इब्रानियों 13 - गददीमसीही जिन्दगी जिणै रै निर्देश 1 अक्की दूये रै बारै मन्ज चिन्ता करदै रैहन जियां प्रभु रै मणु जो करना चहिन्दा। 2 ऐह ध्यान रखा कि अनजाण मणु रा भी अपणै घरै स्वागत करा, इन्या करनै सितै कुछ मणुऐ अनजाणै मन्ज स्वर्गदूता रा भी अपणै घरा मन्ज स्वागत करू हा। 3 कैदी मणु री ईनी सुध लेय्आ जिआं कि तुसै भी तियां सोगी कैदी भून, अतै जिआं मणु जो सताया गान्दा हा तंयारै दर्द जो भी इन्या महसुस करा कि तुहै तिन्या सोगी तंयारै दुख मन्ज सहभागी हिन। 4 बैह सबी मणु मन्ज आदर-मान री गप्प समझी गच्छा अतै बछांण शुद्ध रेय्आ क्ओकि प्रमात्मैं व्यभिचारी अतै पराई जनानी बल्लै गाणै बाळै रा न्याय करना। 5 अपणी जिन्दगी जो पैसै रै प्रेम थऊँ दूर रखा, जैडा कुछ तूसु बलै हा तैत मन्ज ही खुश रेय्आ क्ओकि प्रमात्मैं अप्पू ही बल्लुरा हा कि “मुँ तुसै कदी भी ना छड़णै हिन अतै ना कदी त्यागणै हिन।” 6 ऐत तांई अहै निडर भूच्ची करी बलदै हिन कि, “प्रभु मेरा सहायक हा, मुँ ना डरना हा मणु मेरा कै करी सकदा।” 7 जैड़ै तून्दै अगुवै थियै अतै जिऐ तूसु जो प्रमात्मैं रा बचन हणाऊरा हा तियां जो याद रखा। याद करा कि तिन्यै कस तरीकै री जिन्दगी बिताई थी अतै तियां सांईयै विस्वास मन्ज बढ़णै री कोशिश करा। 8 यीशु मसीह कदी ना बदलिन्दा सो कल अज अतै युगा-युग अक्क जिन्ना हा। 9 अनजाण मणु जो मौका मत देय्आ को सो तुसिओ प्रमात्मैं रै बारै मन्ज होर कोई नोई गल्ला मन्ज विस्वास करनै जो मजबुर करन, ठेरैतांये तुहै अनजाण मणु री भरमाणै बाळी गल्ला मन्ज मत इन्दै। इन्नी अनजाण गल्ला जैड़ी तुहै असु थऊँ ना सीखी, जिन्या कि कै खाणा कै ना खाणा ठेरै बारै मन्ज जैड़ै नियम हिन ऐत थऊँ कोई फाईदा ना भुन्दा। 10 असु बलै अक्क इन्नी वेदि हा जैड़ी सो याजक भी जैड़ै आराधना री जगह सेवा करदै हिन, तैड़ी थऊँ तिन्या जो भी कुछ खाणै रा अधिकार निय्आ। 11 पैहलै वायदै रै अनुसार हर साल जिन्या गोरू रा खून पापबलि तांई महायाजक महापवित्र जगह मन्ज पाप री माफी तांयै लेई गान्दै हिन अतै तियां गोरू री देह तैस छावनी थऊँ बाहर फूकी दिन्दै हिन। 12 इन्नी साहबै ही यीशु मसीह भी मणु जो अपणै खूना सितै पवित्र करनै तांई यरूशलेम शहर बाहर दुख झेलू। 13 ता अईआ अहै छावनी रै बाहर यीशु वलै चलन ताकि अहै उद्धार पाई सकन अतै मणु रै द्धारा बदनामी सैहणै जो तैयार रैहन जियां तसेरी बदनामी करी। 14 कजो कि ऐसा दुनिया मन्ज ईदंआ पक्का रैहणै बाळा कोई नगर निआं बल्कि अहै ईणैबाळै अक्क स्वर्गीय नगरा री खोज मन्ज हिन। 15 ऐत तांई अहै यीशु रै कारण अपणै लवड़ा सितै प्रमात्मैं री स्तुति सदा करदै रैहन ऐह इन्दा तैस तांयै बलिदान हा। 16 पर भलाई करा अतै जरूरत मंद मणु सोगी अपणी चिजा जो बड़ा, क्ओकि प्रमात्मां इन्नै जिन्नै बलिदान थऊँ खुश भुन्दा हा। 17 अपणै अगुवै री मन्ना अतै तंयारै अधीन रेय्आ क्ओकि सो तून्दा ध्यान रखदै हिन कि तुहै भटकी ना गाहन। तियां जो अपणी सेवा रा प्रमात्मैं जो हिसाब दिणा पैणा, कि सो ऐस कमां जो खुशी सितै करन, ना कि दुखी भूची करी ना ता तुसिओ कोई फाईदा ना भूणा। 18 असु तांई प्रार्थना करदै रेय्आ क्ओकि असिओ पक्का पता हा कि इन्दा विवेक शुद्व हा अतै अहै चाहन्दै हिन कि इन्दै सबी कमा रै द्धारा अहै प्रमात्मैं रा आदर करन। 19 प्रार्थना करनै तांई अऊँ तूसु जो होर भी उत्साहित करदा हा कि अऊँ बड़ै तोळै तूसु बल्लै फिरी ईच्ची सकू। 20 अबै शान्ती दिणैबाळा प्रमात्मां जिनी इन्दै प्रभु यीशु मसीह जो मुरदै थऊँ जीयाऊ जैडा भैड़ा रा महान पाहल हा अतै तिनी अपणै खूना रै द्धारा अनन्त काल रै वायदै जो स्थापित करू हा। 21 सो तुसिओ सब गल्ला मन्ज सामर्थ देय्आ कि तुहै तसेरी इच्छा जो पुरा करी सकन, सो तून्दै अन्दर यीशु मसीह रै सामर्थ रै द्धारा हर भली गल्ला जो पैदा करा जैत सोगी सो खुश भुन्दा हा, तसेरी महिमा सदा-सदा तांयै भुन्दी रेय्आ। आमीन। 22 हे विस्वासी भाईओ, अऊँ तूसु सितै बिनती करदा कि, तुहै धीरज सोगी इन्या उत्साह भरै उपदेशा जो हुणी लेय्आ क्ओकि मैंई तूसु जो बड़ा थोड़ा करीके लिखु हा। 23 तुसै ऐह जाणी लेय्आ कि तीमुथियुस ईदंआ विस्वासी भाई जेला थऊँ छुटी गछूरा हा अतै जे सो तोळा पुजी गो ता मुँ तैस सोगी तूसु सितै मुळना हा। 24 अपणै सारै अगुवै अतै सबी पवित्र मणु जो नमस्कार करा। इटली देश मन्ज रैहणै बाळै विस्वासी भी तूसु जो नमस्कार करदै हिन। 25 तूसु सबी पुर प्रमात्मैं रा अनुग्रह भुन्दा रेय्आ। आमीन। |
This work is licensed under Creative Commons Attribution-ShareAlike 4.0 License.