लूका 18 - गददी

अधर्मी जजा अतै अक्क विधवा जनानी रा उदाहरण

¹ यीशुऐ चेलै जो रोज प्रार्थना करना अतै हिम्मत न हारणा, ठेरै बारै मन्ज अक्क उदाहरण हुणाऊ :

² “कसकि शहरा मन्ज अक्क जज रैहन्दा थू, जैडा न ता प्रमात्मैं थऊँ डरदा थू अतै न ही कसी मणु री परवाह करदा थू।

³ तैस ही शहरा मन्ज अक्क विधवा भी रैहन्‍दी थी, जैड़ी तैस बलै ईच्ची करी बलदी थी ‘मेरा न्याय कर अतै मिन्जो मेरै विरोधी थऊँ बचा।’ ”

⁴ “सो बडै़ दिन तक तैहा जो टालदा रैऊ फिरी तिनी सोचु, ‘अऊँ न ता प्रमात्मैं थऊँ ड़रदा न ही मणु थऊँ;

⁵ पर ऐह विधवा रोज-रोज ईच्ची करी मेरै कन खाऊ करदी हा, मुँ सारा न्याय करी दिणा ईयां न भोआ कि ऐह मिन्जो वलै ईच्ची करी मेरै नक्कै धूँ दि देआ।’ ”

⁶ प्रभु यीशुऐ वलु, “हुणा, ऐह अधर्मी जज कै बल्लू करदा?

⁷ ठेरै तांयें कै प्रमात्मां अपणै चुणुरै मणु रा न्याय न करला, जैडा दिन-रात तसेरी माळा जपदै रैहन्दै? कै तियां तांयें तैस देर लाणीआ?

⁸ अऊँ तूसु सोगी बलदा, तैस जजा झटफट तसेरा न्याय करना। ता जैहणै मणु रै पुत्रा ईणा, ता ऐस धरती पुर कैतनै मणु भूणै जैड़ै मिन्जो पुर विस्वास करदै हिन?”

फरीसी अतै चुंगी लैणैबाळै रा उदाहरण

⁹ जैड़ै मणु अपणै आपा जो बड़ा धर्मी मन्दै थियै अतै होरी जो बड़ा बुरा जाणदै थियै, तियां जो यीशुऐ अक्क उदाहरण हुणाऊ

¹⁰ दोई मणु मन्दरा मन्ज प्रार्थना करनै तांयें गै; तियां मन्ज अक्क फरीसी अतै अक्क चुंगी लैणैवाळा थू।

¹¹ फरीसी मणु खड़ी करी, अपणै मना मन्ज ईयांईं प्रार्थना करना लगा, “हे प्रमात्मां, अऊँ तेरा सूकर करदा कि अऊँ होरी मणु सैईये डाकू, ठग अतै व्यभिचार करनैवाळै निआं, अतै ना ही ऐस चुंगी लैणैबाळै सैईआ।

¹² अऊँ हप्तै मन्ज दोई बरी व्रत रखदा; अतै अपणी पूरी कमाई रा दसवां हिसा भी दिन्दा।”

¹³ पर चुंगी लैणैबाळै दूर खड़ी करी स्वर्गा री कनारी अपणी नजरा भी ना चुकी अतै अपणी हिक्का जक्की करी प्रमात्मैं सितै ऐह बिनती लाई, “हे प्रमात्मां, मिन्जो पापी मणु पुर दया कर!”

¹⁴ “अऊँ तूसु सोगी सच बलदा कि सो फरीसी मणु ना पर ऐह चुंगी लैणैवाळा मणु धर्मी बणु अतै अपणै घरा जो गो; क्ओकि जैस कसी अपणै आपा जो बड़ा समझदा सो हल्का भूणा; अतै जैडा अपणै आपा जो हल्का समझदा सो बड़ा करी दिणा।”

यीशु रा दब्बू जो अशीर्वाद

¹⁵ फिरी मणु अपणै बच्चै भी तैस वलै लैईणा लगै कि सो तियां पुर हत्थ रखा; पर चेलै तियां जो झिड़कणा लगै।

¹⁶ यीशुऐ बल्लू, “बच्चेओ मिन्जो बलै ईणा देय्आ, अतै ईयां जो ना मत करा अतै जैड़ै बच्चै सांईयै नम्र अतै भोळै हिन इन्‍नै मणु ही प्रमात्मैं रै राज्य मन्ज प्रवेश करना।

¹⁷ अऊँ तूसु सोगी सच बलदा कि प्रमात्मां रा राज्य असु अक्की बच्चै साईयें ही स्वीकार करना, ना ता तुहै प्रमात्मां रै राज्य मन्ज कदी भी प्रवेश ना करी सकदै।”

अमीर मणु अतै सदा काल री जिन्दगी

¹⁸ अक्क अफसर तैस थऊँ पुछणा लगा, “हे उत्तम गुरू, अऊँ अनन्त जिन्दगी पाणै तांयें कै करू?”

