यूहन्ना 4 - गददीयीशु अतै सामरी जनानी 1 फिरी जैहणै प्रभु जो पता लगू कि फरीसीये हुणु हा कि यीशु यूहन्ना थऊँ भी मतै चेलै बणान्दा अतै तियां जो बपतिस्मा भी दिन्दा हा। 2 [असल मन्ज यीशु अप्पू ना पर तसेरै चेलै बपतिस्मा दिन्दै थियै] 3 ता यीशु यहूदिया परदेस जो छड़ी करी गलील परदेस जो चली गो। 4 अतै प्रमात्मैं री इच्छा थी की सो सामरिया परदेस मितै भूच्ची करी गच्छा। 5 ठेरैतांये सो सामरिया रै सूखार नां रै ग्राँ मन्ज आ, जैडा तैस जमीना रै नेड़ै हा, जैतियो याकूबे अपणै पुत्र यूसुफ जो दितुरा थू। 6 अतै तैड़ी अक्क खूह थू जैतिओ याकूबे बणाऊरा थू। यीशु रस्तै रा खिजुरा तैस खूह पुर इआं ही बैही गो। अतै ऐह गल्ल दफारा रै टैमं री थी। 7 ऐतनै मन्ज तैठी अक्क सामरी जनानी पाणी भरना आई। यीशुऐ तैहा सोगी वलु, “मिन्जो पाणी पैय्आ।” 8 क्ओकि तसेरै चेलै नगरा मन्ज खाणा खरीदणा गच्छुरै थियै। 9 सामरी जनानी तैस सितै वलु, “तू यहूदी भूच्ची करी मिन्जो थऊँ पाणी कजो मंगदा?” (क्ओकि यहूदी सामरी सोगी कोई भी व्यवहार ना रखदै थियै)। 10 यीशुऐ जवाव दिता, “अगर तू प्रमात्मैं रै वरदाना जो जाणदी, ता ऐह भी जाणदी कि अऊँ कुण हा जैडा तिजो ऐह वलु करदा, मिन्जो पाणी पैय्आ, ता तू तैस थऊँ मंगदी, अतै सो तिजो जिन्दगी रा पाणी दिन्दा।” 11 जनानी तैस सोगी वलु, “हे स्वामी, तिजो बल्लै पाणी भरनै जो ता कुछ भी निय्आ, अतै खूह भी ढूगा; ता फिरी सो जिन्दगी रा पाणी तिजो बल्लै कठी थऊँ आ? 12 कै तू इन्दै पूर्वज याकूब थऊँ भी बड़ा हा, जिनी असिओ ऐह खूह दितुरा अतै अप्पू भी अपणै बच्चै, गोरू-पैहरू समेत ऐस थऊँ ही पिऊरा हा?” 13 यीशुऐ तैहाओ जवाव दिता, “जैस कसी ऐह पाणी पीणा तैस फिरी त्रिहणै रैहणा, 14 पर जैडा कोई तैस पाणी थऊँ पिला जैडा मुँ तैसिओ दिणा, तैस फिरी सदा तक त्रिहणै ना रैहणा; पर तैस अक्क अनन्त जिन्दगी तांयें पाणी रा झरना वणी करी नकैन्दै रैहणा।” 15 जनानी तैस सोगी वलु, “हे प्रभु, सो पाणी मिन्जो भी दे ताकि अऊँ कदी भी त्रिहणी ना रैऊ अतै ना पाणी भरनै तांयें ऐतनी दूर ईच्छु।” 16 यीशुऐ तैहा जो वलु, “गा अपणै घरवाळै जो ऐठी हैदी करी लेई।” 17 जनानी जवाव दिता, “अऊँ ता बिना घरवाळै री हा।” यीशुऐ तैहा सितै वलु, “तू ठीक बलदिआ, ‘कि अऊँ बगैर घरवाळै हा।’ 18 क्ओकि तू पँज घरवाळै करी बैहुरी हा, अतै जैस सोगी तू अबै हा सो भी तेरा घरावाळा निय्आ। ऐह तैंई सच बल्लू हा।” 19 जनानी तैस सोगी बल्लू, “हे प्रभु, मिन्जो लगदा कि तू कोई भविष्यवाणी करनैवाळा हा। 