लूका 17 - गददी

ठोकरा री वजह

¹ फिरी यीशुऐ अपणै चेलै सोगी बल्लू, “ऐसा भूच्ची ना सकदा कि मणु परीक्षा मन्ज पैई करी पाप ना करन, पर हाय हा तैस पुर जसेरी वजह थऊँ तैस मणु री परीक्षा भुन्दी हा!

² जैडा इन्या हल्कै मन्ज कसकि जो परीक्षा माँ पान्दा, तैस तांयें ता ऐह ठीक हा कि तसेरै गल्ळै मन्ज चक्की रा पाट लटकाई करी समुन्द्रा मन्ज फैंकी दिन्दै।

³ चौकनै रेआ; जे तेरा विस्वासी भाई तेरै विरूद्ध गुनाह करा ता तैस जो समझा, अतै जे पच्छता ता तैसिओ माफ करी दे।

⁴ अगर सो दिन भरी सत बरी तेरै विरूद्ध गुनाह करा ता अतै जे सत बरी ईच्ची करी बल्ला, अऊँ पच्छतान्दा, ता तैसिओ माफ कर।”

विस्वास

⁵ ता प्रेरित प्रभु यीशु सितै बलणा लगै, “इन्दै विस्‍वासा जो पक्का कर।”

⁶ प्रभुऐ बल्लू, “जे तुसिओ राई रै दाणै जितना भी विस्वास भुन्दा, ता तुहै ऐस तूत रै रूखा जो बल्‍दै कि चैंईं समेत उखडी करी समुन्द्रा मन्ज गिच्ची लग, ता तियां ही भुन्दा।”

अक्क दास रा कर्त्तव्य

⁷ “तूसु मन्ज ऐसा कुण हा, जैसेरा नौकर बाण बाई या भैड़ा चारी के अईआ, ता तुहै तैस सितै बलन, हबजु ही खाणा बैही गा?

⁸ अतै ऐह ना बल्ला कि मेरा खाणा तैयार कर, अतै जैहणै तक अऊँ खाऊँ-पीऊँ तू मेरी सेवा करनै जो तैयार रैह; ऐत थऊँ बाद तू भी खाई लैं?

⁹ ता तैस मालिक तैस नौकरा रा धन्यवाद ना करना कि तिनी सो ही कम करू हा जैतियो करनै रा तैसिओ तिनी हूक्म दितुरा थू?”

¹⁰ यीशुऐ बल्लू, “इन्‍नी साहबै तुसै भी, जैहणै सबी कम्मा जो करी बैहन जठेरा तुसिओ हूक्म दितुरा थू, ता ऐह बल्लै, अहै ता ऐस लायक ना हिन। जैडा असु जो करना चहिन्दा थू सो ही अहै करू हा।”

दस कोढ़ी जो ठीक करना

¹¹ यीशु मसीह अतै चेलै यरूशलेम शहरा जो गाणा थू, ता सो सामरिया अतै गलील परदेस मितै भूच्ची करी चलुरै थियै।

¹² ता कसकि ग्राँ रै बाहर तैसिओ दस कोढ़ी मुळै।

¹³ ता तियैं दूर खड़ी करी जोरा सितै बल्लू, “हे यीशु, हे स्वामी, असु पुर दया कर!”

¹⁴ यीशुऐ तियां जो हेरी करी बल्लू, “यरूशलेम रै मन्दरा जो गच्छा, अतै अपणै आपा जो याजका जो दस्सा।” अतै गान्दै-गान्दै सो ठीक भूच्ची गै।

¹⁵ ता तियां मन्ज अक्क ऐह हेरी करी की अऊँ ठीक भूच्ची गो हा, जोरा सितै प्रमात्मैं री जय-जयकार करदा यीशु बलै फिरी आ;

¹⁶ सो मणु सामरी देशा रा थू, अतै यीशु रै पैरै पैई करी धन्यवाद करना लगा।

¹⁷ ऐह हेरी करी यीशुऐ बल्लू, “कै दसा रै दस मणु ठीक ना भुएै ता सो नौ करा गै?

¹⁸ कै ऐस परदेसी मणु जो छड़ी होर कोई निय्आ जैडा प्रमात्मैं री बड़ाई करा?”