¹⁹ यीशुऐ वलु, “तू मिन्जो उत्तम कजो बल्लू करदा? प्रमात्मैं रै सिवाये कोई भी उत्तम निय्आ।

²⁰ तू विधान ता जाणदा ‘व्यभिचार ना करना, कोई जानी थऊँ ना मारना, चोरी ना करनी, झूठी गवाही ना दिणी, अतै अपणै माता पिता रा आदर-मान करना।’”

²¹ तिनी वलु, “अऊँ ता ईयां गल्ला बचपना थऊँ ही मन्दा आ।”

²² ऐह हुणी करी यीशुऐ वलु, “तिजो मन्ज हालि तिकर अक्की चिजा री कमी हा, अपणा सब कुछ बेचीकरी गरीबा मन्ज बण्ड़ी दे; ता तिजो स्वर्गा मन्ज धन मुळना, अतै मेरी दसुरी बत्ता पुर चलना लगी पै।”

²³ सो ऐह हुणी करी बड़ा उदास भूच्ची गो, क्ओकि सो बड़ा अमीर मणु थू।

²⁴ यीशुऐ तैस जो हेरी करी बल्लू, “अमीर मणु रा प्रमात्मां रै राज्य मन्ज प्रवेश करना कैतना मुसकल हा।

²⁵ ऊंट सुई रै भोका मितै नकैई सकदा पर अमीर मणु प्रमात्मां रै राज्य मन्ज ना गिच्ची सकदा।”

²⁶ ता ऐह सब हुणी करी तियैं मणुऐ वलु, “ता कसेरा उद्धार भूच्ची सकदा?”

²⁷ यीशुऐ वलु “जैडा मणु थऊँ ना भूच्ची सकदा सो प्रमात्मैं थऊँ भूच्ची सकदा।”

²⁸ पतरस बलणा लगा, “हेर, अहै ता अपणा घर-बार छड़ी करी तेरै पिचो चलना लगुरै।”

²⁹ यीशुऐ तियां जो जवाव दिता, “अऊँ तूसु सोगी सच बलदा ऐसा कुण हा जिनी प्रमात्मां रै राज्य तांयें अपणै घर, घरावाळी, भाई, माता-पिता, या बाल बच्चै छड़ी दितुरै भोलै;

³⁰ अतै तैस ऐसा ही जिन्दगी मन्ज सौ गुणा पाणा मतलब भाई बैहणी बाल बच्चै या जमीन अतै सताव भी ता तैस परलोक मन्ज अनन्त जिन्दगी रै मालक भूणा।”

अपणी मौती रै बारै मन्ज यीशु री त्रीं भविष्‍यवाणी

³¹ फिरी तिनी बारह अपणै खास चेलै जो अप्पू सोगी लै अतै तियां जो वलु, “हुणा, अहै यरूशलेम जो चलदै, ताकि जैतनी गला मणु रै पुत्रा रै बारै मन्ज भविष्‍यवक्तै लिखुरी हिन सो पूरी भून

³² तियैं लिखुरा कि सो अधर्मी मणु रै हत्थै पकड़ाया गाणा, तसेरी निदया करनी हा; तसेरी बेईज्ती करनी हा अतै तैस पुर थुकणा,

³³ तैसिओ कोड़ै मारी मारी करी जानी थऊँ मारी दिणा; अतै तैस त्रियै दिन फिरी जी उठणा।”

³⁴ पर ऐह गला तंयारै पल्लै ही ना पैई, अतै जैडा कुछ बल्लू तठेरा सो भेद ही ना जाणी पाऐ।

अन्धै भिखारी जो दृष्‍टिदान

³⁵ जैहणै यीशु यरीहो नां री जगह रै नेड़ै पुजु, ता अक्क अंधा सड़का रै ब्रखै बैही करी भीख मगुँ करदा थू।

³⁶ सो मणु री भिड़ा री चलनै री छेड़ हुणी करी पुछणा लगू, “ऐठी कै लगुरा भूणा?”

³⁷ ता कुणकिए तैसिओ दस्सु कि, “यीशु नासरी चलूरा हा।”

³⁸ ता तिनी जोरा सितै वलु, “हे यीशु, दाऊद रै पुत्रा, मिन्जो पुर भी दया करी गा!”

³⁹ ता भिड़ा थऊँ मणु तैसिओ झिड़कणा लगै कि चुप रैह; पर सो होर जोरै जोरै बलणा लगा, “हे दाऊद रै पुत्रा, मिन्जो पुर दया कर!”

⁴⁰ ता यीशुऐ खड़ी करी अपणै चेलै जो वलु, ऐसिओ मिन्जो वलै लेई अईआ जैहणै सो तैसिओ लेई आये ता यीशुऐ तैस थऊँ पूछु,

⁴¹ “तू कै चान्हदा कि अऊँ तिजो तांयें कै करू?” तिनी वलु, “हे प्रभु, ऐह कर कि अऊँ हेरना लगी पैंऊ।”

⁴² यीशुऐ तैस सोगी वलु, “हेरना लग; तेरै विस्वासै तिजो ठीक करी दिता हा।”

⁴³ ता तसेरी हाख्री तैहणै ही खुली गई अतै सो हेरना लगी पैऊ अतै प्रमात्मैं री जय-जयकार करदा तसेरै पिचो चली पैऊ; ऐह सब हेरी करी मणु प्रमात्मैं री महिमा करना लगै।