यूहन्‍ना 16 - गददी

पवित्र आत्मा रै कम

¹ “ऐह गल्ला मैंई ठेरैतांये बली कि तुहै विस्वास करना ना छड़ी दीन।

² तियां तुसिओ यहूदी रै सभागार थऊँ कड़ी दिणा, बल्कि ऐसा टैमं चली आ हा जैस कसी तुसिओ मारना तैस समझणा कि अऊँ प्रमात्मैं री सेवा करू करदा हा।

³ ऐह तियां ठेरैतांये करना कि तियैं ना ता पितै जो जाणु अतै ना मिन्जो जाणदै हिन।

⁴ पर ऐह गल्ला मैंई ठेरैतांये तूसु सोगी बली कि जैहणै ठेरा टैमं अईआ ता तुसिओ याद चली अईआ कि मैंई तुसिओ पैहलै ही दस्सी दितुरा थू। “मैंई शुरू मन्ज तूसु सोगी ऐह गल्ला ठेरैतांये ना करी क्ओकि अऊँ तूसु सोगी थू।”

⁵ “पर अबै अऊँ अपणै भैजणैवाळै बलै चलूरा हा; अतै तूसु मन्ज कोई मिन्जो थऊँ ना पुच्छदा, ‘तू करा चलूरा?’

⁶ पर मैंई जैड़ी ऐह गल्ला तूसु सोगी करी हिन, ठेरैतांये तून्दा मन दुखा सितै भरी गो हा।

⁷ तांभी अऊँ सच बलदा कि मेरा गाणा तूसु तांयें खरा हा, क्ओकि मुँ गाणा ता सो साथी तूसु बलै ईणा; जैहणै मुँ गाणा तैहणै तैसिओ तूसु बलै भैजी दिला।

⁸ तैस ईच्ची करी संसारा जो पाप अतै धार्मिकता अतै न्याय रै बारै मन्ज दसणा।

⁹ पाप रै बारै मन्ज ठेरैतांये कि सो मिन्जो पुर विस्वास ना करदै।

¹⁰ अतै धार्मिकता रै बारै मन्ज ठेरैतांये कि अऊँ पितै बलै चलू हा, अतै तूसु मिन्जो फिरी ना हेरना।

¹¹ न्याय रै बारै मन्ज ठेरैतांये कि संसारा रा सरदार शैतान दोषी ठहराया गच्छुरा हा।”

¹² “मिन्जो तूसु सोगी होर भी मती सारी गल्ला करनी हिन, पर हालि तुहै तियां जो समझी ना सकदै।

¹³ पर जैहणै सो, मतलब सच्चाई री आत्मा ईणा, ता तुसिओ सब सच्चाई रा रस्ता दसणा। क्ओकि तैस अपणी तरफा थऊँ ना पर जैडा कुछ प्रमात्मैं री तरफा थऊँ हुणना सो ही दसणा हा, अतै ईणैबाळी गल्ला तुसिओ दसणी।

¹⁴ तैस मेरी महिमा करनी हा, क्ओकि तैस मेरी गल्ला थऊँ तुसिओ दसणा।

¹⁵ जैडा कुछ पिता रा हा, सो सब मेरा हा, ठेरैतांये मैंई बल्लू कि तैस मेरी गल्ला जो लेई करी तुसिओ दसणा।”

दुख सुख मन्ज बदली गाणा

¹⁶ “थोड़ी देर मन्ज तूसु मिन्जो ना हेरना, अतै फिरी थोड़ी देरा मन्ज हेरना।”

¹⁷ ता तसेरै कुछ चेलै अप्पू मन्ज बलणा लगै, “ऐह कै हा जैडा ऐह असु सोगी बलदा हा, ‘थोड़ी देरा मन्ज तूसु मिन्जो ना हेरना, अतै फिरी थोड़ी देरा मन्ज मिन्जो हेरना?’ अतै ऐह ठेरैतांये कि अऊँ पितै बलै चलूरा?”