¹⁹ ता यीशुऐ तैस सोगी बल्लू, “उठ चली गा; तिजो तेरै विस्वासै ठीक करूआ।”

प्रमात्मैं रै राज्य रा आगमन

²⁰ अक्क दिन जैहणै फरीसी तैस थऊँ पुछणा लगै कि प्रमात्मैं रा राज्य कैहणै ईणा, ता तिनी तियां जो जवाव दिता, “प्रमात्मैं रा राज्य जो इन्दा तुहै ना हेरी सकदै।

²¹ ताकि मणु ऐह न बलन कि, ‘हेरा, प्रमात्मैं रा राज्य ऐठीआ ना-ना ओठीआ।’ क्ओकि हेरा, प्रमात्मैं रा राज्य तूसु मन्जै ही हा।”

²² फिरी तिनी चेलै सितै बल्लू, “ऐसा टैमं ईणा जधैड़ी तूसु तैस दिना जो हेरना चाहणा कि तुहै मणु रै पुत्रा जो इन्दै हेरन पर तूसु हेरी ना सकणा।

²³ मणु बलणा, हेरा मसीहा ऐठीआ! या हेरा ओठीआ! पर तुहै चली मत गान्दै अतै न ही तंयारी शिक्षा जो मनै।

²⁴ क्ओकि जिंआं बिजळी अम्बरा रै अक्की कनारै थऊँ लेई करी दूये कनारै तिकर चमकदी हा अतै मणु तैतिओ हेरदै हिन, तियां ही मणु रै पुत्रा यानी मिन्जो आखरी दिन मन्ज प्रकट भुन्दै हेरना।

²⁵ पर पैहलै जरूरी हा कि सो बड़ै दुख भोगा, अतै ऐस जुगा रै मणु तैसिओ ठुकरान।”

²⁶ जियां नूह रै दिन भच्छुरा थू, तियां ही मणु रै पुत्रा रै टैमां मन्ज भी भूणा।

²⁷ जैस दिन तक नूह जहाजा पुर चड़ी न गो तैहणै तक मणु खान्दै-पिन्दै अतै अप्पू मन्ज ही बैह-बेतर करदै थियै। ता जल प्रलय आ अतै सब कुछ तबाह करी दिता।

²⁸ तैस ही तरीकै लूत रै दिना मन्ज भुआ थू, कि मणु खान्दै-पिन्दै, लैण-दिन करदै, रुख लान्दै अतै घर बणान्दै थियै;

²⁹ पर जधैड़ी लूत सदोम थऊँ नकैऊ, तधैड़ी ही अग अतै तेजाब अम्बरा थऊँ बरी अतै तैस शहरा मन्ज रैहणै बाळै सबी मणु जो खत्म करी दिता।

³⁰ जैस दिन मणु रै पुत्र प्रकट भूणा तैहणै भी ईयां ही भूणा।

³¹ “तदैड़ी जैडा छपरा पुर भोला अतै जे कुछ समान थलै भोला सो समाना लैणा न ओसा; अतै जैडा बगड़ी मन्ज भोला सो पचूँह फिरी करी न अईआ।

³² लूत री घरावाळी सोगी कै भूआ सो याद करा!

³³ जैस कसी अपणा प्राण बचाणै तैस सो खोई दिणै, पर जैस कसी अपणै प्राण गुआणै तैस जिन्दै रैहणा।

³⁴ अऊँ तूसु सोगी बलदा तैसा राती जैड़ी कड्ड़ी दोई मणु भूणै अक्क जो लेई लैणा अतै दूये जो छड़ी दिणा हा।

³⁵ जे दोई जनानी चक्की चलाऊँ करदी भोली ता, अक्क लेई लैणी हा अतै दुई छड़ी दिणी हा।

³⁶ दोई मणु बगड़ी मन्ज भोलै ता अक्क लेई लैणा अतै दुआ छड़ी दिणा।”

³⁷ ऐह हुणी करी तियैं यीशु थऊँ पूछु, “हे प्रभु ये सब चिजा कड़ी भूणी?” तिनी तियां सितै वलु, “जैड़ी मुरदा भुन्दा तैड़ी इल्लणी किटठी गान्दी।”