20 इन्दै स्याणैं ऐस ही पहाडा पुर प्रार्थना करी, अतै अबै तुहै यहूदी मणु बलदै हिन कि सो जगह यरूशलेम मन्ज हा जैड़ी असिओ भजन करना चहिन्दा।” 21 यीशुऐ तैहा सितै वलु, “ओ जनानी, मेरी गल्ला रा विस्वास कर कि सो टैमं ईणैबाळा हा कि ना ता तूसु ऐस पहाडा पुर पिता री पूजा करी सकणा ना ही यरूशलेम मन्ज। 22 तुहै सामरी मणु जैसियो ना जाणदै हिन तसेरा भजन करदै हिन, अतै अहै यहूदी जैसियो जाणदै हिन तसेरा भजन करदै हिन, क्ओकि उद्धार यहूदी थऊँ ही हा। 23 पर सो टैमं ईणैबाळा हा, बल्कि चली ही आ जैहणै सचै भक्ता पिता रा भजन आत्मा अतै सच्चाई सितै करना हा, क्ओकि परम पिता अपणै तांयें इन्नै ही भक्त तोपदा हा। 24 प्रमात्मां आत्मा हा, ठेरैतांये जरूरी हा कि जैड़ै तसेरी पूजा करन सो आत्मा अतै सच्चाई सितै पूजा करन।” 25 तैहै जनानी तैसिओ बल्लू, “अऊँ जाणदी हा कि मसीह जैसियो ख्रिस्त भी बलदै हिन ईणैबाळा हा; जैहणै तैस ईणा ता असिओ सब गल्ला दसी दिणी।” 26 यीशुऐ तैहा सितै बल्लू, “अऊँ सो ही हा जैडा तिजो सितै बल्लू करदा।” चेलै रा फिरी करी ईणा 27 ऐतनै मन्ज तसेरै चेलै फिरी आये, अतै तियां जो ऐह हेरी करी हैरानी भूई कि सो अक्क जनानी सितै गल्ल करू करदा थू; ता भी कसी जो ऐह हिम्मत ना भूई कि कोई तैस थऊँ पूछा, “तू कै चाहन्दा?” या “ऐसा सितै कजो गल्ला करू करदा?” 28 ता सो जनानी अपणा घडा छड़ी करी अपणै नगरा जो चली गई अतै मणु सितै बलणा लगी, 29 “अईआ, अक्की मणु जो हेरा, जिनी मेरै सब करूरै कम मिन्जो दस्सी दितै। करखी ऐह ही मसीहा ता निय्आ?” 30 अतै सो मणु नगरा थऊँ नकैई करी यीशु वलै ईणा लगै। 31 इतनै मन्ज तसेरै चेलै यीशु सितै ऐह प्रार्थना करना लगै कि, “हे गुरू, कुछ खाई लै।” 32 पर तिनी अपणै चेलै सितै बल्लू, “मिन्जो बलै खाणै तांयें ऐसा खाणा हा जैतियो तुहै ना जाणदै।” 33 ता चेलै अप्पू मन्ज कणैणा लगै, “कै कुणकी ऐसिओ खाणै तांयें कुछ अन्दुरा?” 34 यीशुऐ तियां सितै बल्लू, “मेरा खाणा ऐह हा कि अऊँ अपणै भैजणै बाळै री इच्छा रै अनुसार चलुँ अतै तसेरै कम्मा जो पुरा करूं। 35 कै तुहै ना बलदै कि, ‘वढाई वड़णै जो हालि तिकर चंऊर महीनै पैऊरै हिन?’ हेरा, अऊँ तूसु सोगी बलदा, अपणी हाख्री चुकी करी बगड़ी मन्ज नजर फेरा कि फसल पक्की गच्छुरी हा। 36 फसला जो बड़णै बाळै जो धैडी मुलदी हा अतै अनन्त जिन्दगी तांयें फल पान्दा, ताकि बाणैबाळा अतै कटणैबाळा दोनो मिलीकरी मजा करन। 37 क्ओकि ऐठी ऐह गल्ल ठीक बैहन्दी हा कि, ‘बाणैबाळा होर हा अतै कटणैबाळा होर हा।’ 