इब्रानियों 2 - गददी

महान उद्धार

¹ ऐत तांई असु जो चैहिन्दा कि अहै तियां सच्चाई री गल्ला पुर होर भी मन लगान जैड़ी अहै हुणुरी हिन करखी इआं ना भोआ कि अहै बैहकी करी ऐत थऊँ दूर भूच्ची गाहन.

² क्ओकि जैड़ी मूसा री व्यवस्था स्वर्गदूता रै द्धारा दितुरी थी, सो पक्की थी अतै हर अक्क अपराधी अतै आज्ञा ना मनणै बाळै जो सजा मुळी।

³ अगर ऐह सच हा ता तैस उतम उद्धार रा संदेश जैड़ा यीशु थऊँ मुळु अनदेखा करीके किआं बच्ची सकदै हिन? ऐस उतम उद्धार री घोषणा यीशु मसीह रै द्धारा ही भूई अतै चेलै जैड़ा हुणुरा थू तैतिओ पक्का सावित करू।

⁴ प्रमात्मैं ऐस संदेश जो पक्का करू चिन्ह, अनोखै कमां, कैईआ किस्‍मां रै सामर्थ रै कमां अतै पवित्र आत्मा रै वरदाना रै बंटबारै द्धारा।

इन्दा उद्धारकर्ता

⁵ प्रमात्मैं ठेरै अलावा ईणै बाळै संसार जठेरी चर्चा अहै करू करदै हिन, तैतिओ स्वर्गदूता रै हवालै ना करू पर पुत्र यीशु मसीह रै हवालै करू।

⁶ बल्कि पवित्रग्रन्था मन्ज ऐह लिखुरा हा कि; “मणु कै हा कि तू तंयारी सुधि लैन्दा हा? या मणु कै हिन कि तू तंयारी चिन्ता करदा हा?

⁷ तैंई मणु जो स्वर्गदूता थऊँ कुछ थोड़ी ही शक्ति दिती; तैंई तियां जो अक्क राजा सांईयै महिमा अतै आदर दिता, तियां जो अपणै हत्था रै कमां पुर अधिकार दिता।

⁸ तैंई सब कुछ तंयारै पैरा थलै करी दितुरा।” ऐसा लगदा हा कि प्रमात्मैं सब कुछ मणु रै अधीन करी दिता। ऐसा कुछ भी निय्आ जैड़ा तंयारै अधीन ना भोआ पर हालि तक सब कुछ तंयारै अधिकार मन्ज निय्आ।

⁹ अहै यीशु जो जैडा कि स्वर्गदूता थऊँ थोड़ा ही देर तांयै घट करू थू, जो मौती रा दुख चुकणै री व्जहा थऊँ तैसिओ आदर रा मुकुट मुळु। प्रमात्मैं रै अनुग्रह सितै यीशु हरेक मणु तांई बलिदान भुआ।

¹⁰ प्रमात्मैं सबी चिजा जो बणाऊ अतै सब कुछ तसेरा ही हा। जठेरी व्जहा थऊँ हरेक मणु जो प्रमात्मैं री महिमा मन्ज सहभागी भूणै तांयै प्रमात्मैं ऐह सही समझू कि यीशु दुख उठा अतै चरित्र मन्ज सिद्ध मणु बणी गच्छा। यीशु ही इन्या जो उद्धार री तरफ लेई गान्दा हा।

¹¹ ठेरैतांये अबै यीशु अतै जियां जो सो पवित्र करदा हा दूनी रा अक्क ही पिता हा। ठेरैतांये यीशु तियां जो अपणै भाई बैहणी रै रूपा मन्ज बलणै तांयै ना शर्मान्दा।

¹² सो बलदा हा कि; “मुँ अपणै मणु जो तेरै करूरै कमा रै बारै मन्ज दसणा, अतै सभा मन्ज तेरा भजन गाणा।”

¹³ अतै फिरी सो ऐह बलदा हा कि; “मुँ तियां बच्चै सोगी जैड़ै मिन्जो प्रमात्मैं दितुरै,” “मुँ तैस प्रमात्मैं पुर भरोसा रखणा।”

¹⁴ क्ओकि प्रमात्मैं री औलाद मणु हिन जैड़ै मांस अतै खून सितै बणुरै हिन यीशु भी मांस अतै खून सोगी पैदा भूआ। मणु बणनै थऊँ बाद ही सो मरी सकदा हा अतै मरनै थऊँ बाद ही सो शैतान री ताकत जो त्रोड़ी सकदा हा जैस बलै मौत रा अधिकार हा।

¹⁵ ऐस तरीकै यीशुऐ तियां सबी जो आजाद करू जैड़ै हालि तक गुलामी मन्ज जिऊ करदै थियै अतै मौती थऊँ डरू करदै थियै।

¹⁶ क्ओकि यीशु ता स्वर्गदूता जो ता ना पर अब्राहम रै वंशा जो सम्भालदा हा।

¹⁷ ठेरैतांये मसीह तांयै जरूरी थू कि सबी गल्ला मन्ज असु सांईयै बणी गच्छा जैड़ै कि तसेरै भाई बैहण हिन ताकि प्रमात्मैं रै सामणै सो अक्क दयालु अतै बफादार महायाजक बणी सका। फिरी सो बलिदान चढ़ाई सकदा हा जैत सोगी मणु रा पाप दूर करया गच्छा।

¹⁸ क्ओकि सो अप्पू ही दुख अतै परीक्षा थऊँ गुजरी चुकुरा हा ठेरैतांये ही सो इन्दी मदद करी सकदा हा जैहणै असु पुर परीक्षा इन्दी हा।