याकूब 4 - गददीसंसारा सोगी मित्रता 1 तूसु मन्ज लड़ाई-झगड़ा कठी थऊँ आये हिन? कै तियां स्वार्थीपन या दुष्ट शैतान री अभिलाषा थऊँ ना हिन जैड़ै कि तून्दै दिला मन्ज हिन? 2 तुसै लालच रखदै हिन पर तूसु जो ना मुळदा। तुसै हत्या अतै जळणी करदै हिन मगर तूसु जो कुछ भी ना मुळदा तुसै झगड़दै अतै लड़दै हिन। पर तूसु जो ऐत तांई ना मुळदा कि तुसै प्रमात्मैं थऊँ ना मन्गदै हिन। 3 तुसै मन्गदै हिन फिरी भी पान्दै ना हिन ऐत तांई कि बुरी इच्छा सितै मन्गदै हिन ताकि अपणै भोग-विलास मन्ज सब कुछ ऊड़ारी दीन। 4 हे अविस्वास योग्य मणुओ कै तुसै ना जाणदै कि संसारा सितै मित्रचारा रखणा प्रमात्मैं सितै बैर रखणा हा, अतै जैडा कोई संसारा रा मित्र बणना चाह ता सो अपणै आपा जो प्रमात्मैं रा दुश्मण बणान्दा। 5 तुसै ऐह ना समझदै हिन कि पवित्रग्रन्थ कै बलदा हा, जैडा प्रमात्मैं रा पवित्र आत्मा इन्दै दिला अंदर बसऊरा हा सो इन्नी लालसा करदा कि अहै ईनी जिन्दगी जीन जैत थऊँ प्रमात्मां खुश भोआ। 6 प्रमात्मां ता होर भी अनुग्रह दिन्दा, ऐत तांई पवित्रग्रन्था मन्ज ऐह लिखुरा कि : “प्रमात्मां अभिमानी रा वरोध करदा, पर दीन मणु पुर कृपा करदा।” 7 ठेरैतांये प्रमात्मैं रै अधीन भूच्ची गच्छा अतै जैड़ा शैतान चाहन्दा सो मत करा ता तैस तून्दै नेड़ै थऊँ नह्ही गाहणा। 8 प्रमात्मैं रै नेड़ै अईआ ता तैस भी तून्दै नेड़ै ईणा, हे पापीओ अपणी जिन्दगी जो शुद्व करा तुन्दी बफादारी प्रमात्मैं अतै संसारा मन्ज फसुरी हा। 9 अपणी गलती री वजह थऊँ दुखी भोआ अतै शौक करा अतै रोआ तून्दा हासणा शौक मन्ज अतै तुन्दी खुशी उदासी मन्ज बदली गच्छा 10 प्रभु रै सामणै दीन बणा ता तैस तूसु जो शिरोमणि बणाणा। भाई पुर दोष मत लान्दै 11 हे विस्वासी भाईओ, तुसै अक्की दुऐ री बदनामी मत करा। जैडा अपणै भाई री बदनामी करदा या अपणै भाई पुर दोष लान्दा सो व्यवस्था जो बदनाम करदा अतै व्यवस्था पुर दोष लान्दा। अगर तू ईयां करदा ता व्यवस्था पुर चलनै बाळा ना पर तठेरा न्याय करनै बाळा ठहरदा। 12 व्यवस्था दिणैबाळा अतै न्याय करनै बाळा ता अक्क ही हा सो हा प्रमात्मां जैस मन्ज बचाणै री अतै नाश करनै री शक्ति हा, पर तू कुण हा जैडा होरी रा न्याय करदा फिरदा हा? घमण्ड़ रै बारै मन्ज चेतावनी 13 तुसै जे ऐह बलदै हिन कि अज या दोतै कसी होरी नगरा मन्ज गिच्ची करी अक्क साल बताणा अतै व्यपार करीके मुनाफा कमाणा। 14 पर ऐह ना जाणदै कि दोतै कै भूणा, हुणी ता लेय्आ, तुन्दी जिन्दगी हा कै? तुसै ता मन्ना ईनै हिन जिंआं कि पाणी रा भाफ जैडा थोड़ी देर ता हुज्जदा पर फिरी लोप भुच्ची गान्दा। 15 ठेरै बदलै ता तुसिओ इआं करना चहिन्दा कि, “अगर प्रभु चाह ता अहै जिन्दा रैहन, अतै ऐह या सो कम भी करनै।” 16 पर अबै तुसै अपणी डीगां पुर घमण्ड़ करदै हिन, ईना जिन्ना सब घमण्ड़ बुरा भुन्दा। 17 ऐत तांई जैडा कोई भलाई करना जाणदा अतै ना करदा तैस तांई ऐह पाप हा। |
This work is licensed under Creative Commons Attribution-ShareAlike 4.0 License.