38 मैंई तुसिओ सो बगड़ी री फसल बडणै तांयें भैजुरा जैत मन्ज तुहै मेहनत ना करूरी; होरी मणुऐ मेहनत करी अतै तुहै तंयारै फला रै हकदार भुएै।” सामरी मणु रा विस्वास करना 39 तैस नगरा रै बडै़ सामरी मणुऐ तैहा जनानी रै बलणै थऊँ यीशु पुर विस्वास करू; क्ओकि तैहै ऐह गवाही दिती थी कि, “जैडा कुछ मैंई करूरा ईनी सब कुछ मिन्जो दस्सी दिता।” 40 ठेरैतांये जैहणै ऐह सामरी मणु यीशु बलै बिनती करना लगै कि इन्दै नगरा मन्ज रैह। ता सो तैठी दोई दिन रैऊ। 41 तसेरै बचना रै कारण होर भी मतै मणुऐ विस्वास करू। 42 ता तियैं मणुऐ तैहा जनानी जो बल्लू, “अबै अहै सिर्फ तेरै कणैणै पुर विस्वास ना करदै पर अबै अहै हेरी भी लैऊ हा अतै जाणी गै कि ऐह ही सच मन्ज संसारा रा उद्धारकर्ता हा।” 43 फिरी सो दूँ दिना बाद तैठी थऊँ गलील जो चली गो, 44 क्ओकि यीशुऐ अप्पू ही बलुरा कि “कोई भी भविष्यवक्ता अपणै देशा जो छड़ी करी बाकी सब जगह मान सम्मान पान्दा हा।” 45 ऐस तरीकै जैहणै सो गलील मन्ज आ, ता गलीली मणुऐ तसेरा स्वागत करू; क्ओकि तियैं सब कुछ हेरूरा थू, जैडा तिनी यरूशलेम मन्ज अक्क त्यौहारा रै दिनै करूरा थू, क्ओकि सो सब मणु भी ऐस त्यौहारा मन्ज सामल थियै। अक्क राजकर्मचारी रै पुत्रा जो ठीक करना 46 सो फिरी गलील रै काना ग्राँ जो आ, जेठी तिनी पाणी रा दाखरस बणाऊरा थू। तैठी राजा रा अक्क अधिकारी थू जैसेरा पुत्र कफरनहूम मन्ज बीमार थू। 47 सो ऐह हुणी करी कि यीशु यहूदिया थऊँ गलील मन्ज आ, ता सो तैस बलै गो अतै तैस सितै बिनती करना लगू कि चली करी मेरै पुत्रा जो ठीक करी दे क्ओकि सो मरना लगुरा थू। 48 यीशुऐ तैस सोगी बल्लू, “जैहणै तक तूसु चमत्कार अतै हैरानी बाळै कम ना हेरन तैहणै तक कदी भी विस्वास ना करना।” 49 राजा रै तिनी अधिकारी यीशु सोगी बल्लू, “हे प्रभु, मेरै पुत्रा रै मरनै थऊँ पैहलै चली पै।” 50 यीशुऐ तैस सितै बल्लू, “गच्छ तेरा पुत्र जिन्दा हा।” तिनी मणुऐ यीशु री कणैऊरी गल्ला रा विस्वास करू अतै चली गो। 51 सो बता मन्ज चलूरा थू, कि तसेरै नौकर ईच्ची करी मुळै अतै बलणा लगै कि, “तेरा पुत्र जिन्दा हा।” 52 तिनी अपणै नौकरा थऊँ पूछु, “कस टैमां रा सो ठीक भूणा लगुरा?” तियैं जवाव दिता, “पिछलै कल दोफारा रै लगभग तसेरा बुखार उतरी गो थू।” 53 तैस बच्चै रै पिता जो ध्यान आ कि ऐह ठीक सो ही टैमं थू जैहणै यीशुऐ तैस सोगी बलुरा थू, “तेरा पुत्र जिन्दा हा,” ता सो ऐस तरीकै अपणै पूरै परिवार सोगी विस्वासी बणी गो। 54 ऐह दुआ चिन्ह थू जैडा यीशुऐ यहूदिया परदेस थऊँ गलील मन्ज ईच्ची करी दस्सु। |
This work is licensed under Creative Commons Attribution-ShareAlike 4.0 License.