¹⁸ ता तियैं बल्लू, “ऐह थोड़ी देर जैडा ऐह बलदा हा, कै गल्ल हा? अहै ना जाणदै कि ऐह कै बल्लू करदा हा।”

¹⁹ यीशुऐ ऐह जाणी करी कि ऐह मिन्जो थऊँ पुच्छणा चाहन्दै हिन, तिनी बल्लू, “कै तुहै अप्पू मन्ज ऐसा गल्ला पुर पुछताछ लगुरै करना कि ‘थोड़ी देरा मन्ज मिन्जो ना हेरना, अतै फिरी थोड़ी देरा मन्ज मिन्जो हेरना?’

²⁰ अऊँ तूसु सोगी सच बलदा कि तूसु रूणा अतै विलाप करना, पर संसारा खुशी मनाणी हा; तुसिओ दुख भूणा, पर तून्दा दुख खुशी मन्ज बदली गाणा।

²¹ लोकिणै रै टैमैं जनानी जो दुख भुन्दा क्ओकि तैसारै दुखा रा टैमं चली ईन्दा, पर जैहणै सो बच्चै जो जन्म दि बैहन्दी हा ता ऐसा खुशी सितै कि संसारा मन्ज अक्क मणु पैदा भूआ, ता सो जनानी तैस दुखा जो भुली गान्दी हा।

²² तैस तरीकै ही तुसिओ भी हालि ता दुख भूणा, पर मुँ जैहणै तूसु सोगी फिरी मुळना ता तून्दै मन खुशी सितै भरी गाणै अतै तुन्दी खुशी जो कोई तूसु थऊँ ना छिनी सकदा।

²³ तैस दिन तूसु मिन्जो थऊँ कुछ ना पुच्छणा। अऊँ तूसु सोगी सच बलदा, अगर तुहै मेरै नां सितै जैडा कुछ पिता थऊँ मंगलै ता तैस तुसिओ दिणा।

²⁴ हालि तिकर तुहै मेरै नां सितै कुछ ना मँगू; मंगलै ता तुसिओ मुळना ताकि तुन्दी खुशी पूरी भोआ।”

संसारा पुर जय

²⁵ “मैंई ऐह गल्ला तूसु सोगी उदाहरण मन्ज करी हिन, पर सो टैमं लगुरा ईणा कि फिरी मुँ तूसु सोगी उदाहरण मन्ज ना कणैणा, पर खुलीकरी पितै रै बारै मन्ज दसणा।

²⁶ तैस दिन तूसु मेरै नां सितै मँगणा; अतै अऊँ तूसु सोगी ऐह ना बलदा कि अऊँ तूसु तांयें पितै सोगी बिनती करला;

²⁷ क्ओकि पिता ता अप्पू ही तूसु सोगी प्‍यार रखदा, ठेरैतांये कि तुहै मिन्जो सोगी प्‍यार रखू हा, अतै ऐह भी विस्वास करू हा कि अऊँ पिता री तरफा थऊँ छूरा हा।

²⁸ अऊँ पितै री तरफा थऊँ संसार मन्ज छूरा हा; अऊँ फिरी संसारा जो छड़ी करी पितै बलै चलूरा हा।”

²⁹ तसेरै चेलै बलणा लगै, “हेर अबै ता तू खुलीकरी बल्लू करदा हा, अतै कोई उदाहरण ना बल्लू करदा।

³⁰ अबै अहै जाणी गै कि तू सब कुछ जाणदा हा, अतै ठेरी जरूरत निया कि कोई तिजो थऊँ कुछ पूछा; ऐत थऊँ अहै विस्वास करदै हिन कि तू प्रमात्मैं री कनारी थऊँ छूरा हा।”

³¹ ऐह हुणी करी यीशुऐ तियां जो बल्लू, “कै तुहै अबै विस्वास करदै हिन?

³² हेरा, सो टैमं ईणा लगुरा, बल्कि चली आ कि तूसु सबी तितर-बितर भूच्ची करी अपणै-अपणै रस्तै गाणा, अतै मिन्जो अकेला छड़ी दिणा; तांभी अऊँ अकेला निया, क्ओकि पिता मेरै सोगी हा।

³³ मैंई ऐह गल्ला तूसु सोगी ठेरैतांये करी हिन कि तुसिओ शान्ती मुळा। संसारा मन्ज तुसिओ क्‍लेश भुन्दा हा, पर हिम्मत रखा, मैंई संसारा जो जीती लैऊरा।”