबी मणु तांई भुणीआ

¹¹ अज राजा दाऊद रै बैतलहम शहर मन्ज तूसु तांई अक्क उद्धारकर्ता पैदा भुआ अतै यही मसीहा प्रभु हा।

¹² तूसु तांई तसेरी ऐह पछैण हा कि तूसु अक्क बच्चा फालडू मन्ज लपेटुरा अतै खुरली मन्ज सुतुरा हेरना।”

¹³ ता हेरदै-हेरदै ही तैस स्वर्गदूता सोगी मतै स्वर्गदूत प्रमात्मैं रा गुणगान करदै अतै कणैदैं हुजै कि,

¹⁴ “स्वर्गा मन्ज प्रमात्मैं री महिमा भोआ, अतै धरती पुर तियां मणु जो शान्ती मूल्ळा, जियां थऊँ सो खुश हा।”

¹⁵ जैहणै स्वर्गदूत तैठी थऊँ स्वर्गा जो चली गै, ता पाअल अप्पू मन्ज बलणा लगै, “अईआ अहै बैतलहम जो चलदै अतै जैड़ी गल्ल प्रभुऐ असिओ दस्सिआ, तैसा गिच्ची करी हेरदै।”

¹⁶ ता पाहलै तैहणै ही गिच्ची करी मरियम, यूसुफ अतै खुरली मन्ज सो बच्चा सुतुरा हेरू।

¹⁷ अतै सो गल्ला मणु सितै लाई जैड़ी ऐस बच्चै रै बारै मन्ज स्वर्गदूतै दसुरी थी।

¹⁸ पाहला री ईयां गल्ला हुणी करी सबी मणु जो हैरानी भूई।

¹⁹ पर मरियम सबी गल्ला जो अपणै मनां मन्ज सोचदी रैई।

²⁰ जिआं कि पाहला जो दसुरा थू सो तियां ही हेरी हुणी करी प्रमात्मैं री महिमा अतै गुणगान करदै अपणै धणा बलै फिरी आये।

यीशु रा अर्पण

²¹ बच्चै रै जन्म थऊँ बाद अठुऐं दिन जैहणै खतना करनै रा टैमं आ ता तैस बच्चै रा नां तिऐं यीशु रखू, जैडा कि स्वर्गदूतै तसेरी मौआ रै पेटा मन्ज ईणै थऊँ पैहलै ही दसुरा थू।

²² जैहणै मूसा री व्यवस्था रै मुताबक मरियम रै शुद भूणै रै दिन पूरै भुएै, ता यूसुफ अतै मरियम तैसिओ यरूशलेम शहरा रै मन्दरा मन्ज प्रमात्मैं रै सामणै लेई गै।

²³ जियां कि प्रमात्मां री व्यवस्था मन्ज लिखुरा, “हर जठा पुत्र प्रभु तांई पवित्र ठहरला।”

²⁴ ता प्रमात्मां री व्यवस्था रै मुताबक “घुग्‍गी रा अक्क जोड़ा या फिरी कबूतरा रै दोई बच्चै लेई करी बलिदान करन।”

शमौन रा गीत

²⁵ यरूशलेम मन्ज शिमौन नां रा अक्क मणु बड़ा धर्मी अतै भक्त थू। सो पवित्र आत्मा सितै भरूरा थू। सो इस्त्राएल रै मणु रा छुटकारा दिणैबाळै मसीहा जो भाळू करदा थू।

²⁶ पवित्र आत्मा तैसिओ दसुरा थू कि, “जैहणै तिकर सो प्रमात्मैं रै मसीहा जो हेरी ना लैन्दा तऊं तिकर तसेरी मौत ना भूणी हा।”

²⁷ सो आत्मा री प्रेरणा सितै मन्दरा मन्ज आ। जैहणै माता-पिता यीशु जो मन्दरा मन्ज अन्दरा जो लेई करी आये कि व्यवस्था रै मुताबक भेंट चढ़ान।

²⁸ ता शमौने यीशु जो अपणी खोखा लैऊ अतै प्रमात्मैं रा धन्यवाद करीके बलणा लगु कि,

²⁹ “हे स्वामी, अबै तेरा सेवक तेरै बचना रै मुताबक शान्ती सोगी मरी सकदा हा,

³⁰ कजो कि अबै मैंई अपणी हाख्री तेरा उद्धार हेरी लैऊआ।

³¹ जैसिओ तैंई सब देशा रै मणु तांयें भैजू हा,

³² कि सो यहूदी जो छड़ी करी गैर यहूदी तांई प्रमात्मैं रा ज्ञान दिणै तांई अक्क ज्योती हा, अतै तेरै अपणै मणु इस्त्राएली तांई महिमा हा।”

³³ यीशु रै बारै मन्ज ऐह गल्ला हुणी करी तसेरै माता पिता यूसुफ अतै मरियम हैरान भूच्ची गै।

