याकूब 1 - गददी

अभिवादन

¹ ऐह पत्री याकूब री तरफा थऊँ हा जैड़ा कि प्रमात्मैं रा अतै प्रभु यीशु मसीह रा दास हा। अऊँ ऐह पत्री यहूदी विस्वासी रै बारह गोत्रा लिखु करदा, जैड़ै कि पूरै संसार मन्ज तितर-बितर भूच्ची करी रैहन्दै हिन तियां जो मेरा नमस्ते।

विस्वास अतै अक्लमंदी

² हे मेरै विस्वासी भाईओ, जैहणै तुसै कईआ किस्‍मां री परीक्षा मन्ज पैन

³ ता ऐत जो पूरी आनन्द री गप्‍प समंझा, ऐह जाणी करी कि तून्दै विस्‍वासा जो परखणै थऊँ धीरज पैदा भुन्दा।

⁴ पर तुसिओ सब कुछ सैहणै तांयें सिखणा चहिन्दा कि तुसै आत्मिक रूप सितै सिद्व भूच्ची गाहन अतै तूसु मन्ज कसी भी खरी गल्ला री कोई कमी ना रेय्आ।

⁵ पर तूसु मन्ज अगर कसी जो अक्ल री घटी भोआ ता प्रमात्मैं थऊँ मगां ता सो बिना कोई फटकार सबी जो खुशी सितै दिन्दा अतै तैसिओ दी गाणीआ।

⁶ पर विस्‍वासा सितै मंगा अतै कुछ शक मत करा क्ओकि शक करनै बाळा समुंद्र री लैहरा सांईं हा जैड़ी हवा सांईं चलदी अतै उछाळ लैन्दी हिन।

⁷ इन्‍ना मणु जैड़ा शक करदा तैसिओ प्रभु थऊँ कुछ ना मुळना।

⁸ ऐसा मणु फैसला ना करी पान्दा की प्रमात्मैं पिचो चलना कि ना चलना, ऐसै मणु बलदै ता हिन पर करदै ना हिन।

गरीबी अतै अमीरी

⁹ विस्वासी जैड़ै गरीब हिन तियां जो ऐहा गल्ला पुर घमण्ड़ करना चहिन्दा कि प्रमात्मैं तियां जो किमती समझू हा।

¹⁰ अतै विस्वासी जैड़ै अमीर हिन सो अपणै आपा पुर नम्रता री वजह थऊँ घमण्ड़ करन, क्ओकि अविस्वासी अमीर मणु रा धन घा रै फुल्ला सांईं मुरझाई गाणा।

¹¹ जियां सूरजा निकळदै ही जोरा री धूप पैन्दी हा अतै घा जो हुकाई दिन्दीआ अतै तसेरा फूल झड़ी गान्दा अतै तसेरी शोभा चली गान्दीआ। इन्‍नी साहबै ही अमीर भी पैसै कमान्दै-कमान्दै मरी गाणा।

परीक्षा अतै लालच

¹² धन्य हा सो मणु जैडा परीक्षा मन्ज टिक्की रैहन्दा क्ओकि तैस खरै निकळी करी सदा री जिन्दगी रा मुकुट पाणा जठेरा वायदा प्रमात्मैं अपणै प्‍यार करनै बाळै सोगी करूरा हा।

¹³ जैहणै कसी री परीक्षा भोआ ता सो ऐह ना बल्ला कि मेरी परीक्षा प्रमात्मां करू करदा क्ओकि ना ता बुरी गल्ला थऊँ प्रमात्मैं री परीक्षा भूच्ची सकदी हा अतै ना ता सो कसी री परीक्षा अप्पू करदा।

¹⁴ पर हर कोई अपणै मनां री इच्छा री कनारी खिन्जी करी तैत मन्ज फसी करी परीक्षा मन्ज पैन्दा।

¹⁵ ऐह बुरी इच्छा री वजह थऊँ मणु पापी कमां जो जन्म दिन्दा हा, अतै जैहणै पाप ज्यादा वदि गान्दा हा ता सो मौत जो पैदा करदा हा।

¹⁶ हे मेरै प्यारे विस्वासी भाईओ, धोखा मत खा।

¹⁷ क्ओकि हरेक खरा अतै उत्तम दान पिता प्रमात्मां री कनारी थऊँ मुळदा जिनी स्वर्गा री हरेक ज्योती जो बणाऊरा, सो परछाई सांईयै ना बदलिन्दा सो सदा अटल रैहन्दा।

¹⁸ तिनी अपणी ईच्‍छा रै मुताबक असु जो सच्चाई रै बचना सितै नोई जिन्दगी दिती हा, ताकि अहै विस्वासी तसेरी रचना मन्ज सबी थऊँ जरूरी हेस्सा बणी गान।

हुणना अतै करना

¹⁹ हे मेरै विस्वासी भाईओ, ऐह गप्‍प तुसै जाणदै हिन, ऐत तांई हरेक मणु हुणनै मन्ज ध्यान करनै बाळा अतै बलणै मन्ज धीरज रखणै बाळा अतै गुस्सा करनै मन्ज देर करनै बाळा भोआ।

²⁰ क्ओकि जैहणै मणु जो गुस्सा इन्दा ता प्रमात्मां जियां चाहन्दा तियां सो मणु धर्मी जिन्दगी ना जी सकदा।

²¹ ऐत तांई सारै मनां रै मळा अतै बैर-वरोधा री बढ़ती जो दूर करीके प्रमात्मैं रै बचना जो नम्रता सितै मन्‍नी लेय्आ जैडा कि दिला मन्ज समाई दितुरा अतै जैडा तून्दै प्राणा रा उद्धार करी सकदा।

²² पर प्रमात्मैं रै बचना रा पालन करनै बाळै बणा अतै मात्र हुणनैबाळै ही ना जैड़ै कि अपणै आपा जो धोखा दिन्दै हिन।

²³ क्ओकि जैडा कोई प्रमात्मैं रै बचना जो हुणनैबाळा हा अतै तैत पुर चलनै बाळा निआं ता सो मणु तैस मणु सांईं हा जैडा कि अपणै असली चेहरै जो शीसै मन्ज हेरदा।

²⁴ ऐत तांई कि सो अपणै मुँहा जो हेरी करी चली गाहन्‍दा अतै बड़ा जल्दी भुली गाहन्‍दा कि मेरा मुँह किना थू।

²⁵ पर जैडा मणु प्रमात्मैं री सिद्व व्यवस्था जैड़ी आजादी दिन्दी हा तैत पुर ध्यान करदा रैहन्दा तैस अपणै कमां मन्ज ऐत तांई आशीष पाणी हा कि सो हुणी करी ना पर तठेरै मुताबक ही कम करदा हा।

²⁶ अगर कोई अपणै आपा जो भक्त समझा अतै अपणी जीभा पर रोक ना लगा पर अपणै मनां जो धोखा देय्आ ता तसेरी भक्ति व्यर्थ हा।

²⁷ इन्दै पिता प्रमात्मैं रै नेड़ै शुद्ध अतै साफ भक्ति ऐह हा कि अनाथ अतै विधवा जनानी रै दुखा मन्ज तंयारा खयाल रखा अतै अपणै आपा जो संसार री बुराई थऊँ निष्कलंक रखा।