याकूब 2 - गददीपक्षपात रै वरोधा मन्ज चेतावनी 1 हे मेरै विस्वासी भाईओ, तुहै इन्दै महिमायुक्त प्रभु यीशु मसीह रै चेलै हिन ठेरैतांये तूसु मन्ज पक्षपात ना भोआ। 2 उदाहरण तांयें अगर अक्क मणु तूसु मन्ज सोना पैहनी करी अतै छैळ-छैळ कपड़ै पाई करी तुन्दी सभा मन्ज अईआ अतै अक्क गरीब भी मैइलै-कुचैएलै कपड़ै लाई करी अईआ। 3 अतै तुसै तैस छैळ कपड़ै बाळै रा ज्यादा मान करीके बलन कि, “तुसै ओठी खरी जिनी जगहा बैहा,” अतै तैस गरीबा सितै बलन, “तू ऐठी खड़ी रै,” या फिरी कि “मेरै पैरा री पीढ़ी बलै थलै बैही रै।” 4 ता कै तुसै अप्पू मन्ज भेद-भाव ना करू अतै बुरै विचार सितै न्याय करनै बाळै ना ठेहरै? 5 मेरै विस्वासी भाईओ हुणा, प्रमात्मैं ऐस संसारा रै गरीबा जो चुणुरा कि विस्वासा मन्ज अमीर भून। अतै तैस राज्य रै अधिकारी बणन जठेरी सौगन्द प्रमात्मैं तियां सितै करूरी हा जैड़ै तैस सितै प्यार रखदै हिन। 6 पर तुसै तैस कंगाला री बेईज्जती करीआ, कै अमीर मणु तूसु पुर अत्याचार ना करदै हिन? अतै सो ही तूसु जो कचैहरी मन्ज ना रगड़दै हिन? 7 कै सो तैस महान नां यीशु मसीह री निन्दा ना करदै हिन जसेरै तुसै समझै गान्दै? 8 फिरी भी जे तुसै पवित्रग्रन्था रै बचना रै मुताबक कि तू अपणै पड़ेही सोगी अप्पू सांईं प्यार रख, ता सचमुच तैसा राज्य व्यवस्था जो पूरी करदै हिन, ता खरा ही करदै हिन। 9 पर जे तुसै पक्षपात करदै हिन ता पाप करदै हिन अतै व्यवस्था तूसु जो अपराधी ठहरान्दी हा। 10 क्ओकि जैडा कोई सारी व्यवस्था जो मन्दा पर अक्की गल्ला मन्ज चूक करदा ता सो सबी गल्ला मन्ज दोषी ठहरदा। 11 ऐत तांई कि जिनी ऐह बल्लुरा कि, “तू व्यभिचार मत करना” तिनी ऐह भी बल्लुरा कि “तू हत्या मत करना,” अतै जे तैंई व्यभिचार ता ना करू पर हत्या करी ता भी तू व्यवस्था जो तोड़णै बाळा ठहरू। 12 तू तियां मणु सांईं बचन बल्लै अतै कम भी करै जिआंरा न्याय आजादी री व्यवस्था रै मुताबक भूणा। 13 क्ओकि जिनी दया ना करी तंयारा न्याय भी बिना दया रा भूणा, अगर तुहै होरी पुर दया करी हा ता प्रमात्मां भी तूसु पुर न्याय रै दिन दयावान भूणा। विस्वास अतै कर्म 14 मेरै विस्वासी भाईओ, जे कोई बल्ला कि मिन्जो यीशु मसीह पुर विस्वास हा पर भलै कम ना करदा भोआ ता ऐत थऊँ के फायदा? कै ईना जिन्ना विस्वास तसेरा उद्धार करी सकदा? 15 अगर कोई विस्वासी भाई या बैहण नगैं भून अतै तियां जो हर रोज खाणै री कमी भोआ। 16 अतै तूसु मन्ज कोई तियां सितै बल्ला कि प्रमात्मां पुरा करला, तुसै गर्म रेय्आ अतै तृप्त रेय्आ, पर जैड़ी चिज तंयारै शरीरा तांई चैहिन्दा सो तुहै ना दीन ता कै फाईदा? 17 तियां ही विस्वास भी अगर भलै कम्मा सोगी ना भोआ ता अपणै स्वभाव मन्ज मरूरा। 18 अगर कोई बैहंस करदा कि मिन्जो विस्वास हा मिन्जो कमा री जरूरत निय्आ, ता मिन्जो दस कि तू अपणै विस्वास जो भलै कमा रै बिना कियां सावित करी सकदा हा, पर मुँ अपणा विस्वास अपणै भलै कमां सितै तिजो दसणा। 19 तिजो विस्वास हा कि अक्क ही प्रमात्मां हा, तू ठीक बलदा, दुष्टात्मा भी विस्वास रखदी अतै थरथर कम्मदी हिन। 20 पर हे मूर्ख मणुआ कै तू ऐह भी नां जाणदा, कि भलै कम्मा बिना विस्वास बेकार हा? 21 जैहणै इन्दै पूर्वज अब्राहमे अपणै पुत्र इसहाक जो वेदि पुर चढ़ाऊ ता प्रमात्मैं तैसिओ ऐस कमां सितै धर्मी ठहराऊ। 22 ता तैंई हेरी ही लैऊ हा कि विस्वासै तसेरै कमां सितै मिलीकरी असर दसु अतै कमां सितै विस्वास सचा सावित भुआ। 23 अतै पवित्रग्रन्था रा ऐह बचन पुरा भुआ कि अब्राहमे प्रमात्मैं पुर विस्वास रखू ठेरैतांये अब्राहम प्रमात्मैं री नजरा मन्ज धर्मी बणी गो अतै सो प्रमात्मैं रा मित्र समझिया गो। 24 ता तुसै हेरी लैऊ कि मणु मात्र विस्वासा सितै ही ना पर भलै कमां सितै भी धर्मी ठहरदा हा। 25 इन्नी साहबै ही राहाब वेश्या भी थी जैहणै तैसै दूता जो अपणै घरै शरण दिती अतै तियां जो दुऐ रस्तै मितै विदा करू ता सो अपणै तैस कमां सितै धर्मी ठहरी। 26 ऐस तरीकै जियां शरीर सांस बगैर मरूरा हा तियां ही विस्वास भी कम्मा बिना मरूरा हा। |
This work is licensed under Creative Commons Attribution-ShareAlike 4.0 License.