³⁴ ता शमौने तियां जो अशीर्वाद दिता अतै मरियम सितै बल्लू, “हेर, ऐह बच्चा कई इस्त्राएली मणु तांई खात्‍मैं रा अतै कईआ तांई उद्धार रा चिन्ह भूणा। जसेरी व्जहा थऊँ सेरै वरोधा मन्ज गल्ला भूणी।

³⁵ जैत थऊँ कईआ मणु रै दिला री गल्ला रा पता लगणा। अक्क दुख भी तलवार सांईयै तेरै प्राणा जो भी चीरदी निकळी गाणीआ।”

हन्ना री यीशु रै बारै मन्ज गवाही

³⁶ अशेरा रै गोत्रा थऊँ फनूएल नां रै अक्की मणु री कुल्ळी जसारा नां हन्ना थू, भविष्‍यवक्ता थी। सो बुढ़ी भूच्ची गछूरी थी। तैसै सता साल तिकर ही सुहाग करूरा थू।

³⁷ अतै सो चौरासी साल थऊँ विधवा थी। सो मन्दरा मन्ज ही रैहन्‍दी थी अतै प्रमात्मां सोगी दिन रात प्रार्थना, भजन अतै व्रत करदी रैन्हदी थी

³⁸ जैहणै शिमौन, मरियम अतै यूसुफ सोगी कणैऊ करदा थू, ता तैस टैमैं हन्ना भी तैठी आई अतै प्रभु प्रमात्मैं रा धन्यवाद करना लगी। सो तियां सबी सितै ऐस बच्चै यीशु रै बारै मन्ज बलणा लगी जैड़ै यरूशलेम मन्ज प्रमात्मैं रै मसीहा रै ईणै थऊँ मिलणै बाळै छुटकारै री भाळ करू करदै थियै।

³⁹ व्यवस्था रै मुताबक सब कुछ करनै थऊँ बाद यीशु रै माता-पिता अपणै गलील परदेसा रै नासरत नगरा जो फिरी गै।

⁴⁰ बच्चा मोटीन्‍दा गो अतै आत्मा मन्ज बलवान भुन्दा गो। सो ज्ञानवान भूणा लगू अतै प्रमात्मैं रा अशीर्वाद तैस पुर थू।

बारह साला रा यीशु स्याणै ज्ञानी मणु मन्ज

⁴¹ यीशु रै माता-पिता हर साल फसह रा त्यौहार मनाणै तांई यरूशलेम शहरा जो गान्हदै थियै।

⁴² जैहणै यीशु बारह साला रा भुआ ता सो फिरी रीति रै मुताबक त्यौहार मनाणा यरूशलेम जो गै।

⁴³ जैहणै त्यौहार मुक्‍की गो ता सो अपणै घरा जो फिरी आये। पर यीशु यरूशलेम मन्ज ही रैई गो। ऐसा गल्ला रा तसेरै माता-पिता जो पता ना थू।

⁴⁴ तियैं सोचु यीशु, असु सोगी चलुरै मणु सोगी भूणा। तियैं अक्की दिन रा सफर कट्‍टी दिता। जैहणै तियां जो पता लगू कि यीशु सोगी नियां ता सो तैसिओ अपणै रिशतैदारा अतै जान-पहचान बाळै मणु मन्ज तोपणा लगै।

⁴⁵ पर जैहणै सो ना मुळु ता सो तोपदै-तोपदै यरूशलेम जो फिरी गै।

⁴⁶ तोपदै-तोपदै त्रियै धैङै बाद तियैं सो मन्दरा मन्ज प्रचार करनै बाळै रै मन्जै बैहुरा अतै तियां सोगी सवाल जवाव करदा हेरू।

⁴⁷ जैतणै मणु तसेरी गल्ला हुणु करदै थियै सो सब तसेरै सवाला जवावा थऊँ हैरान परेशान थियै।

⁴⁸ ता तसेरै माता-पिता तैसिओ हेरी करी हैरान भुएै अतै माता बलणा लगी, “हे पुत्रा तैंई असु सोगी इन्या कओ करू? अऊँ अतै तेरा पिता तिजो तोपदै-तोपदै परेशान भूच्ची गच्छुरै थियै।”

⁴⁹ “ओ मेरिऐ माता, तुहै मिन्जो कओ तोपू करदै थियै? कै तुसिओ पता निआ कि मिन्जो अपणै पिता रै घरा मन्ज भूणा जरूरीआ?”

⁵⁰ पर जैडा यीशुऐ बल्लू सो तंयारी समझा मन्ज कुछ भी ना आ।

⁵¹ पर सो तियां सोगी चली गो। सो नासरत मन्ज पुजै अतै यीशु माता-पिता रा आज्ञाकारी वणी करी रैऊ। पर तसेरी माता ये सारी गल्ला अपणै दिला मन्ज रखी।

⁵² अतै यीशु जवान भुन्दा गो अतै ज्ञान, डील-डौल मन्ज अतै प्रमात्मैं अतै मणु रै अशीर्वाद सितै अगो बड़दा गो।